Miẹn Oyẹẹ Nọnsi Jehova Ọbhi Egbe

1. Bezẹle nin uwẹ da re egbe guẹ nin Jehova? (Yẹ fẹ ifoto ghe.)

UWẸ be yẹ ye ẹghe nin uwẹ rẹ re egbe guẹ nin Jehova re? Ranmhude ghe uwẹ hoẹmhọn Jehova, yẹ lẹn ọlẹn zẹle nin uwẹ da zẹ rẹ re egbe guẹ nanlẹn. Uwẹ da ve nanlẹn ghe, uwẹ dẹ mun iho nọnsọle kalo bhi iẹnlẹn nọnsẹ. Uwẹ da yẹ ji ọle lẹn ghe, uwẹ dẹ wo ha re ọkhọle rebhe, udu rebhe, egbe rebhe bi ahu rebhe rẹ hoẹmhọn ọlẹn. (Mak 12:30) Rẹ na bhi ọne ẹghe nin ha vade, oyẹẹ nin uwẹ mhọn da ọle da wo ha ziẹn ọbhọ gbera ọnikhẹ. Bhiriọ, ahamiẹn ọria nọọn uwẹ inọnta bii, “Uwẹ be gene hoẹmhọn Jehova?” Be uwẹ ha rẹ re ewanniẹn nin ọne ọria yẹ? Ẹjẹje uwẹ ha rẹ wo wanniẹn ọlẹn yọle, “Mẹn wo hoẹmhọn ọlẹn gbera emhin nọn hi ki rẹ khin la ọria nọn hi ki rẹ khin!”

2-3. Be Jehova guanọ nin mhan rẹọ i? Be mhan ha zilo nyan bhi ọne uhọnmhọn-ọta nan? (Jeremiah 31:3)

² Ọkpakinọn, ahamiẹn ọria nọọn uwẹ yọle, “Uwẹ be gene rẹọbhọ ghe Jehova hoẹmhọn uwẹ?” Be uwẹ ha rẹ wanniẹn ọlẹn yẹ? Uwẹ dẹ be riia ẹghe a rẹ re ewanniẹn nanlẹn ranmhude ghe, uwẹ riale uwẹ bha sẹ ọria nin Jehova ha hoẹmhọnlẹn? Obhio mhan nin okhuo ọkpa nin emhin bha lẹkhẹ nan beji ọle ha wanre da yọle: “Mẹn lẹnmhin ghe mẹn hoẹmhọn Jehova. Mẹn i mhọn edandan rẹji ọnin hiehie. Ọkpakinọn, mẹn bha riale si Jehova gene hoẹmhọn mẹn.” Be ha rẹkpa uwẹ rẹ gene lẹn ebi ẹmhọn uwẹ dia Jehova yẹ bhi egbe?

³ Jehova guanọ nin uwẹ rẹọbhọ ghe ọle hoẹmhọn uwẹ. (Tie Jeremiah 31:3.) Bhi ọsi ẹmhọanta, Jehova hi ọnọn si uwẹ kẹ egbe nin uwẹ dọ kiẹn ọmọẹ ọle. Bhi ẹghe nin uwẹ ki rẹ re egbe guẹ nanlẹn yẹ mianmẹn, ọle da re oyẹẹ nọn i beghe nọnsọle man uwẹ. Ẹsele nọn ghanlẹn wo khọnan. Ọnan rẹman ghe ọle wo manman hoẹmhọn uwẹ, ọle i da zẹ uwẹ obọ ghẹdẹ. Ọne oyẹẹ nan re ọle wo ghe eguọmhandia nesọle rebhe, rẹ dọ sẹbhi uwẹ bii eria ne ghanlẹn. (Mal. 3:17) Jehova guanọ nin uwẹ rẹọbhọ ghe ọle manman hoẹmhọn uwẹ, beji Pọl nin odibo rẹ rẹọbhọ ghe, Jehova manman hoẹmhọn ọlẹn. Pọl wo re ọkhọle rebhe rẹọbhọ ọnan. Ọle zẹle nin ọle da gbẹn yọle: “Mẹn wo manman rẹọbhọ ghe, emhin iribhọ nọn ha zẹ Osẹnobulua bha yẹ hoẹmhọn mhan. Uu ida sabọ, iẹnlẹn ida sabọ, ẹhi ida sabọ, ugbẹloghe ida sabọ, emhin ne sunu nian la ene ha sunu bhi ẹghe odalo ida sabọ, ahu ida sabọ, emhin ne yoyo ida sabọ, emhin ne dinmhin ida sabọ, emhin soso nan manlẹn ida sabọ. Emhin soso iribhọ nọn ha zẹ Osẹnobulua bha yẹ re oyẹẹ nọnsọle man mhan.” (Rom 8:​38, 39) Bhi ọne uhọnmhọn-ọta nan, mhan dẹ zilo nyan ebi mhan ha rẹ sabọ ha ziẹn urẹọbhọ nọnsẹmhan ghe Jehova gene hoẹmhọn mhan, bi ebe ha rẹkpa mhan rẹ sabọ lu iriọ.

