Jehova Da Ne Samuẹl Talọ

Ẹlai nin Ojohẹn da ha mhọn imikpea eva. Ohẹn ele ha khin bhi uwa oga. Họfnai bi Finẹhaz a tie ele. Ele bha ha re obọ rẹkhan uhi nesi Jehova, sẹyẹ, ele da ha lu ibhokhan Izrẹl khọlọ. Ene ẹbho ha mun elanmhẹn re nin ele rẹ zọese ji Jehova, Họfnai bi Finẹhaz ki mun ene mhẹn nẹ bhọ rẹ kiẹn ọsele. Arẹmiẹn Ẹlai họn ebi imọn nesọle ha lu, ọle bha lu emhin soso. Jehova dẹ be re otọ nin ene emhin nan rẹ wo ha sunu khian?

Arẹmiẹn Samuẹl bhọ khere nẹ Họfnai bi Finẹhaz, ọle bha ha re egbe khọkhọ ele. Ẹmhọn Samuẹl da wo ha ti Jehova bhọ. Ẹdọkpa, ẹghe nin Samuẹl rẹ ha wẹ bhi ọsasọn, ọle da họn ghe ọria tie elin ọlẹn. Ọle da kpanọ runẹ bu Ẹlai, yẹ yọle: ‘Ghe mẹn bhi enan!’ Ọkpakinọn, Ẹlai da yọle: ‘Mẹn bha tie uwẹ. Dọ nowẹ.’ Samuẹl da dọ nowẹ. Samuẹl da kie họn ghe a tie ọle. Ẹghe nin Samuẹl ki rẹ kie họn ọne urulu ugba-ọzea, Ẹlai da lẹnmhin ghe Jehova hi ọnọn tie Samuẹl. Bhiriọ, ọle da taman samuẹl ghe, ọle ha họn ghe ọne urulu kie tie ọle, ọle ha taman ọlẹn yọle: ‘Eo Jehova, ne mẹn talọ. Ọguọmhandia nọnsẹ ka uwẹ ehọ’.

Bhiriọ, Samuẹl da kie dọ nowẹ. Ọle da họn ọne urulu yọle: ‘Samuẹl! Samuẹl!’ Ọle da wanniẹn yọle: ‘Ne mẹn talọ, ọguọmhandia nọnsẹ ka uwẹ ehọ.’ Jehova da taman ọlen yọle: ‘Taman Ẹlai ghe imẹn dẹ re oya nanlẹn bi azagba-uwa nọnsọle. Ọle lẹnmhin ghe imọn nesọle lu emhin ebe bhi ẹkẹ uwa oga nọnsẹmhẹn, sokpan, ọle bha lu emhin soso.’ Ọsewewiẹ, Samuẹl da dọ tuje ene odẹ ne ribhi ẹkẹ uwa oga a, beji ọle ka wo lu khẹ. Sokpan, ofẹn da ha mun ọlen rẹ taman ọne ojohẹn ebi Jehova tale. Ọkpakinọn, Ẹlai da datie ọle, yẹ nọọn ọlẹn yọle: ‘Ọmọn nọnsẹmhẹn, be Jehova taman uwẹ yẹ? Ta emhin rebhe man mẹn nin ọle taman uwẹ.’ Bhiriọ, Samuẹl da ki taman Ẹlai emhin rebhe nin Jehova taman ọlẹn.

Jehova da wo nin Samuẹl dia beji ọle rẹ ha wanre. Ọrebhe bhi otọ Izrẹl da ki dọ lẹn ghe, Jehova zẹ Samuẹl nin ọle ha yi ọbhuohiẹn bi akhasẹ.