9 SHIFRA, PUA, AMRAM, JOKẸBẸD, BI MERIAM
“Ele Da Sabọ Gbega Mozis Ranmhude Urẹọbhọ Nin Ele Mhọn”
IKPE 60 ọ ki ye nian nin Josẹf yu. Ibhokhan Ijipt da ye ọle a arẹmiẹn ọle Jehova noo rẹ hinmhin ele bhi ọne ukhunmhun nọn fi. Bhi ejayenan nian, Fero ọbhebhe ki ha gbẹloghe otọ Ijipt. Ọle bha zẹwẹ hoẹmhọn ibhokhan Izrẹl. Iriọ ofẹn ele yẹ rẹ ha mun ọlẹn ranmhude uwedẹ nin Jehova rẹ ha nan erọnmhọn nin ele bi uwedẹ nin ele rẹ ha bun ọbhọ. Bhiriọ, ibhokhan Ijipt da re ibhokhan Izrẹl kiẹn igbọn, yẹ ha re obọ oya mun ele. Ọrẹyiriọ, ele da sẹyẹ wo ha bun ọbhọ.
Emhin ọkhọbhẹlo Fero ki muegbe nin ọle rẹ lu nian. Ọle da je nan tatie Shifra bi Pua ji ọle. Ibhokhan Izrẹl ene ikhuo nan khin. Sẹyẹ, ele rẹkpa ikhuo rẹ biẹ. Ria ẹmhọn ebi ọ ha dia ele bhi egbe yẹ beji Fero taman ele ghe, nin ele ha gbono imikpia a nin ele rẹkpa ibhokhan Izrẹl rẹ biẹ. Ọkpakinọn, ene ikhuo nan ne mhọn izebhudu, mun ofẹn Osẹnobulua ọsi ẹmhọanta. Ele lẹnmhin ghe, ọria soso i ribhọ nọn mhọn ọne ahu rẹ re ele gbobọrauhi nọnsi Jehova. Ọnan bhọ zẹle nin ele da sabọ lu emhin nọn rẹman ghe ele mhọn izebhudu. “Ele bha lu ebi ojie ọsi Ijipt taman ele nin ele lu.” Ele da dọnmhegbe lu eka nin ele ha sabọ lu rẹ ha gbega ene imọn nin ibhokhan Izrẹl biẹ. Ẹkẹ da wo manman ha khọ Fero, ọkpakinọn ele da re ẹwanlẹn re ebi ele ha lu he beji a ha da miẹn Fero bha lẹn. Jehova wo daghe ebi ele ha lu. Ranmhude ọne emhin nan nin ele lu, Osẹnobulua da nan erọnmhọn nin ene ikhuo nan. Akizẹbue, Jehova da rẹkpa ele rẹ ha mhọn azagba-uwa nọnsele.
Be ha rẹ sunu ji Mozis sade ene biẹ ọle, Shifra, Pua, bi obhio ọle nin Meriam bha re izebhudu man nọn?
Beji Fero kere ghe ebi ọle mhanmhanlẹn bha wẹnna, ọle ki da mhanmhanlẹn nin ọle rẹ lu emhin ọbhebhe nọn khọ gbera ọne ọle ka lu. Ọle da yọle ghe nan ha muno imikpia nin ibhokhan Izrẹl biẹ fiọbhi Ẹdẹ Nai! Ọne ẹghe ọkakale nan, ọle okhuo bi ọdọ ọkpa natiọle Amram bi Jokẹbẹd rẹ ha nyẹnlẹn. Ibhokhan Izrẹl ele ha khin. Ele bhọ ki ka mhọn imọn eva fo. Elin ele hi Meriam bi Erọn. Ọkpakinọn, ẹghe nin Jokẹbẹd ki rẹ ha hanmhan ọmọn ọzea nọnsele, ele da ha kpokpo-egbe ranmhude ele lẹnmhin ghe ahamiẹn ọmokpia ele biẹ, iẹnlẹn nọnsọle dẹ ha ribhi okhẹnan. Bhiriọ, ọ da khẹke nin ele zẹ ebi ele ha lu. Jokẹbẹd da gene biẹ ọmokpia. Bhiriọ, ele da dọnmhegbe lu eka nin ele ha sabọ lu rẹ re ọne ọmọn he. Ọkpakinọn, ọ i yi emhin nọn lẹkhẹ nan rẹ re ọmọn he. Ọne ọmọn ki ribhi uki ea, Jokẹbẹd da mun ọlẹn fiọbhi ẹkẹ okhuale nan do nọnsẹn. Ọle da re emhin lan egbe ọne okhuale beji a ha da miẹn ghe amẹn bha sabọ nabhọ. Ọle ki lu iriọ fo, ọle da mun ọne okhuale fiọbhi ilunmhun ne ribhi egbegbe Ẹdẹ Nai. Meriam nin ọmokhuo nọnsi Jokẹbẹd da nẹko bhi egbegbe enin. Ọle da na bhi enin fẹkẹ ha ghe ebe ha sunu ji ọne ọmọn.
