Oya Ehan Ne Rẹkhan Oya Ea Nin Ọhẹnhẹn

Mozis bi Erọn da bu Fero dọ taman ọlẹn ebi Osẹnobulua tale, ele da yọle: ‘Ahamiẹn uwẹ bha ji ẹbho nesẹmhẹn da kpanọ, mẹn ki je ikhiẹn ne le ọria, nin ele vẹru otọ nọnsẹ.’ Ikhiẹn ne le ọria da vẹ nabhi uwa ọsi ibhokhan Ijipt rebhe, rẹ dọ sẹbhi uwa ọsi ene fele bi ene ibhioguele. Ene ikhiẹn da vuọn ọne otọ rebhe. Ọkpakinọn, ene ikhiẹn bha ha ribhi otọ ọsi Goshẹn, nin ibhokhan Izrẹl da nyẹnlẹn. Rẹ na bhi ọne oya nọnzi enẹn nan rẹ ha khian, ibhokhan Ijipt ọkpa ele ki ha sunu je, ele bha yẹ ha sẹ ibhokhan Izrẹl egbe. Fero da ha bhii yọle: ‘Bhii Jehova nin ọle khu ene ikhiẹn nan kua. Ẹbho nesẹ sabọ rẹ kpanọ.’ Ọkpakinọn, beji Jehova ki lu ọle nin ene ikhiẹn tino kua, Fero da fi ọkhọle denọ. Ẹghe be ribhọ nin Fero ha rẹ lu ebi Jehova taman ọlẹn nin ọle lu?

Jehova da yọle: ‘Ahamiẹn Fero bha ji ẹbho nesẹmhẹn da kpanọ, emhin-uri ọsi ibhokhan Ijipt ki munhẹn ha khọnmhọn, sẹyẹ, ele ki yuno.’ Bhi ukpẹdẹ nọn rẹkhan ọlẹn, ene emhin-uri da munhẹn ha yuno. Ọkpakinọn, emhin soso bha lu emhin-uri ọsi ibhokhan Izrẹl. Ọrẹyiriọ, Fero da sẹyẹ re zeze a, ọle bha ji ibhokhan Izrẹl da kpanọ.

Bhiriọ, Jehova da taman Mozis nin ọle fikie bu Fero, sẹyẹ, nin ọle bọnmhẹn ẹmọn ọbhi ahoho. Ọne ẹmọn da kiẹn ẹbubu. Ọne ẹbubu da vuọn ahoho yẹ tue ibhokhan Ijipt bhi egbe. Ọne ẹbubu da re emhin ha muno ibhokhan Ijipt bi elanmhẹn nọnsele bhi egbe, iriọ ọne emhin yẹ rẹ wo ha ba. Ọnan rẹ sunu, Fero bha ka ji ibhokhan Izrẹl da kpanọ.

Jehova da ki je Mozis fikie nin ọle dọ taman Fero yọle: ‘Uwẹ sẹyẹ yọle ghe uwẹ i da ji ẹbho nesẹmhẹn da kpanọ? Ewiẹ, esia dẹ ha de.’ Bhi ukpẹdẹ nọn rẹkhan ọlẹn, Jehova da lu ọle nin esia, avan bi eranlẹn na bhi okhun vae. Ibhokhan Ijipt bha sẹ miẹn unan emhin nọn sẹriọ khẹ. Eran bi emhin nin ele kọle rebhe da yuno, sokpan, ene ribhi Goshẹn bha yuno. Fero da yọle: ‘Bhii Jehova nin ọle re ọkpẹnlẹn ọbhi ọnan! Ẹghenin, bha sabọ rẹ ha khian.’ Ọkpakinọn, Jehova ki wo re ọkpẹnlẹn ọbhi ọne esia bi ọne amẹn nọn ha rọlọ fo, Fero da fi ọkhọle denọ.

Mozis ki da yọle: ‘Bhi ejayenan nian, iriso dẹ le eran bi ilunmhun nesẹbha nin esia gbe kẹre.’ Usun iriso da le emhin rebhe ne kẹre bhi ugbo nọnsele bi bhi eran nọnsele. Fero da ha bhii yọle: ‘Bhii Jehova nọn vẹ ene iriso kua.’ Jehova rẹ vẹ ene iriso kua fo, Fero da sẹyẹ re zeze a.

Jehova da taman Mozis yọle: ‘Niẹn obọ nọnsẹ diọbhi okhun.’ Osukpa, okhun rebhe da so ebiuki a. Bhi ẹkẹ ikpẹdẹ ea, ibhokhan Ijipt bha sabọ daghe emhin soso, la ọria soso. Ibhokhan Izrẹl ọkpa sabọ ha daghe ẹfua.

Fero ki da taman Mozis yọle: ‘Uwẹ bi ẹbho nesẹ sabọ rẹ kpanọ. Sokpan, bha zẹ elanmhẹn nesẹbha obọ bhi enan.’ Mozis da taman ọlẹn yọle: ‘Mhan dẹ muno elanmhẹn nesẹmhan rẹkhan egbe beji mhan ha da sabọ re ele ze ji Osẹnobulua nọnsẹmhan.’ Ọnan da wo manman re ẹkẹ khọ Fero. Ọle da reso yọle: ‘Si mẹn bhi ẹlo re! Mẹn ha kie zẹlo miẹn uwẹ, mẹn ki gbe uwẹ a.’