Rẹọbhọ Ghe Jehova Rẹhunmhan Uwẹ

1-2. Be ọ dia mhan yẹ bhi egbe nin mhan rẹ dọ lẹn ghe Jehova rẹhunmhan olukhọ nesẹmhan? (Yẹ fẹ adudu nọn ribhi odalo ọle ghe.)

DEVID nin Ojie wo lẹn ebi ọ diayẹ bhi egbe sade ọkhọle gbe ọria asan, ranmhude emhin ebe nin ọria lu bhi ẹghe nọn gbera. (Ps. 40:12; 51:3) Ọle wo lu emhin ebe ne manman kaka. Bhi ẹghe nin ọle ki rẹ kiọya bhi ene emhin ebe nin ọle lu, Jehova da rẹhunmhan ọlẹn. (2 Sam. 12:13) Ranmhude ọnan, Devid da wo ha ghọnghọn bhi iẹnlẹn ranmhude ọle lẹnmhin ghe, Jehova rẹhunmhan olukhọ nọnsọle.—Ps. 32:1.

² Mhan dẹ yẹ sabọ ha ghọnghọn ranmhude nin mhan rẹ lẹn ghe, Jehova mhọn itohan da mhan, sẹyẹ, ọle rẹhunmhan mhan bhi olukhọ nesẹmhan. Aharẹmiẹn ghe mhan lu emhin ebe nọn manman kaka, ọ manman wo ko mhan udu re rẹ lẹn ghe, Jehova dẹ rẹhunmhan mhan bhi ọne emhin ebe nin mhan lu, sade mhan kiọya ọbhọ, bhii Jehova nin ọle rẹhunmhan mhan, yẹ dọ taman ene ewanlẹn. Ọ yẹ khẹke nin mhan dọnmhegbe lu eka nin mhan ha sabọ lu, beji a ha da miẹn ghe, mhan bha fikie dọ lu ọne emhin ebe. (Prov. 28:13; Iwẹn. 26:20; 1 Jọni 1:9) Sẹyẹ, ọ rẹ mhan ghọnghọn nin mhan rẹ lẹn ghe, Jehova i kie re oya nin mhan le bhi emhin ebe nin mhan lu nin ọle da rẹhunmhan mhan!—Ezek. 33:16.

3-4. Be egbe dia obhio mhan nin okhuo ọkpa yẹ bhi ẹghe nin ọle rẹ mianmẹn fo? Be mhan ha zilo nyan bhi ọne uhọnmhọn-ọta nan?

³ Ẹgheso, ọnọghọ ẹbho eso rẹ rẹọbhọ ghe, Jehova rẹhunmhan olukhọ nọnsele. Inian ọ dia obhio mhan nin okhuo natiọle Jennifer bhi egbe. Ene biẹ ọle da man ọlẹn ẹmhọn Jehova bhi ẹghe nin ọle rẹ ha ribhi obhokhan. Ọkpakinọn, beji ọle ki ha wanre, ọle da dọ munhẹn ha lu emhin ebe, sẹyẹ, ọle da ha re ọle nẹhe nin ene biẹ ọle. Ọkpakinọn, ikpe eso ki gbera, ọle da fi iẹnlẹn nọnsọle denọ. Ọle da re egbe guẹ nin Jehova, yẹ mianmẹn. Ọle da yọle: “Bhi ẹghe nọn gbera, mẹn da wo ha gboghẹ yẹ da anyọn gbe egbe. Sẹyẹ, mẹn da ha khọẹkẹ. Rẹ deba ọnin, mẹn da mun ẹmhọn afe bi ua kalo bhi iẹnlẹn. Bhi ọkhọle nọnsẹmhẹn, mẹn lẹnmhin ghe Baibo yọle ghe, ranmhude izọese nọnsi Jesu, Jehova dẹ rẹhunmhan olukhọ nesẹmhan. Arẹmiẹn mẹn kiọya bhi emhin ebe nin mẹn lu, yẹ bhii Jehova nin ọle rẹhunmhan mẹn, mẹn bha rẹọbhọ ghe Jehova gene rẹhunmhan mẹn.”

