Ẹhi Nọnsi Jehova Da Gbega Hẹzẹkaya

Agbaẹbho ọsi Asiria sẹ wo khọn ulin-uwa igbe ọsi Izrẹl miotọ. Bhi ejayenan nian, Sinakẹrib nin ojie ọsi Asiria da yẹ ha guanọ nin ọle khọn ulin-uwa eva ọsi Juda miotọ. Bhiriọ, ọle da munhẹn ha khọn ene agbaẹbho ne ribhi Juda miotọ ọkpa-ọkpa. Ọkpakinọn, agbaẹbho nin ọle manman ha guanọ nin ọle khọn miotọ da ha yi Jerusalẹm. Ebi Sinakẹrib bha lẹn, ọle hi ghe Jehova wo ha gbega Jerusalẹm.

Hẹzẹkaya nin ojie ọsi Juda da ha Sinakẹrib udede igho beji ọle ha da zẹ Jerusalẹm obọ. Arẹmiẹn Sinakẹrib re ọne igho, ọle da sẹyẹ je eyokhọnlẹn nesọle ne manman mhọn ahu ha khian Jerusalẹm ne dọ khọn ọlẹn. Ofẹn da wo ha mun ẹbho ne nyẹnlẹn bhi Jerusalẹm beji eyokhọnlẹn ọsi Asiria rẹ wo manman ha sikẹ ele. Hẹzẹkaya da ki taman ene ẹbho yọle: ‘Bha hẹi ji ofẹn ha mun bha. Ẹmhọanta nọn ghe ene Asiria ziẹnmhin, ọkpakinọn, Jehova dẹ rẹ mhan ziẹn gbera ele.’

Sinakẹrib da je ukọ nọnsọle natiọle Rabshakẹ ha khian Jerusalẹm, nin ọle dọ re ene ẹbho ha zọojiẹ. Rabshakẹ da mundia bhi odalo ọne agbaẹbho yẹ reso yọle: ‘Jehova i da sabọ rẹkpa bha. Bha hẹi ji Hẹzẹkaya hiẹ bha. Osẹ i ribhọ nọn ha sabọ miẹn bha fan bhi obọ mhan.’

Hẹzẹkaya da ki dọ nọọn Jehova ebi ọle ha lu yẹ. Jehova da taman ọlẹn yọle: ‘Hẹi ji ofẹn ha mun uwẹ ranmhude ebi Rabshakẹ tale. Sinakẹrib i da sabọ khọn Jerusalẹm miotọ.’ Ọnin ki gbera, Sinakẹrib da gbẹnẹn ilẹta ji Hẹzẹkaya. Bhi ene ilẹta, ọle da yọle: ‘Bha degbere nin mhan, ranmhude Jehova i da sabọ hinmhin bha.’ Hẹzẹkaya da nan erọnmhọn yọle: ‘Huẹan Jehova, hinmhin mhan, beji ọrebhe ha da lẹn ghe uwẹ ọkpa gene Osẹnobulua ọsi ẹmhọanta.’ Jehova da taman ọlẹn yọle: ‘Ọnojie ọsi Asiria i da sabọ nabhi Jerusalẹm. Mẹn dẹ gbega agbaẹbho nọnsẹmhẹn.’

Sinakẹrib da wo rẹọbhọ ghe, Jerusalẹm dẹ kẹ ha yi ọsọle. Ọkpakinọn, ukpasọn ọkpa, Jehova da je ẹhi nọnsọle diọbhi eji eyokhọnlẹn nesi Asiria da mun agọ sikẹ Jerusalẹm. Ọne ẹhi da gbono eyokhọnlẹn 185,000 a! Iriọ eyokhọnlẹn ne wolo ọsi Sinakẹrib rẹ fuẹn an. Sinakẹrib bha yẹ lẹn ebi ọle ha lu yẹ, bhiriọ, ọle da ki ha khian uwa. Jehova da gbega Hẹzẹkaya bi Jerusalẹm, beji ọle vele. Sade uwẹ ribhi Jerusalẹm bhi ọne ẹghenin, uwẹ ha be rẹ mun udu nyan Jehova?