Ọne Ẹwẹ Nọn To

Ikpe 40 Mozis gbe bhi otọ Midian. Ọle da re okhuo yẹ biẹ imọn. Ẹdọkpa, ẹghe nin ọle rẹ ha re ihuan nesọle kọn bhi egbegbe oke ọsi Sanai, ọle da daghe emhin nọn han ọle ilo. Ọle da daghe ẹwẹ igbẹn nọn mun eranlẹn, sokpan, ọ bha tuẹ a! Mozis ki khian sikẹ ọne ẹwẹ beji ọle ha da daghe ebezẹle nọn bha da tuẹ a, ọle da họn ukpuru bhi ọne ẹwẹ yọle: ‘Mozis! Hẹi sikẹ enan. Kuẹ ibata ranmhude otọ nọn khiale uwẹ da mundia.’ Jehova noo ẹhi rẹ ha nanlẹn talọ.

Ofẹn da ha mun Mozis, bhiriọ, ọle da re emhin gue ẹlo. Ọne uru da yọle: ‘Imẹn daghe oya nin ibhokhan Izrẹl le. Mẹn dẹ hinmhin ele bhi obọ  ibhokhan Ijipt yẹ ne ele ha khian otọ nọn mhẹn. Uwẹ hi ọnọn ha sun ẹbho nesẹmhẹn sibhi otọ Ijipt re.’ Uwẹ bha be riale ghe ọnan dẹ wo han Mozis ilo?

Mozis da nọọn yọle: ‘Be mẹn ha tayẹ sade ẹbho nọọn mẹn họla je mẹn?’ Osẹnobulua da wanniẹn ọlẹn yọle: ‘Taman ele ghe Jehova, nin Osẹnobulua ọsi Ebraham, Osẹnobulua ọsi Aiziki bi Osẹnobulua ọsi Jekọp je ẹ.’ Mozis da ki yọle: ‘Ahamiẹn ene ẹbho bha rẹọ mẹn bhọ ki?’ Jehova da lu emhin rẹ rẹkpa Mozis rẹ lẹn ghe ọle dẹ rẹkpa ọle. Ọle da taman Mozis ghe nin ọle re ukpokpo nin ọle re mhọn fi ọbhi otọ. Mozis ki lu iriọ, ọne ukpokpo da kiẹn ẹnyẹn! Mozis ki mun ọne ẹnyẹn mhọn bhi ukperunmhun nọnsọle, ọ da gbo kiẹn ukpokpo. Jehova da yọle: ‘Uwẹ ha lu ọne emhin ọhan-ilo nan, ọ ki rẹman ghe imẹn je ẹ.’

Mozis da yọle: ‘Imẹn i guẹ rẹ talọ nọnsẹn.’ Jehova da taman ọlẹn yọle: ‘Imẹn dẹ taman uwẹ ebi uwẹ ha ta, sẹyẹ imẹn dẹ je Erọn nin obhio uwẹ nọn rẹkpa ẹ.’ Mozis ki lẹn ghe Jehova gene nanlẹn dia, ọle da re okhuo ọle bi imọn nesọle fikie ha khian Ijipt.