EBEZẸLE NỌN DA KHẸKE NIN MHAN RẸỌBHỌ GHE JEHOVA GENE HOẸMHỌN MHAN

4. Be ha rẹkpa mhan rẹ sabọ khọn emhin ọkpa nin Esu noo rẹ dọnmhẹn mhan?

⁴ Mhan ha rẹọbhọ ghe Jehova gene hoẹmhọn mhan, mhan ki sabọ re egbe nẹ bhi “edọnmhẹn kẹkẹ” ọsi Esu. (Ẹfẹ. 6:11) Esu dẹ sabọ lu emhin nọn hi ki rẹ khin nin ọle rẹ re mhan miẹn ghe mhan bha yẹ ha ga Jehova. Emhin ọkpa nin Esu noo rẹ dọnmhẹn mhan hi, nin ọle rẹ dọnmhegbe rẹ re mhan rẹọbhọ ghe Jehova bha hoẹmhọn mhan. Hẹi yele a ghe isẹhoa nọn hi ki rẹ khin nin Esu miẹn ọle noo rẹ dọnmhẹn ẹbho. Ẹghe nin Esu kẹ rẹ wo dọnmhẹn mhan hi, ẹghe nin egbe rẹ lọ mhan, la ẹghe nin mhan rẹ lu akhiẹ, ranmhude emhin ne sunu ji mhan bhi ẹghe nọn gbera, emhin ne sunu ji mhan nian, la sade mhan kpokpo egbe ranmhude mhan bha lẹn ebe ha sabọ sunu ji mhan bhi ẹghe odalo. (Prov. 24:10) Inian Esu diabe oduman nọn guanọ nin ọle gbe elanmhẹn ne wẹghẹ le, ne bha sabọ khọn nin egbele. Ọnan zẹle nin ọle da dọnmhegbe rẹ dọnmhẹn mhan bhi ẹghe nin mhan rẹ wẹghẹ, beji a ha da miẹn ghe, egbe ki lọ mhan rẹ ha ga Jehova. Ọkpakinọn, ahamiẹn mhan ziẹn urẹọbhọ nin mhan mhọnlẹn ghe Jehova hoẹmhọn mhan, ọ ki rẹkpa mhan rẹ sabọ ne Esu suan, yẹ re egbe nẹ bhi edọnmhẹn nesọle kẹkẹ.—1 Pita 5:​8, 9; Jem. 4:7.

