19 JẸFTA BI ỌMOKHUO NỌNSỌLE
Ele Da Mun Ive Nin Ele Ve Sẹ Arẹmiẹn Ọ Bha Lẹkhẹ
IBHOKHAN Izrẹl da gbo fikekegbe Jehova ha ga osẹ ebhebhe. Ranmhude ọnan, bhi ẹkẹ ikpe 18, Jehova da re otọ nin ibhokhan Amọn rẹ ha denyẹnyẹn ele. (Judg. 10:8) Akizẹbue, ẹbho nesi Osẹnobulua da fidenọ. Ele da dunmhun ẹbọ nọnsele a yẹ fikie bu Jehova. Ọ bha sẹ bue gbe nin ibhokhan Izrẹl lu ọnan fu, ibhokhan Amọn da sikoko bhi otọ Giliẹd nin ele rẹ mun okhọnlẹn bu ibhokhan Izrẹl.
Ene ewanlẹn bhi otọ Giliẹd da taman okpia ọkpa natiọle Jẹfta nin ọle vae dọ sun ele bhi ọne okhọnlẹn nan. Ranmhude ibhio Jẹfta bha lu ọle nọnsẹn, ọle zẹle nin Jẹfta da ka kpanọ sibhi otọ Giliẹd re. Asabọmiẹn ene ibhio Jẹfta nan deba ene ewanlẹn ne ha ribhi otọ Giliẹd. Ọle be ha khọẹkẹ ranmhude emhin nin ele lu ọle le? Eye. Jẹfta da ka nin ọle rẹ vae dọ deba ele khọnlẹn. Bhi ẹghe nin ọle rẹ vae, ọle da ka dọnmhegbe nin ọle rẹ ne ibhokhan Amọn ta ọne ẹmhọn ọbhi ekpẹn. Ọle da je ukọ bu ojie ọsi Amọn. Ọle da gbotọle fanọn an man ọlẹn ebezẹle nọn bha da khẹke nin ọle ha khọn ọbhi otọ ọsi Izrẹl. Ebi Jẹfta tale rẹman ghe ọle lẹn ebi Jehova rẹ mun ọne otọ nin ibhokhan Izrẹl yẹ, bi ebi ọle rẹ rẹkpa ele yẹ rẹ khọn eghian ele ne nẹga ele miotọ. Ọkpakinọn, ojie ọsi Amọn bha ka re ehọ ọbhi ebi ọle tale. Ọle da wo ha guanọ nin ọle mun okhọnlẹn bu ibhokhan Izrẹl!
Beji Jẹfta ki rẹ ha muegbe ọne okhọnlẹn, ẹlinmhin nọnsi Jehova da nanlẹn dia. Bhiriọ, Jẹfta bha dobọ bhi ẹghe nin ọle rẹ ve ive je Jehova ghe: “Ahamiẹn uwẹ rẹkpa mẹn khọn ibhokhan Amọn miotọ, ọria nọn hi ki rẹ khin nọn dagbare bhi uwa nọnsẹmhẹn dọ tuẹ mẹn bhi ẹghe nin mẹn ha rẹ fikiere bhi ọne okhọnlẹn bhi ọfure, dẹ ha yi ọsi Jehova, mẹn ki re ọne ọria lu izọese nan tuẹ a.”
Ebi Jẹfta tale be rẹman ghe ọle dẹ gene re eranlẹn rẹ tuẹ ọria a? Eye. Emhin nin Jehova hele nọn nan rẹ re ọria zọese. Ọle bhọ taman ẹbho nesọle nin ele hẹi lu emhin ebe nọn sẹriọ. (Deut. 18:10, 12) Sokpan, ebi Jẹfta ha tẹmhọnlẹn hi, ọria ọhẹnhẹn nọn ha dagbare bhi uwa nọnsọle, dẹ ha yi ọsi Jehova. Ebi ọnan mundia nan hi, ọne ọria ki re iẹnlẹn nọnsọle rebhe ha ga Jehova. Asabọmiẹn uwa oga nọn ribhi Shailo ọne ọria ha da ha lu ọle. Jẹfta lẹnmhin ghe, asabọmiẹn ọ dẹ nọghọ ọle rẹ mun ọne ive nan sẹ, ranmhude, ukpọmọn ọkpa sẹsẹ ọle mhọnlẹn. A dẹ yẹ sabọ miẹn ọne ọmọn nọnsọle nan ha ka dagbare dọ tuẹ ọle sade ọle fikiere bhi ọne okhọnlẹn.