⁴ Ọ be nọghọ uwẹ rẹ rẹọbhọ ghe, Jehova rẹhunmhan uwẹ bhi emhin ebe nin uwẹ lu bhi ẹghe nọn gbera? Ọ ha yi iriọ, yere ebi emhin dia Devid yẹ bhi egbe. Ọle da rẹọbhọ ghe Jehova rẹhunmhan emhin ebe nin ọle lu, ranmhude itohan nin Jehova mhọnlẹn. Inian Jehova yẹ guanọ nin emhin dia mhan bhi egbe beji ọ dia Devid bhi egbe. Bhi ọne uhọnmhọn-ọta nan, mhan dẹ zilo nyan ebezẹle nọn da khẹke nin mhan rẹọbhọ ghe Jehova rẹhunmhan mhan, bi ebe ha rẹkpa mhan rẹ sabọ rẹọbhọ.

BEZẸLE NỌN DA KHẸKE NIN MHAN RẸỌBHỌ GHE JEHOVA RẸHUNMHAN MHAN?

5. Be Esu guanọ nin mhan rẹọ i? Re ijiẹmhin ọbhọ.

⁵ Mhan ha rẹọbhọ ghe Jehova rẹhunmhan mhan, ọ ki rẹkpa mhan rẹ rẹban ufi ọsi Esu. Yere ghe Esu dẹ lu emhin nọn hi ki rẹ khin nin ọle rẹ re mhan miẹn ghe, mhan bha yẹ ha ga Jehova. Uwedẹ ọkpa nin ọle rẹ lu ọnan hi, nin ọle rẹ re mhan rẹọbhọ ghe, Jehova i da sabọ rẹhunmhan mhan bhi olukhọ nọnsẹmhan. Fẹ ebe sunu ji okpea ọkpa nan re sibhi agbotu re bhi agbotu ọsi Kọrint. Ranmhude nin ọle bha rẹ ka zobọ bhọ rẹ ha lu ilọnmhọn oghẹ zẹle nan da re ọle sibhi agbotu re. (1 Kọr. 5:​1, 5, 13) Akizẹbue, ọne okpea da fidenọ. Ọkpakinọn, Esu bha guanọ nin ẹbho ne ribhi ọne agbotu rẹhunmhan ọlẹn, sẹyẹ, ọle bha ho nin ele miẹn ọlẹn ọbhi egbe sade ọle vae bhi agbotu. Ahamiẹn ghe ọrebhe bhi agbotu bha rẹhunmhan ọne okpea nan, ọle dẹ sabọ dọ ha riale ghe, Jehova i da rẹhunmhan ọlẹn. Ọnan dẹ sabọ re ọne okpea dọ ha lu akhiẹ rẹ sẹbhọ ghe, ọle ki zobọ bhọ rẹ ha ga Jehova. Ebi Esu sẹyẹ wo guanọ ẹlẹnan khọnan. Ọle bha sẹ zobọ bhọ rẹ ha hiẹ mhan. Ọkpakinọn, “mhan lẹn uwedẹ kẹkẹ nin ọle rẹ lu emhin.”—2 Kọr. 2:​5-11.

