A Da Gbe Jesu A Bhi Eji A Tiọle Gọgota

Ene ojohẹn da re Jesu ha khian uwa ọsi gọvanọ. Pailet da nọọn ele yọle: ‘Be ọne okpea nan lu yẹ?’ Ele da yọle: ‘Ọle yọle ghe ojie ọle khin!’ Pailet ki da nọọn Jesu yọle: “Uwẹ be hi ojie ọsi ibhokhan Ju?” Jesu da wanniẹn ọlẹn yọle: “Ejele nọnsẹmhẹn bha deba ọsi ọne agbọn nan.”

Bhiriọ, Pailet da je Jesu bu Hẹrọd nọn gbẹloghe ibhokhan Galili, nin ọle fẹghe si ọle dẹ miẹn emhin soso nọn bha gba bhi egbe Jesu. Hẹrọd bha miẹn emhin ebe soso bhi egbe Jesu, bhiriọ, ọle da je Jesu fikie bu Pailet. Pailet ki da taman ene ẹbho yọle: ‘Imẹn bi Hẹrọd bha miẹn emhin ebe soso bhi egbe ọne okpea nan. Mẹn dẹ fan ọlẹn fia.’ Ene usun ẹbho da reso yọle: ‘Gbe ọle a! Gbe ọle a!’ Ene eyokhọnlẹn da re asan gbe Jesu, tuno ẹsẹn nyan ọlẹn, yẹ ha fino ọlẹn emhin. Ele da re igbẹn rẹ lu ukparu-ojie mun ọlẹn bhi uhọnmhọn, yẹ ha re ọle zojiẹ yọle: ‘Zaiki, ojie ọsi ibhokhan Ju.’ Pailet da gbo kie taman ene ẹbho yọle: ‘Mẹn bha miẹn emhin ebe soso bhi egbe ọne okpea nan.’ Ọkpakinọn, ele da reso yọle: “Khan ọlẹn ọbhi oran!” Bhiriọ, Pailet ki da mun ọlẹn nin ene usun ẹbho nin ele gbe ọle a.

Ele da mun Jesu ha khian eji a tiọle Gọgota. Bhi enin, ele da khan ọlẹn ọbhi oran, yẹ mun ọne oran mundia. Jesu da nan erọnmhọn yọle: ‘Aba, rẹhunmhan ele ranmhude ele bha lẹn ebi ele lu.’ Ẹbho da re Jesu ha zojiẹ. Ele da ha yọle: ‘Ahamiẹn Ọmọn nọnsi Osẹnobulua uwẹ gene khin, huẹnre bhi ọne okhun oran nan! Hinmhin egbe ẹ.’

Oyi ọkpa nan yẹ khan ọbhi oran sikẹ ọle da yọle: “Ye imẹn re bhi Agbejele nọnsẹ.” Jesu da taman ọne okpea yọle: “Uwẹ dẹ deba imẹn ha ribhi Ogba Ọfubhegbe.” Bhi ọsodanmhẹn, ijerebhe da wo so ebiuki a. Uri agogo ea ọ gbe ọkuẹsẹ ijerebhe kie gbanọn an. Eso bhi edibo nesi Jesu rẹ dọ sẹbhi Meri nin inẹn ọlẹn, da mundia sikẹ eji a da khan ọlẹn ọbhi oran. Jesu da taman Jọni ghe nin ọle gbẹloghe Meri beji ọle ha rẹ gbẹloghe inẹn ọlẹn.

Bhi ọkike ọle, Jesu da yọle: “Mẹn lu emhin rebhe fo!” Ọle da gbe uhọnmhọn kotọ, yẹ gbẹtin sotọ. Bhi ọne ẹghenin tee, otọ da muvẹa. Ikọtin nan rẹ wa eji Khiale bi eji Khia Nẹ a bhi uwa oga da sọ yi eva. Ọyokhọnlẹn ọkpa da yọle: ‘Ọmọn nọnsi Osẹnobulua gene khọnan.’