ỌTA NIN ELASẸRE NỌỌN
Bezẹle Nọn Da Khẹke Nin Mẹn Ha Nan Erọnmhọn?
Elasẹre ne bunbun yọle ghe ele nan erọnmhọn. Ọkpakinọn, ọ iyi ele rebhe nan erọnmhọn ukpẹdẹ-ukpẹdẹ. Ene bunbun bhi ẹwẹ ele sabọ ha nọọn yọle: ‘Bezẹle nọn da khẹke nin mẹn ha nan erọnmhọn? Emhin nin ọria gheghe lu sade emhin kaka mun ọlẹn erọnmhọn be khin? La emhin ọbhebhe be ribhọ nọn zẹle nin mẹn ha da ha nan erọnmhọn?’
Be bhọ hi erọnmhọn?
Erọnmhọn hi, nan rẹ ne Osẹnobulua nin Aman nọn man emhin rebhe talọ. Ekpẹn nọn khua wo khọnan! Arẹmiẹn ghe Jehova hi ọnọn ke okhun nẹ bhi otọ bi okhun, “ọle bha ree bhi eji ọdeọde bhi ẹwẹ mhan ye.” (Acts 17:27) Baibo bhọ da taman mhan yọle: “Sikẹ Osẹnobulua, ọle ki yẹ sikẹ ẹ.”—James 4:8.
Be imhan ha rẹ sabọ sikẹ Osẹnobulua yẹ?
Uwedẹ ọkpa hi, nin mhan rẹ ha nan erọnmhọn ji ọle. Ọne uwedẹ nan mhan rẹ sabọ ne ọle talọ.
Ọbhebhe hi, nin mhan rẹ ha luẹ iBaibo. Ọne uwedẹ nan Osẹnobulua rẹ ne mhan talọ.
Ahamiẹn mhan nan erọnmhọn ji Osẹnobulua yẹ luẹ iBaibo, mhan ki sabọ deba Osẹnobulua ha mhọn ikolu nọn ziẹnlẹn.
“Ọne isẹhoa nin mhan mhọn nin mhan rẹ ne iJehova nin Osẹ nọn ke okhun nẹ talọ, ọle hi isẹhoa nọn kpọnọ nẹ nin mhan nin eria ha sabọ ha mhọnlẹn.”—Jeremy.
“Mẹn ha nan erọnmhọn ji Jehova rẹ taman ọlẹn ebi emhin gene dia mẹn yẹ bhi egbe, ọ ki wo rẹ mẹn manman sikẹ ọle.”—Miranda.
Osẹnobulua be kaehọ erọnmhọn?
Aharẹmiẹn ghe ọria nọn rẹọ bhi Osẹnobulua uwẹ khin, sẹyẹ, uwẹ nan erọnmhọn ji ọle ẹghe-ẹghe, uwẹ sabọ sẹyẹ ha mhọn edandan si Osẹnobulua gene kaehọ erọnmhọn nin uwẹ nan ji ọle. Ọkpakinọn, Baibo da tie iJehova “Ọnọn họn erọnmhọn.” (Psalm 65:2) Baibo da yẹ taman mhan nin mhan ‘zẹ ekpokpo rebhe nesẹbha obọ nanlẹn, ranmhude ẹmhọn mhan rẹtẹ ọle.’—1 Peter 5:7.
Emhin nin uwẹ ha ria ẹmhọn ọlẹn: Uwẹ ibe ne imọẹ nesẹ talọ ẹghe rebhe? Iriọ ọ yẹ rẹ khẹke nin uwẹ rẹ ha ne Osẹnobulua talọ ẹghe rebhe. Ha nan erọnmhọn ji ọle ẹghe rebhe. Yẹ ha noo elin nọnsọle sade uwẹ nan erọnmhọn. (Psalm 86:5-7; 88:9) Bhi ọsi ẹmhọanta, Baibo bhọ da yọle: “Ha nan erọnmhọn ẹghe rebhe.”—1 Thessalonians 5:17.
“Sade mẹn nan erọnmhọn ji Jehova nin Aba mẹn nọn ribhi okhun, ọ ki wo diabe mẹn bi ọle ko zilo. Mẹn ki wo taan ọkhọle rebhe a man ọlẹn.”—Moises
“Emhin rebhe ne ri mẹn bhi ọkhọle, ele mẹn taman iJehova, beji mẹn rẹ ne inẹn mẹn la ọmọẹ mẹn nọn manman sikẹ mẹn talọ.”—Karen.
Be imẹn ha sabọ ta sade mẹn nan erọnmhọn
Baibo da yọle: “Bhi emhin rebhe, bha ha re erọnmhọn, ubhiimhin bi ekhuẹnmhẹn rẹ taman Osẹnobulua ebi bha guanọ.”—Philippians 4:6.
Ọnan rẹman ghe uwẹ dẹ sabọ nan erọnmhọn rẹ taman Osẹnobulua emhin ne kpokpo uwẹ. Baibo bhọ da yọle: “Mun ihẹ nọnsẹ fi nin Jehova, ọle dẹ rẹkpa ẹ.”—Psalm 55:22.
Ọkpakinọn, ọ iyi emhin ne kpokpo uwẹ ọkpa ọkhẹke nin uwẹ ha taman Osẹnobulua. Ọmanmhẹn ọkpa natiọle Chantelle da yọle: “Ahamiẹn ghe ẹghe nin mẹn rẹ guanọ urẹkpa, ọle ọkpa mẹn rẹ nan erọnmhọn ji Jehova, ọ bha rẹman ghe mẹn gene sikẹ ọle. Mẹn riale ghe ekhuẹnmhẹn hi emhin nọn khẹke nọn kalo bhi erọnmhọn nọnsẹmhẹn. Ọ yẹ khẹke nin mẹn ha mhọn emhin ne bunbun nin mẹn ha khuẹnmhẹn Osẹnobulua ba.”
Emhin nin uwẹ ha ria ẹmhọn ọlẹn: Be hi emhin nin Osẹnobulua sẹ lu nin uwẹ nọn ha re uwẹ ha khuẹnmhẹn ọlẹn? Uwẹ dẹ be sabọ ria ẹmhọn emhin ea ne ha re uwẹ khuẹnmhẹn iJehova ẹlẹnan?
“Emhin ne bunbun, rẹ sẹbhi aroro nọn mhọn-ose dẹ sabọ rẹ mhan nan erọnmhọn ji Jehova rẹ khuẹnmhẹn ọlẹn.”—Anita.
“Ria eria nyan emhin nin Jehova manlẹn nọn ti uwẹ bhọ, la eje eso bhi Baibo nọn manman rẹso uwẹ, uwẹ ha nan erọnmhọn rẹ khuẹnmhẹn ọlẹn bhi ene emhin nan.”—Brian.