Oya Ea Nin Osẹnobulua Ka Re Nin Ibhokhan Ijipt

Ibhokhan Ijipt da ha re Ibhokhan Izrẹl rẹ lu iwẹnna ne manman kaka. Jehova da je Mozis bi Erọn bu Fero nin ele dọ taman ọlẹn yọle: ‘Ji ẹbho nesẹmhẹn da kpanọ nin ele da dọ ga mẹn bhi ojẹgbo.’ Ranmhude itengbemun ọsi Fero, ọle da yọle: ‘Ebi Jehova tale bha rẹtẹ mẹn, sẹyẹ, mẹn i da ji ibhokhan Izrẹl da kpanọ.’ Bhiriọ, Fero da kie re ele manman ha lu iwẹnna nọn kaka. Ọ da khẹke nin Jehova re obọ mun Fero. Be ọle ha rẹ lu ọnan yẹ? Ọle da re Oya Igbe nin ibhokhan Ijipt le. Jehova da taman Mozis yọle: ‘Fero bha ka mẹn ehọ. Ọle dẹ ha ribhi Ẹdẹ Nai bhi ọsewewiẹ. Dọ taman ọlẹn ghe, beji a miẹn ọle bha ji ẹbho nọnsẹmhẹn da kpanọ, Ẹdẹ Nai dẹ kiẹn aranlẹn.’ Mozis da bu Fero beji Jehova taman ọlẹn. Isira Fero Erọn rẹ re ukpokpo nọnsọle gbe bhi Ẹdẹ Nai. Ọne ẹdẹ da kiẹn aranlẹn. Ọne ẹdẹ da ha ya, ehẹn ne ribhọ da yuno, sẹyẹ, amẹn nọn ribhọ bha yẹ ji ele ha wọn. Ọrẹyiriọ, Fero bha ji ibhokhan Izrẹl da kpanọ.

Ikpẹdẹ ihinlọn ki gbera, Jehova da je Mozis fikie bu Fero nin ọle dọ taman ọlẹn yọle: ‘Ahamiẹn uwẹ bha ji ẹbho nesẹmhẹn da kpanọ, akilẹ ki vuọn otọ Ijipt rebhe.’ Erọn ki khua ukpokpo nọnsọle okhun, akilẹ da vuọn ọne otọ rebhe. Akilẹ da vuọn uwa ọsi ene ẹbho, bẹdi nọnsele, bi ukpamaku nọnsele. Akilẹ da wo vuọn ijerebhe! Fero da taman Mozis nin ọle bhii Jehova nọn re ọkpẹnlẹn ọbhi ọne oya. Ọle da yọle ghe ọle dẹ ji ibhokhan Izrẹl da kpanọ. Jehova da gene re ọkpẹnlẹn ọbhi ọne oya. Ene ibhokhan Ijipt da mhaan ene akilẹ ọbhi otọ ekhun-ekhun. Ijerebhe da wo ha ya bhi otọ Ijipt. Sokpan, Fero bha yẹ ji ene ẹbho da kpanọ.

Bhiriọ, Jehova da taman Mozis yọle: ‘Erọn dẹ re ukpokpo nọnsọle gbe ọbhi otọ, bhiriọ, ẹbubu ne ribhọ ki kiẹn ituntun.’ Ituntun da wo re osukpa vuọn ijerebhe. Ẹbho eso nesi Fero da ha taman ọlẹn yọle: ‘Obọ Osẹnobulua ọne oya nan na vae.’ Ọrẹyiriọ, Fero bha ji ibhokhan Izrẹl da kpanọ.