6. Be ha rẹkpa mhan beji a ha da miẹn ghe, ọkhọle bha ha gbe mhan asan ranmhude emhin ebe nin mhan lu?

⁶ Ahamiẹn mhan gene rẹọbhọ ghe Jehova rẹhunmhan olukhọ nesẹmhan, ọnan dẹ rẹkpa mhan rẹ miẹn ghe, ọkhọle nọnsẹmhan bha dọ ha gbe mhan asan. Ahamiẹn mhan lu emhin ebe, ọkhọle manman wo gbe mhan asan. (Ps. 51:17) Emhin nọn mhẹn wo khọnan. Ahamiẹn ghe ọkhọle gbe mhan asan ranmhude emhin ebe nin mhan lu, ọ dẹ sabọ re ọne ọhubhudu nin mhan rẹ fidenọ, yẹ munhẹn ha lu emhin nọn gbale. (2 Kọr. 7:​10, 11) Ọkpakinọn, ahamiẹn ghe mhan bha rẹọbhọ ghe Jehova rẹhunmhan olukhọ nesẹmhan aharẹmiẹn ghe mhan fidenọ, ọnan dẹ sabọ rẹ mhan miẹn ghe mhan bha yẹ ha ga Jehova. Mhan ha gene rẹọbhọ ghe Jehova rẹhunmhan olukhọ nesẹmhan, mhan i yẹ da ji ọkhọle ha gbe mhan asan ranmhude ọne emhin ebe nin mhan lu. Bhiriọ, mhan ki sabọ re ọkhọle nọn khiale bi eghọnghọn rẹ ha ga Jehova bhi uwedẹ nin ọle rẹ guanọ ọlẹn. (Kol. 1:​10, 11; 2 Tim. 1:3) Ọkpakinọn, be ha rẹkpa mhan rẹ gene rẹọbhọ ghe Jehova rẹhunmhan olukhọ nesẹmhan?

BE HA RẸKPA MHAN RẸ RẸỌBHỌ GHE JEHOVA RẸHUNMHAN OLUKHỌ NESẸMHAN?

7-8. Be Jehova taman Mozis? Iruduba nela ọnan re nin mhan? (Exodus 34:​6, 7)

⁷ Ria eria nyan ebi Jehova tale rẹji egbọle. Bhi ọsi ijiẹmhin, fẹ ebi Jehova taman Mozis rẹji egbọle, bhi ẹghe nin Mozis rẹ ha guanọ nin ọle manman lẹn Jehova nọnsẹn.a (Tie Exodus 34:​6, 7.) Emhin ne bunbun ribhọ nin Jehova ha rẹ sabọ taman Mozis rẹji unan ọria nin ọle khin, sokpan ọle da zẹ rẹ taman ọlẹn ghe, “Osẹnobulua nọn mhọn itohan bi ẹkẹ-ẹjẹjẹ” ọle khin. Bhiriọ, uwẹ riale ghe ọria nọn ga Jehova ha gene fidenọ, Jehova i da rẹhunmhan ọlẹn? Ahamiẹn ghe Jehova bha rẹhunmhan ọria nọn sẹriọ, ọnin ki rẹman ghe, ọria ebe Jehova khin, ghe ọle i mhọn itohan. Jehova i da lu emhin nọn sẹriọ hiehie.

⁸ Ranmhude Osẹnobulua i bha ohoghe, mhan dẹ sabọ rẹọbhọ ghe ẹmhọanta ọle tale, bhi ẹghe nin ọle rẹ yọle ghe, Osẹ nọn mhọn itohan ọle khin. (Ps. 31:5) Bhiriọ, emhin nọn hi ki rẹ khin nin ọle tale, mhan dẹ sabọ rẹọbhọ. Ahamiẹn ghe ọkhọle nọnsẹ sẹyẹ gbe uwẹ asan ranmhude emhin ebe nin uwẹ lu bhi ẹghe nọn gbera, nọọn egbe uwẹ ene inọnta nan: ‘Imẹn be gene rẹọbhọ ghe, Osẹ nọn mhọn itohan bi ẹkẹ-ẹjẹjẹ Jehova khin; ghe ọle dẹ rẹhunmhan ọria nọn hi ki rẹ khin nọn fidenọ bhi emhin ebe nin ọle lu? Ọ bha be khẹke nin mẹn rẹọbhọ ghe ọle rẹhunmhan olukhọ nesẹmhẹn?’

