Emhin Ọhan-ilo Nọn Sunu Bhi Okpẹdẹ Nọn Gian

Ẹghe nin Fero ki rẹ họn ghe ibhokhan Izrẹl sibhi otọ Ijipt re, ọle da fi ọkhọle denọ. Ọle da taman ekakulo nesọle yọle: ‘Bha dọ muno awẹnẹwẹnẹ nesẹmhẹn re, nin mhan rẹ khu rẹkhan ele! Mhan i rẹ ji ele da kpanọ.’ Ọle bi ene ikpea da khu rẹkhan ibhokhan Izrẹl.

Jehova da tobọle ha sun ẹbho nesọle. Ọle da ha noo adudu-amẹn bhi ọsodanmhẹn, yẹ noo eranlẹn bhi ọsasọn rẹ sun ele. Ọle da sun ele diọbhi Okpẹdẹ Nọn Gian, yẹ taman ele ghe nin ele mun agọ bhi enin.

Ibhokhan Izrẹl da ki daghe Fero bi eyokhọnlẹn nọnsọle khu ele vade. Ọne okpẹdẹ da ha ri ele bhi odalo, sẹyẹ, eyokhọnlẹn ọsi Ijipt da ha ri ele bhi ikeke. Ele da ha viẹ yẹ taman Mozis yọle: ‘Ele dẹ gbe mhan an! Uwẹ ha rẹ wo zẹ mhan obọ bhi Ijipt.’ Ọkpakinọn, Mozis da yọle: ‘Bha hẹi ji ofẹn mun bha. Bha ziẹngbe, bha dẹ daghe ebi Jehova ha rẹ hinmhin bha yẹ.’ Mozis wo gene mun udu nyan Jehova. Ọ be yi iriọ?

Jehova da taman ene ibhokhan Izrẹl nin ele sibhi ọne agọ re. Bhi ọne asọn nin, Jehova da lu ọle nin ọne adudu-amẹn dọ ha ribhi adesẹ eji ibhokhan Ijipt bi eji ibhokhan Izrẹl ye. Obọ nin ibhokhan Ijipt ye da so ebiuki a, sokpan, ẹfua da ha ribhi obọ nin ibhokhan Izrẹl ye.

Jehova da ki taman Mozis ghe nin ọle niẹn obọ nọnsọle a diọbhi ọne okpẹdẹ. Sẹyẹ, Jehova da lu ọle nin okpahoho fi bhi ọne asọn nin rebhe. Ọne okpẹdẹ da wa yi eva, amẹn da ha ribhi obọ veva, odẹ da ha ribhi adesẹ ọle. Ene ibhokhan Izrẹl rebhe da sabọ khian na otọ nọn kale diọbhi obọle nọnkẹle. Amẹn nọn diabe ogbe da ribhi obọ veva nọnsele.

Eyokhọnlẹn nesi Fero da rẹkhan ibhokhan Izrẹl nabhi ọne okpẹdẹ nan wa yi eva. Jehova da si ozughu ọbhi ẹwẹ ene eyokhọnlẹn. Oẹ ọsi awẹnẹwẹnẹ nọnsele da munhẹn ha banọn kua. Ene eyokhọnlẹn da ha so yọle: ‘Bha ji mhan sibhi enan re. Jehova hi ọnọn khọn nin ele.’

Jehova da ki taman Mozis yọle: ‘Niẹn obọ nọnsẹ a diọbhi ọne okpẹdẹ.’ Bhiriọ, ọne ẹdẹ nọn rẹ diabe ogbe bhi obọ veva da re osukpa fikiere gue ibhokhan Ijipt. Fero bi eyokhọnlẹn nesọle da yuno. Ọria soso bhi ẹwẹ ele bha miuhọnmhọn.

Bhi obọ nọnkẹle ọsi ọne okpẹdẹ, ene ibhokhan Izrẹl da ha so illo rẹ gẹn Jehova yọle: ‘So illo ji Jehova ranmhude, ọle hi ọnọn ke okhun nẹ. Ọle re ọne akasi bi ọnọn hẹn ọlẹn ruẹ bhi okpẹdẹ.’ Ene ẹbho ki ha so ọne illo, ene ikhuo da ha gbikhiẹn yẹ khue ọkẹgan. Ele rebhe da ha ghọnghọn ghe ele i yẹ yi igbọn.