Beji Jẹfta ki ve ọne ive je Jehova fo, ọle da ha khian ọne okhọnlẹn. Ọle da re izebhudu sun ikpia nesọle ha khian ọne okhọnlẹn. Jehova da wo manman rẹkpa ele! Ele da fuẹn eghian nọnsele a, yẹ dunmhun agbaẹbho 20 ọsi Amọn a, bi ẹbho rebhe ne ribhọ.
Ọnan ki sunu fo, Jẹfta da re eghọnghọn vae bhi uwa. Asabọmiẹn ọle da ha riale ghe ọguọmhandia nọnsọle hi ọria ọhẹnhẹn nọn ha ka dagbare bhi uwa nọnsọle dọ gbobokhian nanlẹn. Ọkpakinọn, ọ bha sunu beji ọle rẹ mun ọkhọle ọi. Ọmokhuo nọnsọle hi ọria ọhẹnhẹn nọn ka dagbare bhi uwa. Ọle da ha gbikhiẹn yẹ khue okede! Ọnan da wo manman ba Jẹfta bhi egbe rẹ sẹbhọ ghe, ọle da nyaghan ukpọn nọnsọle a, yẹ ha viẹ yọle: “Eo ọmọn nọnsẹmhẹn! Uwẹ re imẹn udu ha, ranmhude, uwẹ ki dọ kiẹn ọne imẹn sun fia.”
Jẹfta bi ọmokhuo nọnsọle da ha mhọn ive nin ele ha munsẹ. Ọkpakinọn, ọ bha lẹkhẹ nin ele rẹ mun ọlẹn sẹ
Ọmọn nọnsi Jẹfta lẹnmhin ghe emhin dẹ wo fidenọ bhi iẹnlẹn nọnsọle ranmhude ive nin aba ọle vele. Ọle dẹ re iẹnlẹn nọnsọle rebhe rẹ ha lu iwẹnna nọnsi Jehova. Ranmhude ọnan, ọle i da bọ ọdọ la biẹ imọn. Bhi ẹlo ọsi ikhuo ne ribhi otọ Izrẹl, ọnan i zẹwẹ mhẹn bhi ẹlo hiehie. Ọrẹyiriọ, ọmokhuo ọsi Jẹfta da re izebhudu taman aba ọle yọle: “Ahamiẹn uwẹ ve ive ji Jehova, lu da mẹn beji uwẹ vele.” Ọle da taman aba ọle nin ọle re ẹghe nanlẹn beji ọle ha da deba imọẹ ọle lu akhiẹ, ranmhude, ọle i da yẹ bọ ọdọ la biẹ imọn.
Ọmokhuo nọnsi Jẹfta bha ha khu ọbhi ọsi egbe ọle ọkpa. Ọle da re izebhudu man. Ranmhude ọnan, ukpe-ukpe, ikhuo ne ribhi otọ Izrẹl ki ha rẹnẹ je ọle. Ele ki gbe ikpẹdẹ enẹn bhi eji ọle ye. Ele ki ha re ikoudure nanlẹn yẹ khuẹnmhẹn ọlẹn bhi ebi ọle lu. Ọle wo miẹn elele bhi iwẹnna nin ọle ha lu bhi uwa oga. Asabọmiẹn ọne ẹghe nan Samuẹl nin obhokhan rẹ ha ga bhi enin. Ọmokhuo nọnsi Jẹfta be man Samuẹl emhin yẹ ha ziẹn ọle udu beji ọle rẹ wanre? Mhan bha lẹn. Ahamiẹn ọle lu iriọ, ọnan dẹ wo manman re ọle ha ghọnghọn, beji a miẹn ọle i mhọn ọmọn nọnsọle. Mhan lẹnmhin ghe ẹbho eso wo ha lu ilọnmhọn oghẹ bhi uwa oga bhi ọne ẹghe nin. (1 Sam. 2:22) Ọmokhuo ọsi Jẹfta be deba ele ha lu ilọnmhọn oghẹ? Eye. Baibo bhọ yọle ghe: “Ọ bha nin okpia nowẹ ghẹdẹ.”