9. Be Psalm 32:5 man mhan le rẹji uwedẹ nin Jehova rẹ rẹhunmhan?

⁹ Ria eria nyan ebi Jehova man mhan le bhi Baibo rẹji uwedẹ nin ọle rẹ rẹhunmhan. Bhi ọsi ijiẹmhin, fẹ ebi Devid nọn yi ọkpa bhi eria ne gbẹn Baibo tale rẹji uwedẹ nin Jehova rẹ rẹhunmhan. (Tie Psalm 32:5.) Devid da gbẹn yọle: “Uwẹ da rẹhunmhan mẹn bhi idobọ nin mẹn rẹ lu olukhọ.” Ọne ukpọta Hibru na zẹdu ọle diọbhi “rẹhunmhan,” dẹ sabọ mundia nin nan rẹ “mun emhin,” la “mun emhin sibhi eji ọ ye re.” Bhi ẹghe nin Jehova rẹ rẹhunmhan Devid, ọ da dia Devid bhi egbe ghe, Jehova mun udede ihẹ nọn rẹ ha denyẹnyẹn ọlẹn fia. Devid da wo ha ghọnghọn nin ọle rẹ rẹọbhọ ghe Jehova rẹhunmhan olukhọ nọnsọle. (Ps. 32:​2-4) Mhan dẹ yẹ sabọ ha mhọn eghọnghọn nọn sẹriọ. Ahamiẹn mhan gene fidenọ bhi emhin ebe nin mhan ka rẹ ha lu, ọ bha khẹke nin mhan yẹ ji ọkhọle ha gbe mhan asan bhi udede ihẹ nin Jehova miẹn mhan le mun fia.

10-11. Be ene ọta nọn yọle, Jehova “muegbe nin [ọle] rẹ rẹhunmhan” man mhan le rẹji Jehova? (Psalm 86:5)

¹⁰ Tie Psalm 86:5. Devid yọle ghe Jehova wo “muegbe nin [ọle] rẹ rẹhunmhan” mhan. Ọnan rẹman ghe ẹkẹ i kẹ khọ Jehova sade mhan dobọ. Sẹyẹ, ọ ghọn ọlẹn nin ọle rẹ rẹhunmhan ọria nọn gene fidenọ. Bezẹle nọn da dia iriọ? Obọ nọnkẹle bhi ọne ulọnlẹn da yọle: “Uwẹ manman mhọn ahoẹmhọn-egbe nọn ibeghe da ẹbho ne so tie uwẹ.” Bhi uhọnmhọn-ọta nọn gbera, mhan da luẹ ghe Jehova ve nin ọle rẹ re ahoẹmhọn-egbe nọn i beghe man eria ne hoẹmhọn ọlẹn. Sẹyẹ, ọle i da fikekegbe ele ghẹdẹ. Ranmhude ahoẹmhọn-egbe nọn i beghe nọnsi Jehova, ọle dẹ re ọkhọle rebhe rẹhunmhan ọria nọn hi ki rẹ khin nọn zobọ bhọ rẹ ha lu emhin ebe. (Isa. 55:7) Ahamiẹn ọnọghọ uwẹ rẹ rẹọbhọ ghe Jehova rẹhunmhan uwẹ bhi emhin ebe nin uwẹ lu bhi ẹghe nọn gbera, uwẹ sabọ rẹ nọọn egbe uwẹ ene inọnta nan: ‘Imẹn be rẹọbhọ ghe, Jehova gene rẹhunmhan olukhọ, ghe ọle rẹhunmhan ọrebhe ne gene fidenọ, ne yẹ guanọ itohan nọnsọle? Ọ bha be khẹke nin mẹn rẹọbhọ ghe Jehova rẹhunmhan olukhọ nọnsẹmhẹn, bhi ẹghe nin mẹn rẹ viẹ bu ọle nin ọle mhọn itohan da mẹn?’

