Eria Ne Ghanlẹn Ene Dọmanlẹn Khin Bhi Agbotu

Asabọmiẹn uwẹ i yẹ sabọ lu emhin soso ranmhude nin uwẹ ki rẹ munhẹn ha dọmanlẹn. Arẹmiẹn uwẹ sẹ wo ga Jehova bhi ikpe ne bunbun, uwẹ dẹ sabọ dọ ha ghe egbe uwẹ bii ọria nọn i yẹ mhọn ebi a ji a rẹ lu ranmhude idia nin uwẹ ye. Bhi ọsi ijiẹmhin, uwẹ sabọ rẹ dọ ha re emhin nin uwẹ sabọ lu nian rẹ khọkhọ emhin nin uwẹ ka lu khẹ. Ahamiẹn iriọ nọn, be ha sabọ rẹkpa uwẹ beji a ha da miẹn ghe idia nin uwẹ ye bha ha gbe uwẹ ahu sotọ?

EMHIN NIN JEHOVA GUANỌ BHI OBỌ UWẸ

Nọọn egbe ẹ yọle, ‘Emhin nela Jehova guanọ bhi obọ mẹn?’ Ẹmhọn nan gbẹn ọbhi Deuteronomy 6:5 dẹ sabọ ko uwẹ udu re. Enin yọle: “Re ọkhọle nọnsẹ rebhe, egbe nọnsẹ rebhe, bi ahu nọnsẹ rebhe rẹ hoẹmhọn Jehova nin Osẹnobulua nọnsẹ.”

Beji ọne ulọnlẹn nan rẹman, Jehova guanọ nin uwẹ re ọkhọle, egbe, bi ahu nọnsẹ rebhe rẹ ha ga ọle. Ene ọta nan dẹ sabọ rẹkpa uwẹ beji a ha da miẹn ghe, uwẹ bha ha re ebi uwẹ sabọ lu rẹ khọkhọ ebi ẹbho bhebhe lu, la re ebi uwẹ sabọ lu nian rẹ khọkhọ ebi uwẹ ka ha lu khẹ.

Ria ẹmhọn ọnan ghe: Emhin nela uwẹ ha lu nin Jehova beji uwẹ ribhi usẹn? Ahamiẹn ene bunbun bhi ẹwẹ ẹbho nesi Jehova ẹlẹnan ha wanniẹn ọne inọnta nan, ele ki yọle ghe, ele wo ha lu eka nin ele ha sabọ lu nin Jehova. Bhiriọ, eka nin uwẹ ha sabọ lu nin Jehova beji idia nọnsẹ dia, ọle uwẹ wo ha lu nanlẹn bhi ẹghe nin uwẹ rẹ ha ribhi usẹn. Be uwẹ ki sabọ ha lu nin Jehova nian? Asabọmiẹn eka nin uwẹ ha sabọ lu nin Jehova beji idia nọnsẹ dia, ọle uwẹ lu nanlẹn nian. Ahamiẹn uwẹ re ẹlo nọn khẹke rẹ ghe ene emhin nan rebhe, uwẹ ki dọ rẹọbhọ ghe, eka nin uwẹ ha sabọ lu nin Jehova, ọle uwẹ lu nanlẹn nian, beji uwẹ ka rẹ ha lu ọle bhi ẹghe nin uwẹ rẹ ha ribhi usẹn. Eka nin uwẹ ha sabọ lu nin Jehova uwẹ ha lu bhi ọne ẹghe nin, ọle uwẹ yẹ lu nian.

UWẸ DẸ SABỌ NOO ISẸLOBHEMHIN NỌNSẸ RẸ RẸKPA ẸBHO

Ghe emhin ọbhebhe nin uwẹ ha yẹ sabọ ria eria nyan: Nin uwẹ rẹ ha ria eria nyan emhin nin uwẹ i yẹ sabọ lu ranmhude idọmanlẹn, dọnmhegbe ha ria ẹmhọn ebi uwẹ ha rẹ sabọ rẹkpa ẹbho yẹ. Bhi ọsi ẹmhọanta, aharẹmiẹn uwẹ dọmanlẹn, uwẹ dẹ yẹ sabọ ha lu emhin eso nian, nin uwẹ bha sabọ lu beji uwẹ ribhi usẹn. Bhi ọsi ijiẹmhin, uwẹ dẹ sabọ lu ene emhin nan:

Tẹmhọn isẹlobhemhin nọnsẹ man ẹbho. Ria eria nyan ebi Baibo tale bhi ene ulọnlẹn nan:

Devid nin Ojie: “Ẹghe ribhọ nin mẹn rẹ ha yi obhokhan, sokpan ẹghe nan nian mẹn ki dọmanlẹn, Ọkpakinọn, mẹn bha sẹ miẹn ọria nọn khiale nan mun fia, la nin imọn nesọle ha bhii ebale khian.”—Ps. 37:25.