5. Bezẹle nin ọ da khẹke nin mhan rẹọbhọ ghe, Jehova gene hoẹmhọn mhan, sẹyẹ, ghe mhan ghan bhi ẹlo nọnsọle?

⁵ Ahamiẹn mhan rẹọbhọ ghe Jehova hoẹmhọn mhan, ọ ki rẹkpa mhan rẹ manman sikẹ ọle. Fẹ ebezẹle nin mhan da ta iriọ. Jehova man mhan bhi uwedẹ nin mhan ha rẹ sabọ ha re oyẹẹ man, bi nan rẹ ha re oyẹẹ man mhan. Ahamiẹn ọria re oyẹẹ man mhan, ọ ki yẹ re ọne ọhubhudu nin mhan rẹ re oyẹẹ man ọlẹn. Bhiriọ, ahamiẹn Jehova hoẹmhọn mhan, ọ ki yẹ rẹkpa mhan rẹ manman hoẹmhọn ọlẹn. (1 Jọni 4:19) Beji oyẹẹ nin mhan mhọn da Osẹnobulua ha rẹ ha tuẹn okhun, iriọ oyẹẹ nin ọle mhọn da mhan ha yẹ rẹ ha tuẹn okhun. Baibo yọle: “Bha sikẹ Osẹnobulua, ọle ki yẹ sikẹ bha.” (Jem. 4:8) Bhiriọ, be mhan ha rẹ sabọ ziẹn urẹọbhọ nin mhan mhọnlẹn ghe Jehova hoẹmhọn mhan?

EBE HA RẸKPA MHAN RẸ SABỌ MIẸN OYẸẸ NỌNSI JEHOVA ỌBHI EGBE

6. Be ọkhẹke nin mhan bhii Jehova le bhi erọnmhọn beji mhan ha da sabọ miẹn oyẹẹ nọnsọle ọbhi egbe?

⁶ Wo ha bhii Jehova nin ọle rẹkpa uwẹ rẹ lẹn ebezẹle nin ọle da hoẹmhọn uwẹ. (Luk 18:1; Rom 12:12) Ha bhii Jehova ukpẹdẹ-ukpẹdẹ nin ọle rẹkpa uwẹ rẹ re ẹlo nọn khẹke ha ghe egbe uwẹ, beji ọle rẹ ghe uwẹ. Ẹgheso, ahamiẹn mhan i re ẹlo nọn khẹke rẹ ghe egbe mhan, ọ dẹ nọghọ mhan rẹ rẹọbhọ ghe Jehova gene hoẹmhọn mhan. Ọkpakinọn, ọkhẹke nin mhan yere ghe Jehova kpọnọ gbera ọkhọle nọnsẹmhan. (1 Jọni 3:​19, 20) Ọle lẹn uwẹ gbera beji uwẹ lẹn egbe uwẹ sẹ. Ọle daghe ikpẹ esili nin uwẹ mhọn nin uwẹ bha sabọ daghe. (1 Sam. 16:7; 2 Chron. 6:30) Hẹi siegbe re ikeke rẹ ha taman ọlẹn ebi emhin dia uwẹ yẹ bhi egbe. Bhii ọle nin ọle rẹkpa uwẹ rẹ miẹn oyẹẹ nọnsọle ọbhi egbe. (Ps. 62:8) Uwẹ ha nan erọnmhọn ji ọle fo, re obọ rẹkhan ene emhin nan nin mhan da zilo ọle nian.

7-8. Be ebe nọnsi Psalm rẹ rẹkpa mhan yẹ rẹ rẹọbhọ ghe Jehova hoẹmhọn mhan?

⁷ Rẹọbhi ebi Jehova tale. Jehova re ẹlinmhin nọnsọle rẹ rẹkpa ikpea ne gbẹn Baibo. Bhiriọ, mhan dẹ sabọ rẹọbhi ebe ele tale rẹji Jehova. Fẹ ebe Devid tale rẹji Jehova nọn rẹman ghe, Jehova wo gene hoẹmhọn mhan. Ọle da yọle: “Jehova sikẹ ẹbho nin udu nọnsele wanọ a; Ẹbho nin emhin gbe ele ahu sotọ, ọle miẹn ele fan.” (Ps. 34:18) Ahamiẹn uwẹ lu akhiẹ, uwẹ sabọ rẹ ha riale ghe uwẹ ọkpa ki khian. Bhi ẹghe nọn sẹnian, Jehova vele ghe ọle dẹ rẹkpa uwẹ, ranmhude ọle lẹnmhin ghe uwẹ manman guanọ urẹkpa nọnsọle. Bhi ẹghe ọbhebhe, Devid da kie gbẹn yọle: “Koko eviẹ nọnsẹmhẹn ọbhi ẹkpa nọnsẹ nan re ohian lu.” (Ps. 56:8) Jehova daghe ọle sade uwẹ lu akhiẹ. Ẹmhọn uwẹ bi idia nin uwẹ ye manman rẹtẹ ọle. Inian ọ diabe ghe, Jehova koko eviẹ nọnsẹ, yẹ ghe ọle bi emhin nọn ghanlẹn, beji amẹn rẹ yi emhin nọn ghanlẹn rẹji ọria nọn khian okhian nọn rele. Psalm 139:3 yọle: “Uwẹ [Jehova] wo lẹn uwedẹ nesẹmhẹn rebhe.” Jehova daghe emhin rebhe nin uwẹ lu. Ọkpakinọn, emhin esili nin uwẹ lu ọle denọ ẹlo ọi. (Hib. 6:10) Bezẹle? Ranmhude emhin rebhe nin uwẹ dọnmhegbe rẹ lu rẹ ha ga ọle manman ti ọle bhọ.a