Ọ bha bue gbe, ọmokhuo ọsi Fero da vae bhi ọne ẹdẹ dọ khọa. Ọle da daghe ọne okhua, bhiriọ ọle da taman ọguọmhandia nọnsọle nọn dọ mun ọne okhua ji ọle. Ọle ki tuje ọne okhua a, ọle da ke ọmokpia nọn mhọnse a re bhi ẹkẹ ọle, sẹyẹ ọne ọmọn da ha viẹ. Ohan ọne ọmọn da wo ha to ọle. Bhiriọ, ọle ki da zẹ nin ọle rẹ bẹẹ ọle wanre, yẹ re ọle kiẹn ọmọn nọnsọle. Ọkpakinọn, ọ da khẹke nin ọle guanọ ọria nọn ha nanlẹn gbẹloghe ọne ọmọn. Meriam da wo jẹje ria eria nyan emhin nọn khẹke nin ọle lu bhi ọne ẹghe nan. Ofẹn bha ha mun ọlẹn, ọle da jẹje runẹ bu ọmokhuo ọsi Fero yẹ taman ọlẹn ghe, ọle dẹ nanlẹn guanọ okhuo nọn ha nanlẹn gbẹloghe ọne ọmọn. Ọmokhuo ọsi Fero da rẹọbhi ebi ọle ta. Meriam da dọ datie inẹn ọlẹn nin Jokẹbẹd re. Ria ẹmhọn ebi Jokẹbẹd ki da rẹ ha ghọnghọn yẹ nian beji ọle dọ lẹn kere ghe ọle ki dẹ sabọ tobọle gbẹloghe ọmọn nọnsọle, ghe okhẹnan soso i yẹ ribhọ. Sẹyẹ, ọmokhuo ọsi Fero dẹ ha ọle osa nin ọle rẹ lu iriọ. Ọle bi ọdọ ọle nin Amram da wo dọnmhegbe rẹ lu eka nin ele ha sabọ lu rẹ man ọne ọmọn ẹmhọn Jehova. Ọne ọmọn ki wanre, ọ da khẹke nin ele re ọle ji ọmokhuo ọsi Fero. Ele ki re ọne ọmọn ji ọmokhuo ọsi Fero, ọ da hẹ ọle Mozis.
Jehova be re ihaosa nin Amram, Jokẹbẹd, bi Meriam bhi urẹọbhọ bi izebhudu nin ele rẹman? Ehe! Amram bi Jokẹbẹd da rẹkpa imọn nesele nin Meriam bi Erọn rẹ hoẹmhọn Jehova yẹ ha ga ọle. Ele da yẹ daghe ọle ghe Jehova wo ha gbega Mozis. Baibo bha taman mhan si Amram bi Jokẹbẹd nyẹnlẹn sẹbhi ẹghe nin Jehova rẹ munhẹn ha noo Mozis. (Ex. 6:20) Ọkpakinọn, ẹlo Meriam bi ọsi Erọn sẹbhọ. Ẹlo ele sẹbhi emhin ọhan-ilo kẹkẹ nin Jehova noo Mozis rẹ lu. Ele ea—wo manman re urẹọbhọ bi izebhudu man beji ele rẹ ha ga Jehova. Bhi uhọnmhọn-ọta nọn ki sẹ ọle bhi egbe, mhan dẹ luẹ ẹmhọn ebi idia nin Mozis da wanre diayẹ bi ebezẹle nin ọle da zẹ rẹ ga Jehova.
Tie ọne okha bhi Baibo:
Exodus 1:6–2:10
Inọnta:
Be Shifra bi Pua ne rẹkpa ikhuo rẹ biẹ bi azagba-uwa ọsi Mozis rẹ re izebhudu man yẹ?
Manman Guanọ Otọle
1. Emhin nela rẹman ghe ibhokhan Izrẹl gene nyẹnlẹn bhi otọ Ijipt? (g04 4/8 4 ¶4–5 ¶1)
2. Be rẹman ghe, a gene ha noo okhuale nan re paparọs lu bhi otọ Ijipt? Be rẹman ghe ebi Baibo tale rẹji uhi nin Fero gbe nan rẹ gbono imọn ọsi ibhokhan Izrẹl a ẹmhọanta nọn? (g04 4/8 6 ¶1-2) 1
Christine Osborne Pictures/Alamy Stock Photo
Ifoto 1: A yẹ wo noo ọne ilunmhun natiọle paparọs rẹ lu okọ ẹlẹnan
3. Be mhan lẹn rẹji ene ikhuo ne ha rẹkpa ibhokhan Izrẹl rẹ biẹ? Be Jehova rẹ nan erọnmhọn nin ele yẹ? (w03 11/1 8 ¶3-4; it “Ene Rẹkpa Ikhuo Rẹ Biẹ”) 2
Ifoto 2
4. Be Meriam rẹ rẹman yẹ ghe ọle wo manman ha mhọn urẹọbhọ rẹ dọ sẹbhi ẹghe nin ọle rẹ dọmanlẹn? (ijwia uhọnmhọn-ọta 7 ¶14-18)
Ria Eria Nyan Emhin Nin Uwẹ Luẹle
Be ene biẹ ọmọn ha sabọ miẹn luẹ bhi obọ Amram bi Jokẹbẹd?
Be ibhio ne na ẹkẹ ọkpa vae ha sabọ miẹn luẹ bhi obọ Meriam? 3
Ifoto 3
Be uwẹ ha rẹ sabọ re egbe khọkhọ Shifra bi Pua yẹ bhi uwedẹ nin ele rẹ izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn ene ẹbho nan le sade a riọ ele kpanọ bhi uu?
Sẹyẹ Fẹ Ene Emhin Nan Ghe
Fẹ ebi mhan ha sabọ miẹn luẹ bhi obọ ene ikhuo nin ofẹn bha ha mun rẹ gbobọrauhi nọnsi Fero.
“Ikhuo Ne Re Ọkhọle Nọnsi Jehova Ha Ghọnghọn” (w03 11/1 8-9 ¶3-5)
Be mhan rẹ lẹn yẹ ghe Jehova i da fikekegbe eria ne hẹnmhọn nanlẹn, ne bha ji ofẹn eria ha mun ele?