Josua: “Ghọle! Ejayenan nian, mẹn dẹ kẹ yu. Ibha tobọbha re ọkhọle nọnsẹbha rebhe bi egbe nọnsẹbha rebhe lẹn sẹbhọ ghe, ọkpa i ribhi ene ive ne mhẹn rebhe nin Jehova nin Osẹnobulua nọnsẹbha ve nin bha nọn bha munsẹ. Ele rebhe munsẹ nin bha. A bha miẹn ukpọkpa nọn bha munsẹ.”—Josh. 23:14.

Asabọmiẹn uwẹ sẹ ka ta ọta ne dia inian khẹ. Emhin nin Devid bi Josua miẹn bhi iẹnlẹn re ele ta ene ọta nan. Emhin nin ene eguọmhandia nan nesi Jehova sẹ miẹn bhi iẹnlẹn, la emhin nin ele họn bhi ẹkẹ ikpe ne bunbun nian, ọle ele ha tẹmhọnlẹn. Ọnan zẹle nin ọta nin ele tale ha da sabọ re ikoudure nin ẹbho.

Ahamiẹn ghe ọ reele nin uwẹ mọn da ha ga Jehova, uwẹ dẹ yẹ sabọ ha taman ẹbho emhin kẹkẹ nin Jehova sẹ lu nin uwẹ. Uwẹ be yẹ yere ẹghe nin uwẹ rẹ daghe ebi Jehova rẹ rẹkpa ẹbho nesọle yẹ bhi uwedẹ kpataki? Ahamiẹn uwẹ yere, dọnmhegbe ha tale man ẹbho! Ọ dẹ sabọ rẹkpa ele, beji ọ rẹ rẹkpa uwẹ. Bhi ọsi ẹmhọanta, uwẹ dẹ sabọ rẹkpa ibhio ẹ rẹ ha ga Jehova nọnsẹn sade uwẹ re isẹlobhemhin nọnsẹ rẹ rẹkpa ele.—Rom 1:​11, 12.

Uwedẹ ọbhebhe nin uwẹ ha yẹ rẹ sabọ re ikoudure nin ibhio ẹ hi, sade uwẹ dọnmhegbe rẹ ha vae bhi ikolo oga ghe-mẹn-ghe-uwẹ. Ranmhude uwẹ ha lu iriọ, uwẹ dẹ sabọ re ikoudure nin ibhio ẹ. Sẹyẹ, uwẹ ki yẹ miẹn ikoudure. Connie nin mhan ka tẹmhọnlẹn da yọle: “Imẹn ha diọbhi ikolo oga ghe-mẹn-ghe-uwẹ, ọ manman rẹkpa mẹn nin egbe iẹnlẹn hẹi lọ mẹn. Beji a miẹn ghe ibhio mẹn nin ikpea bi ikhuo wo re oyẹẹ man mẹn, egbe iẹnlẹn i da sabọ lọ mẹn. Uwedẹ ọkpa nin mẹn rẹ dọnmhegbe rẹ ha rẹman ibhio mẹn ghe ebi ele lu nin mẹn ti mẹn bhọ hi, imẹn ki ha re obhi emhin rẹ lu ẹsele nin ele. Sẹyẹ, mẹn yẹ wo dọnmhegbe rẹ ha deba ele lu iwẹnna oga kẹkẹ.”

EMHIN REBHE NIN UWẸ LU NIN JEHOVA TI ỌLE BHỌ

Ijiẹmhin ọsi eria ne bunbun wo ribhi Baibo nin Jehova hoẹmhọn ọlẹn, aharẹmiẹn idia nin ele ye bha re otọ nin ele rẹ lu ebi ele rẹ ha guanọ nin ele lu nin Jehova. Ria ẹmhọn obhokhan Izrẹl ọkpa ghe natiọle Simiọn, nọn ki dọmanlẹn. Ẹghe nan rẹ biẹ Jesu ọle rẹ nyẹnlẹn. Bhi ẹghe nin Simiọn rẹ rẹnẹ diọbhi uwa oga, asabọmiẹn ọle wo daghe usẹn ikpea ne wo ha lu iwẹnna kpataki kẹkẹ bhi uwa oga. Be Simiọn ha sabọ ha ria ẹmhọn ọlẹn? Asabọmiẹn Simiọn da ha riale ghe, Jehova i yẹ mhọn ebi ọ ha re ọle lu, ranmhude, ọle i yẹ sabọ ga Jehova nọnsẹn beji ene usẹn ikpea ne ha ribhi uwa oga rẹ ha ga ọle. Ọkpakinọn, ọ i yi iriọ Jehova rẹ ha ghe ọle. Jehova wo ha ghe ọle bii eguọmhandia nọn wo ha ga ọle nọnsẹn, sẹyẹ, Jehova da re ọne isẹhoa nanlẹn rẹ miẹn Jesu bhi ẹghe nan rẹ la biẹ ọle. Rẹ daba ọnin, Jehova da yẹ noo Simiọn rẹ kha akhasẹ rẹji Jesu nọn da ha yi Mezaya bhi ẹghe odalo! (Luk 2:​25-35) Bhi ọsi ẹmhọanta, ọ i yi uwedẹ nin Simiọn rẹ dọmanlẹn Jehova ha ghe, okpea nọn mhọn urẹọbhọ nọn ziẹnlẹn Jehova ha daghe, sẹyẹ, Simiọn “da yẹ ha mhọn ẹlinmhin nọn khiale.”