⁸ Ene ulọnlẹn nin veva nin mhan tiele bhi Baibo wo ko mhan udu re. Inian ọ diabe ghe Jehova re ọle taman mhan yọle: “Imẹn ho nin uwẹ lẹn ghe imẹn hoẹmhọn uwẹ, sẹyẹ, ẹmhọn uwẹ rẹtẹ mẹn.” Beji mhan ka luẹ, Esu hi ọnọn bha ohoghe ghe Jehova bha hoẹmhọn mhan. Bhiriọ, ahamiẹn ẹgheso uwẹ mhọn edandan si Jehova gene hoẹmhọn uwẹ, ọkhẹke nin uwẹ nọọn egbe ẹ yọle, ‘Ọria nela mẹn ha rẹọbhi ebi ọle tale, Esu nin “aba ohoghe” la “Osẹnobulua ọsi ẹmhọanta”?’—Jọni 8:44; Ps. 31:5.

9. Ive nela Jehova ve nin ẹbho ne hoẹmhọn ọlẹn? (Exodus 20:​5, 6)

⁹ Ria ẹmhọn ebi ẹmhọn ẹbho ne hoẹmhọn Jehova dia ọle yẹ bhi egbe. Fẹ ebi Jehova taman Mozis bi ibhokhan Izrẹl ghe. (Tie Exodus 20:​5, 6.) Jehova vele ghe ọle dẹ wo ha re ahoẹmhọn-egbe nọn i beghe man ẹbho ne hoẹmhọn ọlẹn. Ene ọta nan rẹkpa mhan rẹ lẹn ghe, mhan i da re oyẹẹ man Jehova nan miẹn ghe ọle bha re oyẹẹ man mhan. (Neh. 1:5) Ẹgheso, ahamiẹn uwẹ guanọ ebe ha rẹkpa uwẹ rẹ gene rẹọbhọ ghe si Jehova gene hoẹmhọn uwẹ, ọkhẹke nin uwẹ ka nọọn egbe uwẹ yọle, ‘Imẹn be gene hoẹmhọn Jehova?’ Ria ẹmhọn ọnan ghe: Ahamiẹn uwẹ gene hoẹmhọn ọlẹn, yẹ ha dọnmhegbe rẹ lu ebe ti ọle bhọ, ha mhọnlẹn bhi ọkhọle ghe, ọle yẹ manman hoẹmhọn uwẹ. (Dan. 9:4; 1 Kọr. 8:3) Ebi mhan tẹmhọnlẹn hi, ahamiẹn uwẹ i mhọn edandan si uwẹ gene hoẹmhọn Jehova, bezẹle nin uwẹ ha da ha mhọn edandan si ọle gene hoẹmhọn uwẹ? Wo re ọkhọle rebhe rẹọbhọ ghe, ọle dẹ wo ha hoẹmhọn uwẹ, ọle i da zẹ uwẹ obọ ghẹdẹ.

