Josaya Wo Hoẹmhọn Uhi Nọnsi Osẹnobulua

Ikpe elẹnlẹn Josaya ha ye beji ọle kiẹn ojie ọsi Juda. Bhi ọne ẹghe nin, ene ẹbho da ha ga ẹbọ yẹ lu ilọnmhọn idunan. Beji Josaya ha ribhi ikpe 16, ọle da luẹ rẹ ha ga Jehova bhi uwedẹ nọn gbale. Ọle ki ribhi ikpe 20, ọle da munhẹn ha dunmhun ene ẹbọ bi ene ukhuo-izọese ne ribhi ọne otọ a. Ọle ki ribhi ikpe 26, ọle da mhanmhanlẹn nan rẹ hẹnhẹn uwa oga nọnsi Jehova.

Hikaya nin ojohẹn da miẹn ebe nan khili nan gbẹn Uhi nọnsi Jehova ọi bhi ẹkẹ ọne uwa oga. Asabọmiẹn, ọne Mozis tobọle gbẹn khọnan. Shefan nin akọwe ọsi ọnojie da mun ọne ebe nan khili ji Josaya, yẹ munhẹn ha tie ọle dagbare. Beji Josaya rẹ ha kaehọ, ọle da dọ kere ghe, ene ẹbho bha zẹwẹ ha re obọ rẹkhan uhi nọnsi Jehova bhi ẹkẹ ikpe ne bunbun nian. Josaya nin Ojie da ki taman Hikaya yọle: ‘Ẹkẹ mhan manman ha khọ Jehova. Dọ nanlẹn talọ. Jehova dẹ taman mhan ebi mhan ha lu yẹ.’ Jehova da noo Huda nin akhasẹ rẹ nin ele talọ. Ọle da yọle: ‘Ibhokhan Juda fikekegbe mẹn. Mẹn dẹ re oya nin ele. Ọkpakinọn, ọ i yi bhi ẹghe ọsi Josaya, ranmhude ọle mhọn idegbere.’

Josaya ki họn ọne ẹmhọn nan nin Huda tale, ọle da diọbhi uwa oga, yẹ si ibhokhan Juda koko. Ọle da tie ọne ebe Uhi man ene ẹbho rebhe. Josaya bi ene ẹbho da ve ghe, ele dẹ ha re ọkhọle rebhe rẹ hẹnmhọn nin Jehova.

Bhi ẹkẹ ikpe ne bunbun nian, ibhokhan Juda bha yẹ ha lu Iluemhin Ọsi Anagbera. Ọkpakinọn, ẹghe nin Josaya ki rẹ kere bhi ọne ebe Uhi ghe, ọkhẹke nan ha lu ọne iluemhin ukpe-ukpe, ọle da taman ọrebhe bhi ọne agbaẹbho yọle: ‘Mhan de lu ọne Anagbera nin Jehova yọle nin mhan ha lu.’ Josaya da mhanmhanlẹn nan rẹ re elanmhẹn ne bunbun zọese ji Jehova, yẹ zẹ ẹbho ne bunbun ne ha so illo bhi uwa oga. Ene ẹbho da gene lu ọne Iluemhin Ọsi Anagbera. Ele ki lu ọle fo, ele da yẹ lu Iluemhin Ọsi Ibrẹd Nọn I Huẹ na bhi ikpẹdẹ ihinlọn. Rẹ na bhi ẹghe ọsi Samuẹl ha vade, a bha kie re inian lu Iluemhin Ọsi Anagbera. Josaya wo gene hoẹmhọn Uhi nọnsi Osẹnobulua. Ọ be yẹẹ uwẹ rẹ ha luẹ ẹmhọn Jehova?