Ibhio Mhan Eva Nan Rẹ Kiẹn Otu Nọn Sun Oga

BHI ikolo ukpe nan do bhi Ọtoba 5, 2024, a da ta ọta kpataki man mhan. A da ji mhan lẹn ghe, a re ibhio mhan nin Jody Jedele bi Jacob Rumph kiẹn Otu Nọn Sun Oga ọsi Esali Jehova. Ọ reele nin ene ibhio mhan nan mọn da ga Jehova.

Bhi Missouri U.S.A. a da biẹ obhio mhan nin Jedele. Ẹkẹ agbotu a da bẹẹ ọle wanre. Agọ nin Esali Jehova i da manman bun ele da ha nyẹnlẹn. Ranmhude ọnan, ọle da wo ha miẹn ibhio mhan kẹkẹ ne na bhi ije kẹkẹ vae bhi ọne agọ dọ ha tẹmhọn Osẹnobulua. Oyẹẹ nọn ha ribhi ẹwẹ ele da wo manman rẹso ọle. Bhi Ọtoba 15, 1983, ọle da mianmẹn. Ọle wo ha sọnyẹnmhẹn bhi iwẹnna itẹmhọn Osẹnobulua. Ẹghe nin ọle ki rẹ yo isiku fo, ọle da munhẹn ha lu iwẹnna ọkanẹfan ọsi ẹghe rebhe bhi Sẹtẹmba 1989.

Ẹghe nin obhio mhan nin Jedele rẹ ha yi obhokhan, ene biẹ ọle wo ha re ọle bi obhio ọle nin okhuo vae bhi Bẹtẹ. Ọnan da wo re ene ibhokhan ha mhọnlẹn bhi emhanmhan rẹ dọ ga bhi Bẹtẹ. Akizẹbue, ele da wo gene mun ọne emhanmhan sẹ. Bhi Sẹtẹmba 1990, ọle obhio mhan nin Jedele vae dọ ha ga bhi Bẹtẹ nọn ribhi Wallkill. Dipatmẹnti Ne Khiẹn-khiẹn Bẹtẹ ọle ka deba ha wẹnna. Akizẹbue, ọle da dọ ha wẹnna bhi dipatmẹnti natiọle Medical Services.

Bhi ọne ẹghe nin, a da mun agbotu kẹkẹ nan da zẹ urolo Spanish gbọ sikẹ Bẹtẹ. Sẹyẹ, a da ha guanọ ibhio mhan nin ikpea ne ha dọ robọkpa bhi ọne agbotu. Bhiriọ, obhio mhan nin Jedele da munhẹn dọ deba ọkpa bhi ene agbotu yẹ ha luẹ ebi a rẹ zẹ urolo Spanish. Akizẹbue, ọle da miẹn obhio mhan nin okhuo natiọle Damaris, nọn lu iwẹnna ọkanẹfan bhi sẹkiut nin obhio mhan nin Jedele ye. Ọ bha sẹ bue gbe, ele veva da bọ egbe yẹ vae dọ ha ga bhi Bẹtẹ.

Bhi 2005, ele da sibhi Bẹtẹ re dọ ha gbẹloghe ene biẹ ele bhi uwa. Bhi ọne ẹghe nin, ele da ha lu iwẹnna ọkanẹfan ọsi ẹghe rebhe. Obhio mhan nin Jedele wo ha rẹkpa man emhin bhi Isiku ọsi Ekanẹfan. Sẹyẹ, ọle da wo ha deba Otu Ewanlẹn Nin Agbotu Je Bu Idọkitọ wẹnna bi dipatmẹnti natiọle Regional Building Committee.

Bhi ukpe 2013, a da kie tie obhio mhan nin Jedele bi okhuo ọle vae bhi Bẹtẹ, nin ele dọ deba bhi Bẹtẹ nan ha bọn bhi Warwick. Rẹ na bhi ọne ẹghe nin ha vade, ele sẹ wo ga bhi Patterson bi Wallkill. Obhio mhan nin Jedele yẹ wo wẹnna bhi dipatmẹnti natiọle Local Design/Construction bi Hospital Information Services. Bhi Mach 2023, a da re ọle kiẹn ọkpa bhi ene rẹkpa Otu Nọn Mhọn Obọ bhi Iwẹnna Itẹmhọn Osẹnobulua. Beji ọle ki ha ria eria nyan iwẹnna kẹkẹ nin ọle lu bhi oga, ọle da yọle: “Ahamiẹn a mun ẹsọn nin ọria miẹn bhi oga, ofẹn sabọ rẹ ha mun ọlẹn. Ọkpakinọn, bhi ọne ẹghe nan ọ rẹ khẹke nin mhan mun udu nyan Jehova, ranmhude, ọle hi ọnọn ha sabọ rẹkpa mhan rẹ lu emhin nin ọle yọle nin mhan lu.”