10-11. Ẹlo nela Jehova guanọ nin uwẹ rẹ ha ghe izọese nọnsi Jesu? (Galesha 2:20)

¹⁰ Ria eria nyan izọese nọnsi Jesu. Izọese nọnsi Jesu hi, ẹsele nọn khua okhun nẹ nin Jehova sẹ lu nin mhan. (Jọni 3:16) Ọkpakinọn, ẹsele be nọn rẹji uwẹ tobuwẹ? Ehe! Ji mhan fẹ ijiẹmhin ọsi Pọl nin odibo ghe. Yere ghe ọle ka wo ha lu emhin ebe ne kakale ọkuẹsẹ ọle dọ kiẹn Kristiẹn. Arẹmiẹn ọle kiẹn Kristiẹn fo, ọle da yẹ wo ha wẹnna kaka beji ọle ha da sabọ khọn eji ọle da wẹghẹ. (Rom 7:​24, 25; 1 Tim. 1:​12-14) Ọrẹyiriọ, ọle da miẹn izọese nọnsi Jesu ọbhi egbe bii ẹsele nin Jesu lu nanlẹn tobọle. (Tie Galesha 2:20.) Yere ghe Jehova hi ọnọn re ahu ẹlinmhin nọnsọle nin Pọl rẹ sabọ gbẹn ene ẹmhọn nin ọbhi otọ. Emhin rebhe ne ribhi ẹkẹ Baibo, a gbẹn ọlẹn nin mhan ne ha dia mhan. (Rom 15:4) Ebi Pọl tale rẹman ẹlo nọn khẹke nin Jehova guanọ nin uwẹ rẹ ha ghe izọese nọnsi Jesu. Ọne hi, nin uwẹ ha ghe ọle bii ẹsele nin Jehova re nin uwẹ tobuwẹ. Ahamiẹn uwẹ ghe izọese nọnsi Jesu bii ẹsele nin Jehova lu nin uwẹ, ọ ki rẹkpa uwẹ rẹ manman rẹọbhọ ghe Jehova hoẹmhọn uwẹ tobuwẹ.

¹¹ Mhan wo khuẹmhin Jehova nin ọle rẹ je Jesu vae bhi ọne otọ nan, nin ọle dọ yu nin mhan. Emhin ọbhebhe nọn zẹle nin Jesu da vae bhi ọne otọ nan hi, nin ọle dọ man ẹbho ẹmhọanta rẹji Osẹnobulua. (Jọni 18:37) Jesu da yẹ wo man mhan le ghe, Jehova hoẹmhọn imọn nesọle.

EBI JESU RẸ RẸKPA MHAN YẸ RẸ RẸỌBHỌ GHE, JEHOVA HOẸMHỌN MHAN

12. Bezẹle nin mhan ha da sabọ rẹọbhi ebi Jesu tale rẹji Jehova?

¹² Ẹghe nin Jesu rẹ ha ribhi ọne otọ nan, ọle da rẹkpa mhan rẹ lẹn unan ọria nin Jehova khin. (Luk 10:22) Mhan dẹ sabọ rẹọbhọ emhin rebhe nin Jesu tale rẹji Jehova. Bezẹle? Ranmhude Jesu sẹ wo deba Jehova nyẹnlẹn bhi okhun bhi ikpe ne bunbun ọkuẹsẹ ọle vae bhi ọne otọ nan. (Kol. 1:15) Jesu sẹ wo ka daghe ebi Jehova rẹ re oyẹẹ man yẹ. Bhiriọ, ọle lẹn ghe Jehova wo manman hoẹmhọn ọrebhe ne sun rẹkhan ọlẹn. Be Jesu rẹ rẹkpa ẹbho yẹ rẹ miẹn oyẹẹ nọnsi Jehova ọbhi egbe?

13. Ẹlo nela Jesu guanọ nin mhan rẹ ha ghe Jehova?