Ẹghe nin Pọl nin odibo rẹ ha tẹmhọn ikpia bi ikhuo ne ha mhọn urẹọbhọ nọn ziẹnlẹn, ọle yẹ tẹmhọn Jẹfta. (Hib. 11:32) Jẹfta bi ọmokhuo nọnsọle wo re ijiẹmhin nọn gbale ọbhi otọ rẹji nan rẹ ha mhọn izebhudu. Jẹfta da khọn nin ẹbho nesi Osẹnobulua. Ọmokhuo nọnsọle da re obọ ọle bhọ. Ele veva da kugbe mun ive nin ele ve ji Jehova sẹ, arẹmiẹn ọ bha lẹkhẹ!
Tie ọne okha bhi Baibo:
Judges 10:15, 16; 11:1-40
Inọnta:
Uwedẹ nela Jẹfta bi ọmokhuo nọnsọle rẹ re izebhudu man?
Manman Guanọ Otọle
1. Emhin nela rẹman ghe ọ i yi okhọnlẹn ọkpa ibhokhan Amọn ha ne ibhokhan Izrẹl khọnlẹn, sokpan, ele yẹ dọnmhegbe nin ele rẹ re ele zobọ bhọ rẹ ha ga Jehova? (it “Jẹfta” ¶6) 1
Ifoto 1: “Ele da ne ene ẹbọ rebhe sibhi otọ nọnsele re yẹ ha ga Jehova.”—Judg. 10:16
2. Be re Jẹfta ve ive ji Jehova? Be ọnan rẹ diabe ọsi Jekọp yẹ? (it “Jẹfta” ¶11)
3. Bezẹle nọn bha da lẹkhẹ nin Jẹfta rẹ mun ive nin ọle ve sẹ? (w17.04 4 ¶6)
4. Bhi egbẹghe ukpe 1180 B.C.E. a rẹ biẹ Samuẹl nin akhasẹ. Be rẹman ghe ẹghe ọkpa Samuẹl bi ọmokhuo ọsi Jẹfta rẹ ko ha ga bhi uwa oga? (it “Jẹfta” ¶2; fẹ “Rẹ Na Bhi Ẹghe Ọsi Enọk Dọ Sẹbhi Ẹghe Ọsi Samuẹl” ghe.)
Ria Eria Nyan Emhin Nin Uwẹ Luẹle
Ahamiẹn ene biẹ ọmọn re izebhudu man bọsi Jẹfta, be ọ ha rẹ rẹkpa imọn nesele yẹ?
Ene ikhuo bhi otọ Izrẹl da ha re ikoudure nin ọmokhuo ọsi Jẹfta yẹ rẹkpa ọle rẹ ha mhọn izebhudu. Be Kristiẹn ẹlẹnan ha rẹ sabọ re egbe khọkhọ ene ikhuo nin yẹ? 2
Ifoto 2
Be uwẹ ha rẹ sabọ re egbe khọkhọ Jẹfta bi ọmokhuo nọnsọle yẹ bhi uwedẹ nin ele rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Jẹfta bi ọmokhuo nọnsọle le sade a riọ ele kpanọ bhi uu?
Sẹyẹ Fẹ Ene Emhin Nan Ghe
Be ijiẹmhin ọsi ọmokhuo ọsi Jẹfta ha rẹ sabọ rẹkpa Kristiẹn ne bha sẹ bọ ọdọ la re okhuo?
Noo Isẹhoa Nin Uwẹ Mhọn Nọnsẹn Sade Uwẹ Bha Sẹ Bọ Ọdọ La Re Okhuo (5:15)
Fẹ ebi ijiẹmhin ọsi Jẹfta bi ọmokhuo nọnsọle man mhan le rẹji ebi mhan ha rẹ ha mhọn asun-rẹkhan da Jehova yẹ.
“Mhan Dẹ Miẹn Elele Bhi Obọ Jehova Sade Mhan Sun Rẹkhan Ọlẹn” (w16.04 5-9)