Jesu Da Zegbere Man Ikpea Ne Gbe Ehẹn

Ẹgheso ki gbera beji Jesu zegbere man ene etuegbe fo, Pita da zẹ nin ọle rẹ dọ gbe ehẹn bhi Okpẹdẹ Ọsi Galili. Tọmọs, Jemis, Jọni, bi edibo eso da rẹkhan ọlẹn. Ele da re asọn rebhe rẹ guanọ ehẹn, ọkpakinọn, ele bha miẹn ehẹn gbe.

Ẹdẹ ki we, ele da daghe okpea ọkpa bhi egbegbe ọne ẹdẹ. Ọle da sotie ele yẹ nọọn ele yọle: ‘Ibha be miẹn ehẹn gbe?’ Ele da taman ọlẹn yọle: “Eye!” Ọne okpea ki da taman ele yọle: “Bha fi ọgan diọbhi obera ọsi ọne okọ.” Ele ki gene lu iriọ, ehẹn da vuọn ọgan nọnsele rẹ sẹbho ghe, ele bha sabọ si ọle dagbare bhi ẹkẹ ọne ẹdẹ. Osukpa Jọni rẹ wo lẹn ghe Jesu nọn. Bhiriọ, ọle da yọle: “Ebeanlẹn mhan nọn!” Ẹjẹje, Pita da san fiọbhi ọne ẹdẹ, yẹ gua ha khian egbegbe ọle. Etuegbe nekẹle da gua ọne okọ rẹkhan ọlẹn.

Ele ki sẹbhi egbegbe ọne ẹdẹ, ele da daghe brẹdi bi ehẹn nan ne ka bhi eranlẹn. Jesu da taman ele nin ele ne eso bhi ehẹn nọnsele ba ene ka ribhi eranlẹn. Ọle da yẹ taman ele yọle: ‘Bha vae nin mhan le ebale.’

Ele ki le ebale fo, Jesu da nọọn Pita yọle: ‘Uwẹ be hoẹmhọn mẹn gbera ehẹn nan gbe?’ Pita da yọle: ‘Ehe, Ebeanlẹn mẹn, uwẹ lẹnmhin ghe mẹn hoẹmhọn uwẹ.’ Jesu ki da yọle: ‘Re ebale nin ihuan nesẹmhẹn le.’ Jesu da gbo kie nọọn Pita yọle: ‘Uwẹ be hoẹmhọn mẹn?’ Pita da yọle: ‘Ebeanlẹn mẹn, uwẹ lẹnmhin ghe mẹn hoẹmhọn ẹn.’ Jesu da yọle: “Gbẹloghe ibhi ihuan nesẹmhẹn.” Jesu da nọọn ọlẹn ọne inọnta bhi ọsi ugba ọzea. Ọnan da wo manman ba Pita bhi egbe, bhiriọ, ọle da yọle: ‘Ebeanlẹn mẹn, uwẹ lẹn emhin rebhe. Uwẹ lẹnmhin ghe mẹn hoẹmhọn ẹn.’ Jesu da yọle: “Re ebale nin ibhi ihuan nesẹmhẹn le.” Ọle da yẹ taman Pita yọle: “Wo ha rẹkhan mẹn.”