¹³ Jesu guanọ nin mhan re ẹlo nọn khẹke ha ghe Jehova beji ọle rẹ ghe ọle. Bhi Baibo, Jesu da tie Jehova “Aba” bhi igba ne bun gbera 160. Sẹyẹ, bhi ẹghe nin ọle rẹ ha ne edibo nesọle talọ, ọle da ha noo ene ikpọta bii “Aba bha” la “Aba bha nọn ribhi okhun.” (Mat. 5:16; 6:26) Ọkuẹsẹ Jesu vae bhi ọne otọ nan, eguọmhandia nesi Jehova da ha tie Jehova ‘Osẹ Nọn Mhọn Ahu Nẹ,’ ‘Ọnọn Ke Okhun Nẹ,’ ‘Aman Nọn Kẹ Okhun Nẹ,’ bi elin ovan kẹkẹ ne dia iriọ. Ọkpakinọn, ‘Aba,’ ọle Jesu kẹ wo ha tie Jehova le. Ọnan rẹman ghe, Jehova guanọ nin eguọmhandia nọnsọle sikẹ ọle, beji ọmọn rẹ sikẹ aba nọn manman hoẹmhọn ọlẹn. Ọ wo khia bhi ẹlo a ghe, Jesu guanọ nin mhan ha ghe Aba ọle beji ọle rẹ ghe ọle, bii Aba nọn hoẹmhọn mhan, nọn ji ẹmhọn imọn nesọle da rẹtẹ ọle. Bha ji mhan fẹ ijiẹmhin eva ghe nin Jesu da noo ọne ukpọta “Aba.”

14. Be Jesu rẹ rẹman yẹ ghe, ọdeọde bhi ẹwẹ mhan ghan bhi ẹlo nọnsi Jehova nin Aba mhan? (Matiu 10:​29-31) (Yẹ fẹ ifoto ghe.)

¹⁴ Ji mhan ka fẹ ebi Jesu tale bhi Matiu 10:​29-31. (Tie ọle.) Afianmhẹn natiọle arẹlẹ wo manman dia khere. Ele i sabọ hoẹmhọn Jehova la ha ga ọle. Ọrẹyiriọ, Jehova wo hoẹmhọn ene afianmhẹn nan rẹ sẹbhọ ghe, ọkpa ha de sotọ, Jehova lẹnmhin. Ọnan rẹman ghe ọle wo manman hoẹmhọn eguọmhandia nesọle ne hoẹmhọn ọlẹn, ne yẹ sun rẹkhan ọlẹn. Sẹyẹ, ele ghan bhi ẹlo nọnsọle. Jesu yẹ ji mhan lẹn ghe, Jehova lẹn eka eto nọn ribhi uhọnmhọn ọsi ọdeọde bhi ẹwẹ mhan. Beji a miẹn ghe Jehova lẹn ene emhin nan ne dia khere-khere bhi egbe mhan, mhan dẹ sabọ ha mhọnlẹn bhi ọkhọle ghe, ẹmhọn mhan wo manman rẹtẹ ọle. Bhi ọsi ẹmhọanta, Jesu guanọ nin mhan rẹọbhọ ghe ọdeọde bhi ẹwẹ mhan wo ghan bhi ẹlo nọnsi Aba mhan nọn ribhi okhun.

15. Be ọta nin Jesu tale bhi Jọni 6:44 man uwẹ le rẹji Aba mhan nọn ribhi okhun?

¹⁵ Ji mhan fẹ ijiẹmhin nọnzi eva nin Jesu da noo ọne ukpọta “Aba.” (Tie Jọni 6:44.) Jehova nin Aba uwẹ nọn ribhi okhun, ọle fẹkẹ si uwẹ vae bhi oga ẹmhọanta. Bezẹle nin ọle da lu iriọ? Ranmhude ọle daghe ọle ghe, uwẹ mhọn ọkhọle esili. (Iwẹn. 13:48) Asabọmiẹn ebi Jehova tale bhi Jeremiah 31:3 Jesu ha talọ je, bhi ẹghe nin ọle rẹ tẹmhọn nọn ribhi Jọni 6:44. Bhi enin Jehova da taman ẹbho nesọle yọle: “Mẹn da re ahoẹmhọn-egbe nọn i beghe rẹ si uwẹ kẹ egbe.” (Jer. 31:3; yẹ fẹ Hosea 11:4 ghe.) Ria ẹmhọn ebe ọnan mundia nan. Aba mhan nọn ribhi okhun daghe ikpẹ esili bhi egbe uwẹ, nin uwẹ bha sabọ daghe.

16. (a) Emhin nela Jesu taman mhan? Bezẹle nọn da khẹke nin mhan rẹọbhi ebi ọle taman mhan? (b) Be ha rẹkpa uwẹ rẹ sabọ ziẹn urẹọbhọ nin uwẹ mhọnlẹn ghe, Jehova hi Aba nọn khẹke nin uwẹ ha mhọnlẹn? (Fẹ ọne ẹkpẹti ghe nọn yọle, “Aba Nọn Khẹke Nin Mhan Ha Mhọnlẹn.”)