Agbaẹbho natiọle California, bhi U.S.A. a da biẹ obhio mhan nin Rumph. Beji obhio mhan nin Rumph ribhi obhokhan, inẹn ọlẹn bha ha sasa bhi oga. Ọrẹyiriọ, ọle da wo yẹ dọnmhegbe ha man Rumph ẹmhọanta ne ribhi Baibo. Ukpe-ukpe, obhio mhan nin Rumph ki wo ha rẹnẹ ji odede ọle, nọn yi Ọsali Jehova. Odede ọle da wo rẹkpa ọle rẹ ha mhọn ọne ọkhọle rẹ luẹ Baibo. Beji ọle ki ribhi ikpe 13, ọle da munhẹn ha luẹ Baibo. Bhi Sẹtẹmba 27, 1992, ọle da mianmẹn. Akizẹbue, inẹn ọlẹn da kie munhẹn ha sasa bhi oga, sẹyẹ, aba ọle bi ibhio ọle da yẹ lu re alo yẹ dọ mianmẹn.

Beji obhio mhan nin Rumph yi ọlasẹre, ọle da wo ha daghe ebi ibhio mhan ne lu ọkanẹfan rẹ ghọnghọn yẹ. Bhiriọ, beji ọle ki yo isiku sẹkọndri fo, ọle da munhẹn ha lu iwẹnna ọkanẹfan bhi Sẹtẹmba 1995. Bhi ukpe 2000, ọle da diọbhi Ecuador dọ ha ga bhi eji a da guanọ urẹkpa. Bhi enin, ọle da miẹn obhio mhan nin okhuo natiọle Inga, nọn lu iwẹnna ọkanẹfan. Agbaẹbho natiọle Canada ọle na vae. Akizẹbue, ele da bọ egbe. Ele ki bọ egbe fo, ele da dọ ha ga bhi agọ ọkpa bhi Ecuador, nin ibhio mhan ne tẹmhọn Osẹnobulua i da bun. Ẹlẹnan nian, ele ki wo bun ọbhọ, sẹyẹ, a ki re ele kiẹn agbotu.

Akizẹbue, a da re obhio mhan nin Rumph bi okhuo ọle kiẹn ọkanẹfan kpataki yẹ je ele ha khian eji ele ha da dọ ha ga. Ọ ki ribhi ukpe 2011, a da tie ele nin ele dọ yi Isiku iGiliẹd nọnzi 132. Beji ele yo ọne isiku fo, ele da wo miẹn isẹhoa rẹ ga bhi ije kẹkẹ bhi ọne otọ agbọn nan rẹbhe, yẹ sọnyẹnmhẹn bhi ije kẹkẹ nin ele da ga. Ele da ga bhi Bẹtẹ, lu iwẹnna mishọnari, bi iwẹnna ọfẹotughe. Obhio mhan nin Rumph yẹ wo miẹn isẹhoa rẹ deba man emhin bhi Isiku Ọsi Ene Tẹmhọn Agbejele.

Ranmhude emianmhẹn COVID-19 nọn zegbere, obhio mhan nin Rumph bi okhuo ọle da fikie diọbhi United States. A da tie ele vae bhi Bẹtẹ nọn ribhi Wallkill. Bhi enin, a da man Rumph ebi a rẹ re emhin khian yẹ bhi Ọfisi Nọn Mhọn Obọ bhi Iwẹnna Itẹmhọn Osẹnobulua. Akizẹbue, a da gbo je ele ha khian Bẹtẹ nọn ribhi Ecuador. Bhi enin, a da re obhio mhan nin Rumph kiẹn Ọkpa bhi Otu Nọn Sun Ibẹtẹ. Bhi ukpe 2023, a da je ele ha khian Warwick, nin ele dọ ha ga bhi enin. Bhi Jẹnuare 2024, a da re obhio mhan nin Rumph kiẹn ọkpa bhi ene rẹkpa Ọfisi Nọn Mhọn Obọ bhi Iwẹnna Itẹmhọn Osẹnobulua. Ọle ki ha ria eria nyan ije kẹkẹ nin ọle da sẹ ga, ọle da yọle, “Ọ i yi eji ọria da ga hi ebe re ẹsọn nan mun nanlẹn yi ẹsọn kpataki, unan ẹbho nin ọle deba miẹn ọne ẹsọn hi ebe re ọne ẹsọn yi ẹsọn kpataki.”

Uwedẹ nin ene ibhio mhan nan rẹ zegbere rẹ ha miẹn ẹsọn nin Jehova wo manman ti mhan bhọ. Sẹyẹ, mhan manman wo “ji ẹmhọn ikpea ne sẹ iriọ ha ti [mhan] bhọ.”—Fil. 2:29.