UWẸ BE YẸ YERE?
Uwẹ be sẹ re ẹghe ọbhi otọ rẹ tie Ọne Ọkhẹughe kẹkẹ ọsi ọne ukpe nan? Ahamiẹn uwẹ lu iriọ, fẹghe si uwẹ dẹ sabọ re ewanniẹn ọbhi ene inọnta nan:
Emhin nela re mhan re uyi ji Jehova?
Ebezẹle nin mhan da lu iriọ hi, ranmhude mhan hoẹmhọn Jehova yẹ mun ekpẹn nanlẹn. Emhin ọbhebhe nọn zẹle hi, mhan guanọ nin ẹbho dọ lẹn ọlẹn.—w25.01, apapale nọnzi 3.
Ahamiẹn ọria re ẹkẹ khọ mhan, be ha rẹkpa mhan rẹ manman rẹhunmhan ọlẹn?
Ọ bha khẹke nin mhan rẹ ẹlo gbera ebe emhin dia mhan yẹ bhi egbe sade ọria re ẹkẹ khọ mhan; ọrẹyiriọ, mhan ha zẹ rẹ mun ọne ẹmhọn fia yẹ zobọ rẹ ha khọẹkẹ ọne ọria, ọ i da yẹ sabọ ha le mhan kua bhi ẹkẹ egbe.—w25.02, apapale nọnzi 15-16.
Bezẹle nin Mak nin odibo da yi ijiẹmhin esili rẹji ibhio mhan nin ikpea ne yi usẹn?
Mak da re ọkhọle rebhe miẹn ẹsọn nan mun nanlẹn. Arẹmiẹn ọle kuẹlo da emhin nọn ba ọle bhi egbe, nọn ha rẹ sabọ re egbe lọ ọle, ọle bha ka zobọ bhi iwẹnna nan mun nanlẹn. Ọle da deba Pọl bi ibhio ọle nekẹle bhi oga ha lu ọmọẹ.—w25.04, apapale nọnzi 27.
Be Jesu ha tẹmhọnlẹn bhi ẹghe nin ọle rẹ nan erọnmhọn yọle: “Mẹn rẹkpa ele rẹ lẹn elin nọnsẹ”? (Jọni 17:26)
Edibo nesi Jesu bhọ ka lẹn elin nọnsi Osẹnobulua fo. Ọkpakinọn, Jesu da rẹkpa edibo nesọle rẹ manman lẹn elin nọnsi Osẹnobulua nọnsẹn, rẹ dọ sẹbhi iho nọnsọle, iwẹnna obọ nọnsọle, bi ikpẹ esili nin ọle mhọn.—w25.05, apapale nọnzi 20-21.
Ahamiẹn mhan mhọn idegbere, be ọ ha rẹkpa mhan rẹ lẹn?
Ọ dẹ rẹkpa mhan rẹ lẹn ghe mhan bha lẹn emhin eso. Bhi ọsi ijiẹmhin, mhan bha lẹn ẹghe nin ọkpẹnlẹn ha rẹ vae, la ebi Jehova ha rẹ lu emhin yẹ bhi ọne ẹghe nin. Sẹyẹ, mhan bha lẹn ebe ha sunu ewiẹ, mhan bha lẹn ebi Jehova lẹn mhan sẹ yẹ.—w25.06, apapale nọnzi 15-18.
Be ha rẹkpa mhan rẹ sabọ miẹn elele bhi ebe nọnsẹmhan la ọta ogbakha nan rẹman?
Mhan dẹ sabọ nọọn egbe mhan yọle: ‘Emhin nela mẹn daghe nọn ha sabọ rẹkpa ẹbho ne la munhẹn ha luẹ Baibo? Ijiẹmhin esili nela mẹn ha sabọ noo sade mẹn man ọria ọne ẹmhọanta nan? Ọria nela mẹn lẹn nọn ha yẹẹ ọle rẹ luẹ ọne ẹmhọanta nan?’—w25.07, apapale nọnzi 19.
Be mhan miẹn luẹ bhi uwedẹ nin Osẹnobulua rẹ rẹhunmhan, sade mhan ria eria nyan uwedẹ nin ọle rẹ ne Devid lu emhin?