¹¹ Baibo ji mhan lẹn ghe, Jehova wo gene lẹn ebi ọle rẹ man mhan yẹ. (Ps. 139:​1, 2) Bha ji mhan gbo fẹ ebi Devid tale bhi ebe ọsi psalm ghe. Ebi ọle tale dẹ sabọ rẹkpa mhan rẹ rẹọbhọ ghe Jehova wo muegbe nin ọle rẹ rẹhunmhan mhan.

EMHIN NELA JEHOVA YERE BHI EGBE MHAN?

12-13. Beji Psalm 103:14 rẹman, be Jehova yere bhi egbe mhan? Be ọnan re ọle lu?

¹² Tie Psalm 103:14. Devid da yọle ghe, Jehova “yere ghe ekẹn mhan khin.” Devid da re ene ẹmhọn nan rẹ man mhan emhin ọkpa nọn zẹle, nin Jehova da muegbe nin ọle rẹ rẹhunmhan eria ne gene fidenọ. Ọne emhin nọn zẹle hi, Jehova lẹnmhin ghe eria olukhọ mhan khin. Nin mhan rẹ lẹn otọ ọne ẹmhọn nan nọnsẹn, bha ji mhan manman gbẹlokotọ bhi ene ikpọta nin Devid noo.

¹³ Devid da yọle ghe, Jehova “lẹn ebi ọle rẹ man mhan yẹ.” Ekẹn Jehova rẹ man Adam. Bhiriọ, ọle lẹn ebi eria diayẹ bi ebi ele guanọ. Bhi ọsi ijiẹmhin, ọle lẹnmhin ghe ọkhẹke nin ele ha le ebale, ha wẹ, yẹ hiẹnhiẹn beji ele ha da sabọ ha nyẹnlẹn. Ọkpakinọn, ranmhude emhin-ebe nin Adam bi Ivi lu, ọne ukpọta nọn yọle “ekẹn mhan khin” dẹ yẹ sabọ mundia nin emhin ọbhebhe. Ọne emhin hi, mhan mhọn eji mhan da wẹghẹ ranmhude emhin-ebe nin mhan le bhi uku. Ranmhude ọnan, mhan dẹ wo ha wẹnna kaka rẹ khọn emhin-ebe. Beji a miẹn Adam bi Ivi biẹ mhan, mhan da le emhin-ebe bhi uku bhi obọ ele, nọn rẹ mhan dọ ha lu emhin nọn bha gba. Jehova wo manman lẹn mhan nọnsẹn. Ọkpakinọn, ẹghe nin Devid rẹ yọle ghe, Jehova yere ghe ekẹn mhan khin, ebi ọle ha ta hi, Jehova lẹnmhin ghe eria olukhọ mhan khin. Ọnan rẹman ghe, ọle dẹ wo ha re ẹkẹ-ẹjẹjẹ rẹ ne mhan lu emhin. Mhan dẹ sabọ yọle ghe ebi Devid ha tẹmhọnlẹn hi, Jehova lẹnmhin ghe mhan dẹ dobọ ẹgheso. Bhiriọ ọnan ha sunu, ọle ki re itohan man mhan, yẹ rẹhunmhan mhan sade ọle daghe ọle ghe, mhan gene fidenọ.—Ps. 78:​38, 39.

14. (a) Emhin ọbhebhe nela Devid tale rẹji uwedẹ nin Jehova rẹ rẹhunmhan? (Psalm 103:12) (b) Be mhan miẹn luẹ bhi uwedẹ nin Jehova rẹ rẹhunmhan Devid? (Fẹ ọne ẹkpẹti ghe nọn yọle, “Ebi Jehova Rẹ Rẹhunmhan yẹ.”)

