Ive Nin Jẹfta Vele

Ibhokhan Izrẹl da gbo zẹ Jehova obọ dọ ha ga ẹbọ. Ẹghe nin ibhokhan Amọn rẹ dọ ne ibhokhan Izrẹl khọnlẹn, ẹbọ nin ele ha ga bha sabọ rẹkpa ele. Ranmhude ọnan, bhi ẹkẹ ikpe ne bunbun, ibhokhan Izrẹl da ha loya. Akizẹbue, ele da taman Jehova yọle: ‘Mhan lu emhin ebe. Huẹan, hinmhin mhan bhi obọ eghian mhan.’ Bhiriọ, ibhokhan Izrẹl da dunmhun ẹbọ nesele a, yẹ kie munhẹn ha ga Jehova. Jehova bha guanọ nin ọle daghe ọle ghe ele loya.

A da zẹ ọkakulo ọkpa natiọle Jẹfta, nin ọle sun ibhokhan Izrẹl ne ha dọ khọn ibhokhan Amọn. Jẹfta da taman Jehova yọle: ‘Uwẹ ha rẹkpa mhan rẹ khọn miotọ bhi ọne okhọnlẹn nan, mẹn vele ghe, imẹn ha sẹbhi uwa, ọria ọhẹnhẹn nọn dagbare dọ tuẹ mẹn, mẹn ki re ọle nin uwẹ.’ Jehova da kaehọ erọnmhọn ọsi Jẹfta, yẹ rẹkpa ọle rẹ khọn miotọ.

Ẹghe nin Jẹfta ki rẹ sẹbhi uwa, ọmokhuo nọnsọle hi ọria ọhẹnhẹn nọn dagbare dọ tuẹ ọle. Ọle da ha gbikhiẹn yẹ khue okosẹ. Ọne ọmọn nan ọkpa ọle mhọn. Be Jẹfta ha ki lu yẹ nian? Ọle da ye ive nin ọle vele re, yẹ yọle: ‘Eo ọmọn! Uwẹ gbe mẹn an. Mẹn ve ive ji Jehova. Nin mẹn rẹ mun ọlẹn sẹ, mẹn dẹ re uwẹ ha khian uwa oga nọn ribhi Shailo, nin uwẹ dọ ha ga bhi enin.’ Ọne ọmọn da taman ọlẹn yọle: ‘Aba, uwẹ ha ve ive ji Jehova, ọkhẹke nin uwẹ mun ọlẹn sẹ. Ebi mẹn guanọ nin uwẹ lu nin mẹn hi, nin uwẹ re otọ nin mẹn rẹ dọ deba imọẹ mẹn nin ikhuo gbe uki eva bhi okhun oke. Imẹn ha ki na enin vae, mẹn ki ha khian uwa oga.’ Bhi enin, ọle da re ẹdagbọn iẹnlẹn nọnsọle rẹ ga Jehova, ọle da wo re ọkhọle rebhe rẹ ha ga Osẹnobulua. Imọẹ ọle da ha rẹnẹ ji ọle bhi Shailo ukpe-ukpe.