Jehova Da Re Iziẹngbe Ne Jona Lu Emhin

Ẹbho ne i mhẹn wo vuọn agbaẹbho ọsi Nenivẹ. Jehova da taman Jona nin akhasẹ nin ọle ha khian agbaẹbho ọsi Nenivẹ, nin ọle dọ taman ene ẹbho nin ele fidenọ. Ọkpakinọn, Jona bha ka yo. Ọle da nabhi okọ ha khian Tashish.

Beji ele rẹ khian-khian bhi okpẹdẹ, efi ọsi ọhanabẹ da wo ha fi. Ọnan da wo re ofẹn ha mun ene gua ọne okọ. Ele da nan erọnmhọn ji osẹ nọnsele yẹ nọọn ọlẹn yọle: ‘Bezẹle nin ọnan da ha sunu ji mhan?’ Jona da ki taman ele yọle: ‘Mẹn zẹle nin ọne emhin nan da ha sunu. Mẹn bha ka yo uhọnmhunje nin Jehova je mẹn le. Bha mun mẹn fiọbhi ọne okpẹdẹ. Bha ha lu iriọ, ọne efi ki lọre.’ Ene gua ọne okọ bha rẹ ha guanọ nin ele mun ọlẹn fiọbhi ọne ẹdẹ. Ọkpakinọn, Jona da wo ha taman ele nin ele lu iriọ. Ẹghe nin ele ki rẹ mun ọlẹn fiọbhi ẹkẹ ọne ẹdẹ, ọne efi da lọre.

Jona da rẹ ha riale ghe ọsọle fo sẹsẹsẹ. Beji ọle rẹ manman ha gberuẹ bhi ẹkẹ ọne ẹdẹ, ọle da nan erọnmhọn ji Jehova. Jehova da je udede ehẹn bu ọle. Ọne ehẹn da so Jona lọlọ, ọkpakinọn, ọ bha gbe ọle a. Ẹghe nin Jona rẹ ha ribhi ẹkẹ ọsi ọne ehẹn, ọle da nan erọnmhọn ji Jehova yọle: ‘Mẹn dẹ wo ha hẹnmhọn nin uwẹ ẹghe rebhe.’ Jehova da wo gbega Jona bhi ikpẹdẹ ea nin ọle gbe bhi ẹkẹ ọsi ọne ehẹn, sẹyẹ, Jehova da lu ọle nin ọne ehẹn kpa ọle fiọbhi otọ nọn ka.

Beji a miẹn Jehova miẹn Jona fan, ọnin ki be rẹman ghe ọle i yẹ da yo Nenivẹ? Eye. Jehova da gbo kie taman Jona nin ọle ha khian enin. Bhi ọne ẹghe nan, Jona da lu ebi a taman ọlẹn. Ọle da diọbhi enin, yẹ taman ene ẹbho ne i mhẹn yọle: ‘Bhi ikpẹdẹ 40 nian, a dẹ dunmhun Nenivẹ a.’ Ọkpakinọn, ebi Jona bha rẹ re ẹlo ọi da sunu. Ibhokhan Nenivẹ da re ehọ ọbhi ebi Jona ha taman ele, yẹ fidenọ. Ọnojie ọsi Nenivẹ da taman ẹbho nesọle yọle: ‘Bha sotie Osẹnobulua, bha ha yẹ fidenọ. Iriọ a ha da miẹn ọle i da fuẹn mhan an.’ Jehova ki daghe ọle ghe ene ẹbho fidenọ, ọle bha ye fuẹn ele a. 

Ẹkẹ da ha khọ Jona ghe a bha yẹ dunmhun ọne agbaẹbho a. Ria ẹmhọn nan ghe: Jehova wo mhọn iziẹngbe bi itohan da Jona, ọkpakinọn, Jona bha ha mhọn itohan da ibhokhan Nenivẹ. Ọle da sibhi ọne agbaẹbho re dọ dotua bhi odotọ ebi a kọle nin ebe nọnsole diabe ebe ọsi uko. Ọkpakinọn, ọne ebi a kọle da yu. Ọnan da wo rẹ ẹkẹ ha khọ Jona. Bhiriọ, Jehova da taman ọlẹn yọle: ‘Ẹmhọn ọne ebi a kọle nan wo rẹtẹ uwẹ gbera ibhokhan Nenivẹ. Itohan mẹn mhọn da ele. Ọnin zẹle mẹn bha fuẹn ele a.’ Be Jehova ha tẹmhọnlẹn? Ebi Jehova ha tẹmhọnlẹn hi, ẹmhọn ẹbho nesi Nenivẹ lu uhọnmhọn-emhin gbera ebi a kọle nọn hi ki rẹ khin.