¹⁴ Be Jehova rẹhunmhan mhan sẹ yẹ? (Tie Psalm 103:12.) Devid da yọle ghe, ahamiẹn Jehova rẹhunmhan olukhọ nesẹmhan, ọle ki manman si ele sibhi eji mhan ye re, “beji eji oẹnlẹn da hẹnre rẹ manman ree bhi eji ọ da defia.” Eji oẹnlẹn da hẹnre bi eji ọ da defia wo manman ree bhi eji egbe ye. Ẹghe i ribhọ nin ele ha rẹ sabọ sẹ eji egbe ye. Ọnan rẹman ghe, ahamiẹn Jehova rẹhunmhan olukhọ nesẹmhan, inian ọ diabe ghe ọle manman si ọne emhin-ebe kie bhi eji mhan ye. Ọle ki wo manman si ọle sibhi eji mhan ye re rẹ sẹbhọ ghe, emhin soso i ribhọ nọn ha kie re Ọle dọ ha ria ẹmhọn ọne emhin-ebe, la ha ye mhan ọne emhin ebe re. Sẹyẹ, Ọle i da ha re oya nin mhan ranmhude ọne emhin ebe.—Ezek. 18:​21, 22; Iwẹn. 3:19.

15. Be mhan ha lu sade ọkhọle yẹ gbe mhan asan ranmhude olukhọ nin mhan lu bhi ẹghe nọn gbera?

¹⁵ Be ọta nin Devid ta bhi Psalm 103 ha rẹ rẹkpa mhan yẹ, sade ọnọghọ mhan rẹ rẹọbhọ ghe, Jehova rẹhunmhan olukhọ nesẹmhan? Ahamiẹn ghe ọkhọle yẹ gbe mhan asan ranmhude emhin ebe nin mhan lu bhi ẹghe nọn gbera, mhan sabọ rẹ nọọn egbe mhan ene inọnta nan: ‘Imẹn be yẹ yere ghe, Jehova lẹnmhin ọria olukhọ mẹn khin, sẹyẹ, ọle dẹ rẹhunmhan mẹn sade mẹn gene fidenọ? Imẹn be yẹ yere ghe, Jehova ha rẹhunmhan olukhọ nọnsẹmhan, ọle i da kie re ọle re oya nin mhan le? Ọ be khẹke nin mẹn yẹ ha ria ẹmhọn olukhọ nọn sẹnian nin Jehova da rẹhunmhan mẹn?’ Jehova i ria ẹmhọn emhin ebe nin mhan lu bhi ẹghe nọn gbera. Sẹyẹ, ọ bha khẹke nin mhan ha ria ẹmhọnlẹn. (Ps. 130:3) Ahamiẹn mhan gene rẹọbhọ ghe Jehova rẹhunmhan olukhọ nesẹmhan, ọ bha khẹke nin mhan yẹ ji ọkhọle ha gbe mhan asan. Bhiriọ, mhan ki sabọ re eghọnghọn ha ga Jehova khian.

16. Re ijiẹmhin rẹ rẹman okhẹnan nọn ha sabọ nabhọre, sade mhan bha ka re ọkhọle sibhi emhin ebe nin mhan lu bhi ẹghe nọn gbera re? (Yẹ fẹ ifoto ghe.)

¹⁶ Ji mhan fẹ ọne ijiẹmhin nan ghe. Ahamiẹn mhan bha ka re ọkhọle sibhi emhin-ebe nin mhan lu bhi ẹghe nọn gbera re, inian mhan diabe ọria nọn hẹn imoto khian, nọn bha ka re ẹlo kie bhi ughegbe nọn ribhi ọne imoto nin ọle hẹn khian. Emhin nọn mhẹn nọn nin ọria nọn hẹn imoto rẹ ha fẹ ughegbe nọn ribhi imoto ghe ẹgheso, ranmhude, ọ dẹ rẹkpa ọle rẹ daghe ebe ri ọle bhi ikeke. Ọkpakinọn, ahamiẹn ọle bha ho nin ọle de gbe emhin, ọkhẹke nin ọle wo denọ ẹlo ọbhi eji ọle khian. Ahamiẹn mhan ye emhin-ebe nin mhan lu bhi ẹghe nọn gbera re ẹgheso, ọ dẹ sabọ rẹkpa mhan. Mhan dẹ sabọ luẹ emhin bhọ. Sẹyẹ, ọ dẹ sabọ rẹkpa mhan, beji a ha da miẹn mhan bha kie lu ọne emhin-ebe. Ọkpakinọn, ahamiẹn mhan bha ka re ọkhọle sibhi ọne emhin ebe re, ọ dẹ sabọ si mhan obọ re ikeke rẹ ha lu re alo bhi oga nọnsi Osẹnobulua. Bhiriọ, ọ dẹ ha yi emhin nọn mhẹn nin mhan rẹ denọ ẹlo ọbhi eji mhan khian. Odẹ nọn ha rẹ mhan sẹbhi Agbọn Ọsọgbọn nin Jehova ve ive ọle mhan ye. Bhi ọne agbọn nin, emhin ne i mhẹn nin mhan ka lu bhi ẹghe nọn gbera “iyẹ da ha vae bhi ọkhọle” nọnsẹmhan.—Isa. 65:17; Prov. 4:25.

