Inọnta Nọn Lẹkhẹ Nin Uwẹ Ha Sabọ Nọọn

Agbaẹbho nin ẹbho ne bunbun ne na bhi Philippines vae da nyẹnlẹn yẹ wẹnna, ọle Mary bi ọdọ ọle nin Johna da nyẹnlẹn. Ọ wo ha yẹẹ ele rẹ ha tẹmhọn Osẹnobulua man ene ẹbho nan ne ribhi ọne agbaẹbho nan. Bhi ẹghe emianmhẹn KOVID-19, Mary da munhẹn ha man ẹbho ne bunbun Baibo bhi agbaẹbho nin ọle ye, bi agbaẹbho ebhebhe bhi ọne otọ agbọn nan rebhe. Be ọle rẹ sabọ lu iriọ yẹ?

Mary ki nọọn ene ọle manlẹn Baibo yọle, “Uwẹ be lẹn ọria soso nọn ho nin ọle luẹ Baibo?” Ele ha wanniẹn ọlẹn yọle ehe, ọle ki yọle nin ele taman ọlẹn ebi ọle ha rẹ miẹn ọne ọria yẹ. Mhan ha nọọn inọnta ne sẹriọ, emhin esili manman wo nabhọre. Bezele? Ranmhude, ọ manman wo yẹẹ ẹbho ne hoẹmhọn ebi ele luẹ bhi Baibo rẹ ha taman imọẹ ele la ọria bhi azagba-uwa nọnsele ebi ele luẹ. Be ẹbho nin Mary man ele Baibo ki rẹ lu emhin yẹ bhi ẹghe nin ọle rẹ nọọn ele ọne inọnta nan?

Jasmin nin Mary man ọlẹn Baibo da man Mary ẹbho enẹn ne ho nin ele ha luẹ Baibo. Ọkpa bhi ene itue enẹn nan hi Kristine. Ọle da wo manman hoẹmhọn ebi ọle luẹ bhi Baibo rẹ sẹbhọ ghe ọle da taman Mary nọn ha man ọlẹn Baibo igbava bhi ẹkẹ uzana. Ẹghe nin Mary ki rẹ nọọn ọlẹn si ọle lẹn ọria soso nọn ho nin ọle luẹ Baibo, Kristine da yọle, “Ehe, mẹn dẹ taman imọẹ mẹn eso.” Uzana eso ki gbera, Kristine da do re imọẹ ọle enẹn man Mary ne ha guanọ nin ele luẹ Baibo. Akizẹbue, Kristine da yẹ re imọẹ ọle ebhebhe man Mary. Ene imọẹ ọle nan da gbo re imọẹ ele kẹkẹ man Mary.

Kristine da yẹ ha guanọ nin azagba-uwa nọnsọle ne ribhi Philippines dọ luẹ Baibo. Ọle da ne ọmọn okhuo nọnsọle natiọle Andrea zilo. Bhi ọsi ọhẹnhẹn, Andrea da ha riale ghe, ‘Otuẹ ogboni Esali Jehova khin, ghe ele bha rẹọbhi Jesu. Sẹyẹ, Baibo natiọle Old Testament ọkpa ele tie.’ Ọkpakinọn, bhi osukpa nin ọle luẹ Baibo, iria-eria nọnsọle da fidenọ. Ẹghe-ẹghe nin ọle rẹ luẹ emhin ọgbọn bhi Baibo, ọle ki yọle, “Beji a miẹn Baibo tale ẹmhọanta nọn!”

Akizẹbue, Andrea da re imọẹ eva bi ọria nin ele ko wẹnna man Mary. Ele da yẹ munhẹn ha luẹ Baibo. Ẹghe nọn hi ki rẹ khin nin Mary rẹ dọ man Andrea Baibo, Angela nọn i daghe nin obhio aba Andrea ki wo ha ka ele ehọ. Mary bhọ bha lẹn ọnan. Ẹdọkpa, Angela da taman Andrea nọn taman Mary nọn dọ ha man ọle Baibo. Angela wo hoẹmhọn ebi ọle ha luẹ. Bhi ẹkẹ uki ọkpa, Angela da wo luẹ Baibo ne bunbun ọbhi uhọnmhọn, sẹyẹ, ọle da yẹ ha guanọ nin Mary dọ ha man ọle Baibo igba enẹn bhi ẹkẹ uzana. Ẹghe-ẹghe Angela rẹ wo ha noo ifoni rẹ deba bhi ikolo oga, sẹyẹ Andrea hi ọne wo ha rẹkpa ọle rẹ lu iriọ.

Ẹghe nọn hi ki rẹ khin nin Mary rẹ ha luẹ Kristine Baibo, ọdọ Kristine natiọle Joshua ki mundia sikẹ ele. Beji Mary ki lẹn ọnan, ọ da nọọn ọlẹn si ọ dẹ yẹẹ ọle rẹ deba ele bhi ọne iluẹmhin. Ọkpakinọn, Joshua da yọle, “Imẹn dẹ ka ibha ehọ, sokpan hẹi nọọn mẹn inọnta soso; uwẹ ha nọọn mẹn inọnta, mẹn ki sibhi enan re.” Bhi ihuẹnlo isẹn nin ele sẹ gbe bhi ọne iluẹmhin, ọle bhọ da nọọn ọta gbera okhuo ọle nin Kristine, ọle da yẹ ha guanọ nan munhẹn ha man ọle Baibo.

Inọnta nọn lẹkhẹ nin Mary nọọn da re ọle ha mhọn ẹbho ne bunbun nin ọle manlẹn Baibo. Beji a miẹn ene ẹbho nin ọle man ele Baibo ki bunbun, ọle da mhanmhanlẹn nin ibhio mhan eso deba ọle ha man ele Baibo. Ẹbho ne bun sẹbhi 28, ọle Mary munhẹn ha man ele Baibo bhi agbaẹbho enẹn kẹkẹ.

Jasmin, nọn yi ọria ọhẹnhẹn nin Mary ka munhẹn ha man ọle Baibo, da mianmẹn bhi Epre 2021. Bhi Mee 2022, Kristine da mianmẹn, yẹ fikie diọbhi Philippines dọ deba azagba-uwa nọnsọle. Itue eva ne luẹ Baibo nin Kristine rẹman Mary da yẹ mianmẹn. Uki eso ki gbera nin Kristine mianmẹn, Angela da mianmẹn. Ọle yẹ lu iwẹnna ọkanẹfan ọsi ẹghe rebhe nian. Joshua nọn yi ọdọ Kristine bi ọmọn okhuo nọnsọle natiọle Andrea, bi eria nekẹle ne yẹ wo ha luẹ Baibo wo ha lu re alo bhi iluẹmhin Baibo nọnsele, yẹ manman ha sikẹ Jehova.

Bhi ẹghe nọnsi Jesu bi etuegbe nesọle, ẹbho ne bunbun wo ha taman azagba-uwa nọnsele, bi imọẹ ele ebi ele luẹle rẹji Jesu. (Jọni 1:​41, 42a; Iwẹn. 10:​24, 27, 48; 16:​25-33) Dọnmhegbe ha nọọn ene uwẹ man ele Baibo, bi eria ebhebhe ne ho nin ele luẹ Baibo ọne inọnta nan, “Uwẹ be lẹn ọria soso nọn ho nin ọle luẹ Baibo?” Ahamiẹn uwẹ nọọn inọnta nọn sẹnian, asabọmiẹn uwẹ dẹ miẹn ẹbho ne bunbun nin ho nin ele ha luẹ Baibo.