Ebi A Ha Luẹ Bhi Obọle Nọnzi 5

Uki eva ki gbera beji ibhokhan Izrẹl fan ọne Okpẹdẹ nọn Gian ra fo, ele da sẹbhi Oke ọsi Sanai. Bhi enin, Jehova da deba ele ve akovẹn. Ọne akovẹn hi, nin ele rẹ ha yi agbaẹbho kpataki nọnsọle. Ọle da ha gbega ele yẹ ne emhin rebhe nin ele guanọ nin ele. Ọle da re manna nin ele ha le, lu ọle nin ukpọn nọnsele hẹi fafa a, yẹ re egbe fu ele re bhi ije kẹkẹ nin ele da mun agọ. Ahamiẹn aba la inẹn uwẹ khin, rẹkpa ọmọn nọnsẹ rẹ lẹn ebezẹle nin Jehova da gbuhi kẹkẹ nin ibhokhan Izrẹl, lu ọle nin ele ha mhọn ibọkpọ ọsi oga, sẹyẹ, nin ele ha mhọn ohẹn. Gbotọle fanọn an man ọlẹn ebezẹle nọn da lu uhọnmhọn-emhin nin ọria rẹ ha lu rẹkhan ebi ọle tale, ha mhọn idegbere, yẹ sun rẹkhan Jehova ẹghe rebhe.