Usẹn ọkpa ghe eria ne ha nabhi Kindọn Họọ

ỌTA NIN ELASẸRE NỌỌN

Bezẹle Nọn Da Khẹke Nin Mhan Yo Ikolo Oga bhi Kindọn Họọ?

Igba-eva bhi uzana, ọle Esali Jehova si egbe koko do ikolo oga bhi eji a tiọle Kindọn Họọ. Be sunu bhi enin? Elele nela uwẹ ha miẹn sade uwẹ yo ene ikolo?

Be a lu bhi Kindọn Họọ?

Ẹmhọn ne ribhi Baibo, ọle a luẹ bhi Kindọn Họọ. Ikolo oga nan do bhi enin dẹ sabọ rẹkpa uwẹ:

luẹ ẹmhọanta rẹji Osẹnobulua.
lẹn otọ emhin ne sunu bhi ọne agbọn nan.
nin iẹnlẹn nọnsẹ ha mhẹn ọbhọ.
zẹ imọẹ esili.

Uwẹ be rẹ lẹn? Ranmhude ẹmhọn Agbejele nọnsi Osẹnobulua, ọle a manman zilo ọle bhi ikolo oga ọsi Esali Jehova, ọle zẹle nan da tie uwa ọga nọnsele iKindọn Họo.—Matthew 6:9, 10; 24:14; Luke 4:43.

Bezẹle nọn da khẹke nin uwẹ yo?

Ebi a luẹ bhi enin dẹ sabọ rẹkpa uwẹ. Adia ne ribhi Baibo nan man bhi ene ikolo oga nan, dẹ sabọ rẹkpa uwẹ rẹ “ha mhọn ẹwanlẹn.” (Proverbs 4:5) Ọnan rẹman ghe adia ne ribhi Baibo dẹ sabọ rẹkpa uwẹ rẹ ha zẹ emhin ne mhẹn bhi iẹnlẹn. Bhi enin, uwẹ dẹ yẹ sabọ miẹn ewanniẹn rẹji inọnta kpataki nin uwẹ mhọnlẹn, inọnta bii:

Ọta eso nan rẹman bhi ikolo nin mhan do bhi ẹdẹ iSaturday la Sunday, ele khọnan:

Bezẹle Nọn Da Khẹke Nin Mhan Ha Rẹkhan Adia Ne Ribhi Baibo?
Ejela Mhan Ha Da Sabọ Miẹn Urẹkpa Sade Mhan Ribhi Ọnọghọ?
Ebi Agbejele Nọnsi Osẹnobulua Lu Nin Mhan Nian

“Ẹdẹ ọkpa, mẹn da tie obhokhan ọkpa nin mhan ko ribhi klasi vae bhi ikolo oga nọnsẹmhan. Ọle ki vae, ọle da deba azagba-uwa nọnsẹmhan dotua. Mhan da re ebe ikolo oga nọnsẹmhan nanlẹn. A ki zobọ bhi ikolo oga, ọle da taman mẹn ghe, uwedẹ nin ẹbho rẹ ha re ewanniẹn ọbhi inọnta wo ti ọle bhọ. Ọle da yẹ yọle ghe, ele imhọn ebe nan rẹ luẹ emhin bhi otuẹ nọnsele.”—Brenda.

Uwẹ be rẹ lẹn? Uwẹ ha vae bhi Kindọn Họọ, uwẹ ida haosa ọbhi ọne ikolo. Ọsọhẹ nọn. A ikoko igho bhi enin.

Eria ne ribhi enin dẹ re izebhudu nin uwẹ. Baibo yọle ghe, emhin ọkpa nọn zẹle nin mhan ha da ha si egbe koko hi, ‘nin mhan rẹ ha re izebhudu nin egbe.’ (Hebrews 10:24, 25) Uwẹ dẹ yẹ sabọ deba eria ne hoẹmhọn Osẹnobulua ha muobọ bhi ene ikolo oga nan. Ikolu nọn sẹ inian dẹ sabọ rẹkpa uwẹ bhi ọne agbọn nan nin ọdeọde da khu ọsi egbe ọle.