Devid wo lu emhin ebe ne manman kaka. Beji ọle ki re ọkhọle rebhe rẹ fidenọ, Jehova da rẹhunmhan ọlẹn. (1 Ki. 9:4, 5) Ahamiẹn Osẹnobulua rẹhunmhan ọria, ọle i kie ye ọne emhin ebe re, ọle i kie re ọne emhin ebe nin ọne ọria lu rẹ re oya nanlẹn bhi ẹghe odalo.—w25.08, apapale nọnzi 17.
Ahamiẹn emhin ribhọ nọn nọghọ ọria nin uwẹ man ọlẹn Baibo rẹ lẹn otọle, be uwẹ ha sabọ lu yẹ?
Ahamiẹn uwẹ dọnmhegbe rẹ re Baibo man ọria emhin nọnsẹn, sokpan, ebi uwẹ man ọle le bha mun ọle ẹlo kore, uwẹ sabọ rẹ ze eji uwẹ man ọle le obọ fo, uwẹ ha mhanmhanlẹn rẹ fikie vae bhi enin bhi ẹghe ọbhebhe.—w25.09, apapale nọnzi 24.
Baibo rẹman ghe ‘olukhọ hiẹ ọria.’ (Hib. 3:13) Be ọnan rẹ sunu yẹ?
Olukhọ dẹ sabọ re mhan lu emhin ebe. Ọ dẹ sabọ re mhan ha mhọn edandan kẹkẹ. Ọkpa bhọ hi, ọ dẹ sabọ re mhan ha riale si Jehova gene yẹ hoẹmhọn mhan.—w25.10, apapale nọnzi 16.
Emhin ea nela ha rẹkpa mhan rẹ sabọ ha nan erọnmhọn bhi uwedẹ nọn ha rẹ mhan manman sikẹ Jehova?
(1) Ha ria eria nyan ikpẹ esili nesi Jehova. (2) Mhan dẹ sabọ ta ebe kpokpo mhan man Jehova bhi erọnmhọn. Emhin bii, nin ọle rẹkpa mhan rẹ sabọ ha rẹhunmhan. (3) Ọ bha khẹke nin mhan ha re otuo-otua nan erọnmhọn ji Jehova. Ahamiẹn mhan bha re otuo-otua nan eronmhọn ji Jehova, ọ ki rẹkpa mhan rẹ ha ta emhin rebhe nọn ribhi mhan bhi ọkhọle man ọlẹn.—w25.10, apapale nọnzi 19-20.
Be mhan ha rẹ sabọ rẹkpa ibhio mhan ne ki dọmanlẹn yẹ?
Mhan dẹ sabọ rẹnẹ ji ene ki dọmanlẹn la tie ele bhi ifoni. Mhan dẹ yẹ sabọ rẹkhan ele ha khian họspita sade ele khian dọ gbẹloghe egbe. Sẹyẹ, mhan dẹ yẹ sabọ deba ele lu iwẹnna itẹmhọn Osẹnobulua kẹkẹ.—w25.11, apapale nọnzi 6-7.
Emhin nela ọkhẹke nin ẹbho ne ho nin ele bọ egbe lu, beji ele ha da sabọ lu ibọdọ bi ire-okhuo nọnsele rẹ re ogẹn ji Jehova?
Re obọ rẹkhan uhi nin ene gbẹloghe re ọbhi otọ reji ẹmhọn ibọdọ bi ire-okhuo. Ji a miẹn ghe uwedẹ nan ha re lu emhin bhi ẹghe ọne ibọdọ bi ire-okhuo re ikpẹ ọsi ẹlinmhin nọn khiale nọnsi Osẹnobulua man. Re ẹwanlẹn zẹ ukpọn nin uwẹ ha yo, uwẹ ha yẹ rẹban akere-bhi-otọ ne bha diẹn mun ebe ribhi Baibo. Bha ha re ekpẹn talọ beji bha rẹ mhanmhan ibọdọ bi ire-okhuo nọnsẹbha.—w25.12, apapale nọnzi 21-24.