Ilẹta Nin Otu Nọn Sun Oga Gbẹn Re

Ibhio Mhan Ne Daan Mhan:

Imhan ne ga Jehova, mhan wo hoẹmhọn Baibo nin Ọta nọnsi Osẹnobulua. Mhan rẹọbhọ ghe okha ne gbale ribhi Baibo. Adia ne ribhọ sabọ rẹkpa mhan bhi iẹnlẹn, sẹyẹ, ebi mhan miẹn tie bhi ẹkẹ ọle rẹ mhan rẹọbhọ ghe Jehova wo hoẹmhọn eria. (Psalm 119:105; Luk 1:3; 1 Jọni 4:19) Ọ wo manman ghọn mhan rẹ rẹkpa ẹbho rẹ lẹn ene ẹmhọanta ne ghanlẹn ne ribhi Ọta nọnsi Osẹnobulua. Bhiriọ, ọ manman wo ti mhan bhọ rẹ re ọne ebe nan dagbare natiọle “Ebi Uwẹ Ha Miẹn Luẹ Bhi Okha Ne Ribhi Baibo.” Bha ji mhan tẹmhọn ọne ebe man bha khere.

Ibhokhan a manman gbẹn ọne ebe nan. Ọrẹyiriọ, a dẹ yẹ sabọ noo ọle rẹ rẹkpa ene wanre ne ho nin ele luẹ Baibo. Beji a miẹn ghe ebe nin ọrebhe ha sabọ tie Baibo khin, edandan i ribhọ ghe mhan rebhe dẹ miẹn elele bhọ sade mhan tie okha ne ribhi ẹkẹ ọle. Mhan ha lu iriọ, mhan ki sabọ gene ha ghọnghọn.

Okha ne ribhi Baibo, ele ribhi ọne ebe nan, rẹ na bhi ẹghe nin Osẹnobulua rẹ man eria rẹ ha khian. Mhan wo dọnmhegbe rẹ gbe ene okha ne ribhi ẹkẹ ọne ebe nan bhi uwedẹ nọn ha rẹ lẹkhẹ nan rẹ tie, yẹ lẹn otọle. Mhan da yẹ dọnmhegbe rẹ gbẹn ele ọsegbe-ọsegbe beji ele rẹ sunu.

Ọne ebe nan bha wo gheghe gbokha ne ribhi Baibo. Uwedẹ nan rẹ gbẹn ọlẹn, bi uwedẹ nan rẹ mhanmhan ifoto ne ribhọ dẹ sabọ rẹkpa ọria nọn tiọle rẹ sabọ ha re ọkhọle muno ene okha beji ele rẹ sunu tee. Sẹyẹ, ọ dẹ rẹkpa ọle rẹ sabọ lẹn ebi emhin dia ẹbho nan tẹmhọnlẹn bhi ene okha yẹ bhi egbe.

Ọne ebe nan dẹ rẹkpa mhan rẹ daghe ọle ghe, okha ọsi ẹbho, ele ribhi Baibo​—ẹbho ne hẹnmhọn nin Jehova bi ẹbho ne bha hẹnmhọn nanlẹn. Ọ dẹ yẹ rẹkpa mhan rẹ lẹn emhin nin mhan ha sabọ miẹn luẹ bhi okha nọnsele. (Rom 15:4; 1 Kọrint 10:6) Obọle 14 ọne ebe nan mhọn. A gbẹn obhiọ khere bhi ene emhin nin mhan ha luẹ bhi ene okha bhi ene obọle kẹkẹ.

Ahamiẹn aba la inẹn uwẹ khin, uwẹ sabọ rẹ deba ọmọn nọnsẹ tie iluẹmhin ọkpa, yẹ deba ọle zilo nyan ifoto ne ribhọ. Bha veva sabọ yẹ ko tie eji a da re ọne iluẹmhin bhi Baibo. Rẹkpa ọmọn nọnsẹ rẹ daghe ebi emhin nin ọle tie bhi Baibo rẹ diẹn mun ebi ọle tie bhi ọne ebe. Uwẹ dẹ yẹ sabọ noo ọne uwedẹ nan sade uwẹ rẹkpa ọria nọn ki wanre rẹ lẹn uhọnmhunje nọn ribhi Baibo.

Mhan rẹọbhọ ghe ọne ebe nan dẹ rẹkpa ọrebhe ne mhọn ọkhọ nọn mhẹn, ele ha rẹ ha yi ibhokhan la ewanlẹn, rẹ sabọ luẹ emhin bhi Ọta nọnsi Osẹnobulua, yẹ noo ebi ele luẹle bhi iẹnlẹn nọnsele. Bhiriọ, ele ki sabọ dọ deba azagba-uwa nọnsi Jehova nin ọle hoẹmhọnlẹn ha ga ọle.