“Ẹgheso, egbe ki wo lọ mẹn sade mẹn lu ilọnmhọn ukpẹdẹ fo. Sokpan, mẹn ha sẹbhi ikolo oga, ibhio mhan ne ribhi enin ki wo re izebhudu nin mẹn. Mhan ha ki zobo bhi ikolo oga, mẹn ki wo ha ghọnghọn, ahu ki wo do mẹn ọbhọ.”—Elisa.

Uwẹ be rẹ lẹn? Ọ gbera agbotu 120,000 ọsi Esali Jehova ne ribhi ọne otọ agbọn nan rebhe. Kindọn Họọ bi eje ebhebhe nin ele da do ikolo oga gbera 60,000. Kindọn Họọ nọn bun sẹbhi 1,500, ele a bọn ukpe-ukpe ranmhude uwedẹ nin ẹbho ne vae bhi ene ikolo oga rẹ bun ọbhọ.a

Ebi ibo ẹ tale

“Ẹghe nin mẹn sẹyẹ rẹ ha ribhi siku, ọmọẹ mẹn ọkpa da rẹkhan mẹn yo ikolo oga nesẹmhan igba eso. Uwedẹ nin ewanlẹn bi ibhokhan rẹ kugbe ha luẹ iBaibo da wo ti ọle bhọ. Ọ bha sẹ bue gbe, ọwanlẹn nọnsẹmhẹn bhi isi iwẹnna da rẹkhan mẹn vae bhi ikolo oga. Uwedẹ nan rẹ ha re iBaibo man emhin, da wo ti ọle bhọ. Ọnan da wo re ikolo oga nesẹmhan kie manman ha ti mẹn bhọ!”—Jessica.

“Mẹn do kere ghe ikolo oga nesẹmhan rẹkpa mẹn nin mẹn hẹi ha kpokpo egbe ba ẹmhọn iẹnlẹn. Emhin nin mhan luẹ bhi ene ikolo nan rẹkpa mhan rẹ ha nyẹn iẹnlẹn esili, ha yi ọria esili, yẹ ha lu emhin ne mhẹn ne bunbun. Ẹghe nọn hi ki rẹ khin nin mẹn rẹ yo ikolo oga, ahu ki wo do mẹn bhọ, mẹn ki wo ha ghọnghọn.”—Timothy.

“Okpea ọkpa nin mẹn tie vae bhi ikolo oga da yọle: ‘Mẹn rẹ gheghe vae nin mẹn dọ rẹman uwẹ ghe, iman-emhin nesẹbha bha gba. Sokpan, mẹn bhọ da dọ kere ghe iman-emhin nesẹmhẹn, ele bha gba.’ Oyẹẹ nọn ribhi ẹwẹ mhan da wo yẹ ti ọle bhọ. Ọle da yọle: ‘Arẹmiẹn ọhẹnhẹn khọnan nin mẹn vae bhi ikolo oga nọnsẹbha, bha da wo miẹn mẹn ọbhi egbe bii ọria nin bha ka lẹn khẹ!’”—Jacob.

“Ẹgheso, mẹn ki ha riale ghe, a ha wo zobo bhi ikolo, mẹn ki wo re ẹkpa ha khian uwa. Sokpan, ẹghe nan ha rẹ ha do ọne ikolo oga, ọne iria-eria nọn sẹriọ ki wo si egbe kie. A ha ki zobo bhi ọne ikolo oga, mẹn ki wo ha tuẹ ẹbho rebhe nẹga. Mẹn bhọ iyẹ yere ebezẹle nin ọne iria-eria nọn sẹ iriọ da ka na mẹn bhi ọkhọle. Sade ọ iyi ikolo oga nọnsẹmhan nọn, mẹn hẹi rẹ ha mhọn imọẹ ne mhẹn sẹ inian.”—Madison.

a Nin uwẹ rẹ miẹn eje sikẹ uwẹ nẹ nin mhan da do ikolo ọga, diọbhi obọ natiọle “Ikolo Oga Nesẹmhan” bhi ọne wẹbsait nan, uwẹ ha piẹn “Guanọ Eje Sikẹ Ẹ Nẹ.”