Oya Nọnzi Igbe

Mozis da taman Fero ghe ọle i da yẹ kie vae dọ miẹn ọlẹn. Ọkpakinọn, ọkuẹsẹ ọle kpanọ, ọle da taman Fero yọle: ‘Bhi ọsasọn ogiziẹn, ọmọndiọn ọsi ibhokhan Ijipt rebhe dẹ yu, rẹ na ọmokpea ọdiọn ọsi Fero rẹ dọ sẹbhi ọmokpea ọdiọn ọsi ibhokhan Ijipt rebhe.’

Jehova da taman ibhokhan Izrẹl ghe ebale ọkpa ribhọ nin ele ha le, ọne ebale dẹ ha yi emhin kpataki rẹji ele. Ọle da yọle: ‘Bha gbe ogho-ohuan la obhukhọ nọn ribhi ukpe ọkpa a. Bha fianmhẹn aranlẹn nọnsọle ọbhi okhun odẹ nan da nabhi uwa nọnsẹbha. Bha tọn ọne elanmhẹn, bha ha re ọle le brẹdi nọn bha huẹ. Bha ne ukpọn yọ, yọ ibata, yẹ muegbe nin bha rẹ kpanọ. Mẹn dẹ fan bha fia bhi ọne asọn nan.’ Ria ebi ọnan ha rẹ wo re ibhokhan Izrẹl ha ghọnghọn yẹ.

Bhi ọsasọn ogiziẹn, ẹhi nọnsi Jehova da sẹbhi uwa rebhe ne ribhi otọ Ijipt. Ọne ẹhi da gbono imikpea ọdiọn a ne ribhi uwa nan bha aranlẹn re iyaman ọi. Ọne ẹhi bha nabhi ene uwa nan re aranlẹn re iyaman ọi. Imikpea ọdiọn rebhe ne ribhi uwa ọsi ibhokhan Ijipt da yuno, rẹ na bhi azagba-uwa ọsi ene fele rẹ dọ sẹbhi ọsi ene ibhioguele. Sokpan, ọmọn soso ọsi ibhokhan Izrẹl bha yu.

Ọmokpea ọsi Fero bhọ da yu. Ọ da wo manman ba Fero bhi egbe rẹ sẹbhọ ghe, ọle da re ẹjẹje taman Mozis bi Erọn yọle: ‘Bha kpanọ. Bha sibhi enan re. Bha dọ ga Osẹnobulua nọnsẹbha. Bha ne elanmhẹn nesẹbha rẹkhan egbe!’

Uki wo vuọn bhi ọne asọn nin ibhokhan Izrẹl rẹ sibhi Ijipt re. Azagba-uwa azagba-uwa bi ulin-uwa ulin-uwa, ọle ele rẹ re usun kpanọ. Ikpea ne ribhọ da ha yi 600,000, ikhuo bi imọn ne bunbun da yẹ ha ribhi ẹwẹ ele. Ẹbho ne bunbun ne i yi ibhokhan Izrẹl da yẹ rẹkhan ele kpanọ, beji ele ha da sabọ deba ele ga Jehova. Bhi ọkike ọle, ibhokhan Izrẹl da miẹn umiẹnfan!

Ibhokhan Izrẹl da ha le ọne ebale kpataki ukpe-ukpe, nin ele rẹ ha yere ebi Jehova rẹ miẹn ele fan yẹ. Ele da ha tiọle, Iluemhin Ọsi Anagbera.