A Riọ Jesu Kpanọ Bhi Uu

Beji Jesu yu fo, okpea ọkpa nọn manman fe natiọle Josẹf da taman Pailet nin ọle re otọ nanlẹn rẹ mun ekuegbe nọnsi Jesu sibhi okhun oran re. Josẹf da re ukpọn linẹn nọn mhọn-ose rẹ gbanọ ekuegbe nọnsi Jesu, yẹ re emhin nọn viohin rẹ gbo ọle. Ọle da mun ọlẹn ọbhi idin nan la hian, yẹ re udede udo rẹ gue ọle. Ene ojohẹn da taman Pailet yọle: ‘Mhan riale ghe edibo nesi Jesu dẹ dọ mun ekuegbe nọnsọle, yẹ ha yọle ghe ọle riọ kpanọ bhi uu.’ Bhiriọ, Pailet da taman ele yọle: ‘Bha gbega ọne idin.’

Ọ ki ribhi ikpẹdẹ ea, ikhuo eso da vae bhi eji a da re Jesu tọ bhi ọsewewiẹ. Ele da kere ghe a wẹnẹ ọne udo sibhi unun ọsi ọne idin re. Ẹhi ọkpa da na bhi ẹkẹ ọne uhio taman ene ikhuo yọle: ‘Bha hẹi ji ofẹn mun bha. A riọ Jesu kpanọ bhi uu. Bha dọ taman edibo nesọle nin ele dọ miẹn ọlẹn bhi Galili.’

Meri Madalin da tuabe dọ guanọ Pita bi Jọni. Ọle da taman ele yọle: ‘Ọria mun ekuegbe nọnsi Jesu kpanọ!’ Pita bi Jọni da runẹ ha khian ọne idin. Ele ki sẹbhi enin, ele da kere ghe ọria soso i yẹ ribhi ẹkẹ ọle. Bhiriọ, ele da fikie ha khian uwa.

Ẹghe nin Meri ki rẹ fikie ha khian eji ọne idin ye, ọle da ke ẹhi eva re bhi enin. Ọle da taman ele yọle: ‘Mẹn bha lẹn eji ele mun Ebeanlẹn mẹn ha khian.’ Ọle da ki daghe okpea ọkpa. Ranmhude ọle rẹ ha riale ghe ọnọn gbẹloghe ọne ogba nọn, ọle da yọle: ‘Ọwanlẹn, huẹan taman mẹn eji uwẹ mun ekuegbe nọnsọle ha khian.’ Ọkpakinọn, ẹghe nin ọne okpea ki rẹ yọle, “Meri!” ọle da wo re osukpa lẹn ghe Jesu nọn. Ọle da reso yọle: “Ọman-emhin!” yẹ gba ọle mun mhọn. Jesu ki da taman ọlẹn yọle: ‘Ha khian dọ taman ibhio mẹn ghe uwẹ miẹn mẹn.’ Ẹjẹje, Meri da runẹ bu edibo nesi Jesu dọ taman ele ghe ọle miẹn Jesu.

Akizẹbue bhi ọne ukpẹdẹ nin, eva bhi edibo nesi Jesu da na bhi Jerusalẹm ha khian Ẹmeyọs. Beji ele rẹ khian, okpea ọkpa da deba ele, yẹ nọọn ele ebi ele zilo ọle. Ele da yọle: ‘Uwẹ bha be họn ebe sunu? Nẹnsẹdẹa, ene ojohẹn da gbe Jesu a. Bhi ejayenan nian, ikhuo eso tale ghe ọle riọ kpanọ!’ Ọne okpea ki da nọọn ele yọle: ‘Ibha bha be rẹọbhi ebe ene akhasẹ tale? Ele yọle ghe Kristi dẹ yu, sẹyẹ, ọle dẹ riọ kpanọ bhi uu.’ Ọne okpea da wo ha gbotọ Ebenọnkhiale fanọn an man ele. Ele ki sẹbhi Ẹmeyọs, ene edibo da taman ọne okpea nin ọle nin ele dia. Ẹghe nin ọne okpea ki rẹ nan erọnmhọn ọbhi ebale emuan nin ele ho nin ele le fo, ọle ele rẹ lẹn ghe, Jesu hi ọne okpea. Bhiriọ, ọle da horiẹ ze ele obọ.

Ene edibo veva da runẹ ha khian uwa nin etuegbe nesi Jesu da sikoko bhi Jerusalẹm. Ele da taman ene etuegbe ebe sunu. Beji ele rẹ ribhi ọne uwa, Jesu da zegbere man ele. Bhi ọsi ọhẹnhẹn, ene etuegbe bha rẹọbhọ ghe Jesu nọn. Bhiriọ, Jesu da taman ele yọle: ‘Bha ghe obọ nọnsẹmhẹn; bha re obọ so ọle. A ka gbẹn ọlẹn bhi otọ ghe ọne Kristi dẹ riọ kpanọ bhi uu.’