¹⁶ Jesu wo rẹkpa mhan rẹ lẹn ghe, Aba mhan Jehova khin. Inian ọ diabe ghe ọle re ọnan taman mhan yọle: “Ọ i yi mẹn ọkpa nyan Jehova bii Aba mẹn; Aba bha Jehova yẹ khin. Bha ha mhọnlẹn bhi ọkhọle ghe, ọle hoẹmhọn bha, sẹyẹ, ẹmhọn ọdeọde bhi ẹwẹ bha rẹtẹ ọle.” Bhiriọ, ahamiẹn ghe ẹgheso, uwẹ mhọn edandan si Jehova gene hoẹmhọn uwẹ, nọọn egbe uwẹ ọne inọnta nan, ‘Ọ bha be khẹke nin mẹn rẹọbhi ọta nin Jesu nin ọmọn nọnsi Osẹnobulua tale, nọn manman lẹn Osẹnobulua nin Aba ọle nọnsẹn, nọn yẹ wo ta ẹmhọanta ẹghe rebhe?’—1 Pita 2:22.

HA ZIẸN URẸỌBHỌ NIN UWẸ MHỌNLẸN GHE JEHOVA HOẸMHỌN UWẸ

17. Bezẹle nọn da khẹke nin mhan ha ziẹn urẹọbhọ nin mhan mhọnlẹn ghe, Jehova hoẹmhọn mhan?

¹⁷ Ọkhẹke nin mhan ha ziẹn urẹọbhọ nin mhan mhọnlẹn ghe, Jehova hoẹmhọn mhan. Beji mhan ka luẹ, Esu nin oghian mhan i da zobọ bhọ rẹ ha dọnmhẹn mhan, ranmhude, ọle guanọ nin mhan zobọ bhọ rẹ ha ga Jehova. Esu guanọ nin ọle wẹghẹ mhan urẹọbhọ a. Bhiriọ, ọle dẹ wo ha dọnmhegbe rẹ re mhan ha riale ghe Jehova bha hoẹmhọn mhan. Mhan i da re otọ nin Esu rẹ khọn miotọ bhi egbe mhan!—Job 27:5.

18. Be ha rẹkpa uwẹ rẹ sabọ manman rẹọbhọ ghe Jehova hoẹmhọn uwẹ?

¹⁸ Nin uwẹ rẹ sabọ ha ziẹn urẹọbhọ nin uwẹ mhọnlẹn ghe, Jehova hoẹmhọn uwẹ, wo ha nan erọnmhọn ji Jehova ẹghe rebhe, nin ọle rẹkpa uwẹ rẹ sabọ ha ghe egbe uwẹ beji ọle rẹ ghe uwẹ. Ria eria nyan uwedẹ nin ẹbho ne gbẹn Baibo rẹ tẹmhọn oyẹẹ nin Jehova mhọnlẹn. Ha mhọnlẹn bhi ọkhọle ghe, Jehova dẹ wo ha hoẹmhọn ọria nọn hoẹmhọn ọlẹn. Yẹ ria eria nyan ebezẹle nọn da khẹke nin uwẹ ha ghe izọese nọnsi Jesu bii ẹsele nin Jehova lu nin uwẹ tobuwẹ. Sẹyẹ, rẹọbhi ebi Jesu tale ghe, Aba uwẹ nọn ribhi okhun Jehova khin. Bhiriọ, ọria ha nọọn uwẹ yọle: “Uwẹ be gene rẹọbhọ ghe Jehova hoẹmhọn uwẹ?”, uwẹ ki sabọ re ọkhọle rebhe wanniẹn ọlẹn yọle: “Ehe, ọle hoẹmhọn mẹn! Sẹyẹ, mẹn wo lu eka nin mẹn ha sabọ lu ukpẹdẹ-ukpẹdẹ nin mẹn rẹ rẹman ọlẹn ghe mẹn hoẹmhọn ọlẹn!”