Uwẹ dẹ yẹ sabọ ha mhọnlẹn bhi ọkhọle ghe, emhin rebhe nin uwẹ lu nin Jehova ti ọle bhọ, aharẹmiẹn uwẹ i yẹ sabọ lu gbera eka nin uwẹ ka lu khẹ. Rẹji Jehova, “emhin nin ahu ọsi ọria gbele, ọle Osẹnobulua guanọ bhi obọ ọle, ọ iyi ebi ahu nọnsọle bha gbe.”—2 Kọr. 8:12.

Bhiriọ, denọ ẹlo ọbhi emhin nin uwẹ sabọ lu nian. Bhi ọsi ijiẹmhin, unan iwẹnna itẹmhọn Osẹnobulua nela uwẹ riale ghe uwẹ dẹ sabọ lu nian, aharẹmiẹn obhi ẹghe khere uwẹ ha rẹ sabọ lu ọle? Uwẹ dẹ be sabọ tie ibhio uwẹ nin bha ko ga bhi ifoni re ikoudure nin ele? La gbẹn emhin ọbhi kadi je ji ele? Ọne uwedẹ nan, nan rẹ re oyẹẹ man dẹ sabọ rẹso ibhio ẹ nin bha ko ga, manman nọn sade ọria nọn reele nin ọle mọn da ha ga Jehova re ọne oyẹẹ nan man ele.

Aharẹmiẹn uwẹ ki dọmanlẹn, uwẹ dẹ yẹ sabọ ha lu eka nin uwẹ ha sabọ lu nin Jehova, yẹ sọnyẹnmhẹn bhi iwẹnna itẹmhọn Osẹnobulua. Fẹ ebe sunu ghe bhi agbaẹbho ọkpa bhi obọ ọsi East Africa, bhi ọne ẹkpẹti nọn yọle, “Obhio Mhan Nin Okhuo Ọkpa Da Noo Baibo Rẹ Rẹkpa Ọria Nọn Rẹ Ha Guanọ Nin Ọle Hoa,” bhi ọne uhọnmhọn-ọta nan.

Lẹn sẹbhọ ghe uwedẹ nin uwẹ sẹ rẹ ga Jehova bi asun-rẹkhan nin uwẹ mhọn dẹ sabọ rẹkpa ẹbho ebhebhe. Uwẹ wo rẹman ghe, ọria nọn mhọn iziẹngbe uwẹ khin. Ha mhọnlẹn bhi ọkhọle ghe, “Osẹnobulua ilu emhin nọn bha gba. Ọle ida ye ẹsọn nin [uwẹ] miẹn nanlẹn an. Ọle ida yẹ ye oyẹẹ [nọnsẹ] a, nin [uwẹ] mhọn da elin nọnsọle bhi uwedẹ nin [uwẹ] rẹ wo situa ha rẹkpa ene khiale.”—Hib. 6:10.

WO HA LU EKA NIN UWẸ SABỌ LU RẸ RẸKPA ẸBHO

Ẹbho ne bunbun dọ luẹ kere ghe, ikpea bi ikhuo ne dọmanlẹn ne yẹ dọnmhegbe rẹ ha rẹkpa ẹbho mhọn egbe nọn daanlẹn, yẹ ria eria nọnsẹn, seyẹ, ele yẹ tọ bhi agbọn.

Bhi ọsi ẹmhọanta, nan rẹ ha lu emhin esili nin ẹbho bha rẹman ghe, ọria i da kuẹlo da ọkakale kẹkẹ nin idọmanlẹn sire. Agbejele nọnsi Osẹnobulua ọkpa ha sabọ re ọkpẹnlẹn ọbhi olukhọ nin mhan le bhi uku bhi obọ Adam, nọn zẹle nin mhan da dọmanlẹn yẹ yu.—Rom 5:12.

Emhin kẹkẹ nin uwẹ lu nin Jehova nian—rẹ dọ sẹbhi uwedẹ nin uwẹ rẹ ha rẹkpa ẹbho rẹ dọ lẹn ọlẹn, dẹ sabọ rẹkpa uwẹ rẹ ha mhọn iruduba nọn ziẹnlẹn, yẹ mhọn egbe nọn daanlẹn. Ibhio mhan ne dọmanlẹn, bha ha mhọnlẹn bhi ọkhọle ghe, emhin rebhe nin bha lu nin Jehova ti ọle bhọ. Sẹyẹ, urẹọbhọ nọnsẹbha manman ti ibhio mhan bhi agbotu bhọ.