WO HA RẸỌBHỌ GHE JEHOVA HOẸMHỌN UWẸ, SẸYẸ ỌLE DẸ RẸHUNMHAN UWẸ

17. Bezẹle nọn da khẹke nin mhan re ọkhọle rebhe rẹọbhọ ghe Jehova hoẹmhọn mhan, sẹyẹ ọle dẹ rẹhunmhan mhan?

¹⁷ Ọkhẹke nin mhan wo ha re ọkhọle rebhe rẹọbhọ ghe Jehova hoẹmhọn mhan. Sẹyẹ, ọle muegbe nin ọle rẹ rẹhunmhan mhan. (1 Jọni 3:19) Bezẹle? Ranmhude Esu i da zobọ bhọ rẹ re mhan ha riale ghe, Jehova bha hoẹmhọn mhan, la ọle i da rẹhunmhan mhan. Ebezẹle nin Esu da lu ọnan hi, nin ọle rẹ re mhan zobọ bhọ rẹ ha ga Jehova. Ọkhẹke nin mhan ha mhọnlẹn bhi ọkhọle ghe, Esu dẹ wo manman ha dọnmhegbe nin ọle rẹ re mhan ha ria eria bhi iriọ, ranmhude ọle lẹnmhin ghe obhi ẹghe khere ọle ki mhọn. (Arẹm. 12:12) Mhan i da ji ọle da khọn miotọ!

18. Be uwẹ ha lu nin uwẹ da sabọ rẹọbhọ ghe, Jehova hoẹmhọn uwẹ, sẹyẹ ọle dẹ rẹhunmhan uwẹ?

¹⁸ Nin uwẹ rẹ sabọ ha ziẹn urẹọbhọ nin uwẹ mhọnlẹn ghe, Jehova hoẹmhọn uwẹ, dọnmhegbe re obọ rẹkhan ebi a tẹmhọnlẹn bhi uhọnmhọn-ọta nọn gbera. Nin uwẹ rẹ sabọ rẹọbhọ ghe Jehova gene rẹhunmhan uwẹ, ria eria nyan ebi Jehova tale rẹji egbọle. Ria eria nyan ebi ene gbẹn Baibo tale rẹji uwedẹ nin Jehova rẹ rẹhunmhan. Hẹi yele a ghe Jehova lẹnmhin ọria olukhọ uwẹ khin, sẹyẹ, ọle dẹ re itohan ne uwẹ lu emhin. Yere ghe ọle ha rẹhunmhan ọria, ọle ki wo lu iriọ sẹsẹsẹ. Bhiriọ, uwẹ dẹ sabọ ha ghọnghọn nin uwẹ rẹ lẹn ghe, Jehova dẹ mhọn itohan da uwẹ. Sẹyẹ, bọsi Devid uwẹ ki sabọ yọle, “Obulu Jehova nin uwẹ rẹ rẹhunmhan mẹn ‘bhi idobọ nin mẹn rẹ lu olukhọ’!”—Ps. 32:5.