6 REBEKA
Ọle Da Muegbe Rẹ Zẹ Azagba-uwa Nọnsọle Obọ
BEJI ọ rẹ bu ọsemuan, nin ẹbho rẹ dọ ha sa amẹn ọbhi uwa, Rebeka da mun udede akhe ha khian omin nin ọle dọ sa amẹn. Ẹsọn nin ọle miẹn ukpẹdẹ-ukpẹdẹ khọnan. Ọkpakinọn, bhi ọne ẹghe nan, ọle da daghe eriọbhe bi kẹtẹkẹtẹ nọnsele bhi egbegbe ọne omin! Ọrẹyiriọ, ọle da sẹyẹ ha khian isi ọne omin dọ sa amẹn vuọn akhe nọnsọle.
Beji ọle rẹ mun ọne udede akhe khian uwa, okpia ọkpa bhi ẹwẹ ene eriọbhe ne mundia bhi isi ọne omin da runẹ bu ọle re, yẹ taman ọlẹn yọle, “Wowo, sa obhi amẹn khere nin mẹn wọn bhi akhe nọnsẹ.” Rebeka da re ẹjẹje rẹkpa ene eriọbhe nan. Ọle da wo miẹn ele ọbhi egbe. Rebeka da yọle: “Ebeanlẹn mẹn, miẹn amẹn nin uwẹ wọn.” Bhiriọ ọle da ki sa amẹn nanlẹn wọn rẹ sẹbhọ ghe, ohanmhẹn amẹn bha yẹ ha gbe ọle.
Ọkpakinọn, ọ i yi ọne okpia ọkpa ọle sa amẹn nan wọn. Ọle da sẹyẹ sa amẹn nin kẹtẹkẹtẹ igbe ọsi ene eriọbhe. Ọ da wo han ene eriọbhe ilo beji ọne ọmanmhẹn nan nọn mhọnse a rẹ ha runẹ-yo runẹ-re rẹ sa amẹn nin elanmhẹn nọnsele wọn, rẹ sẹbhọ ghe, ohanmhẹn amẹn bha yẹ ha gbe ene elanmhẹn. Ọne okpia da ki nọọn ọlẹn ẹmhọn aba ọle. Ọle da yẹ nọọn ọlẹn si ele dẹ sabọ gbe ukpasọn ọkpa bhi isele. Rebeka da wo miẹn ele ọbhi egbe. Ọle da man ele eji ele ha da nowẹ bhi uwa ọsi aba ọle. Ọle da yẹ re ebale nin elanmhẹn nọnsele le.
Ọle bha lẹn ghe Jehova hi ọnọn lu ọle nin ọle miẹn ọne okpia nan. Asabọmiẹn ghe Ẹli-iza nin ọguọmhandia nọnsi Ebraham, ọle hi ọne okpia nọn ne Rebeka talọ. Ebraham wo gbaẹkẹ ọle. Uzana ne bunbun ne gbera ọkuẹsẹ ọne ẹghe nan, Ebraham da taman ọlẹn nin ọle ha khian eje ree dọ guanọ okhuo nin Aiziki nin ọmọn nọnsọle. Aiziki hi ọnọn ha le emhin nesi Ebraham bhi uku. Ebraham da taman Ẹli-iza nin ọle guanọ okhuo bhi azagba-uwa nan da ga Jehova. Bhiriọ, Ẹli-iza da bhii Jehova bhi erọnmhọn nin ọle rẹkpa ọle. Ọle da bhii ghe, nin ọmanmhẹn nin Osẹnobulua ha zẹ nọn ha yi okhuo Aiziki miẹn ele ọbhi egbe. Ọnan hi ebi Rebeka wo lu. Ọle da wo miẹn ele ọbhi egbe!
Rebeka bha siegbe re ikeke rẹ miẹn ene eriọbhe nan ọbhi egbe arẹmiẹn ọle bha sẹ ka miẹn ele khẹ. Bhi ọsi ẹmhọanta, bhi ẹghe ẹdẹlẹ, ofẹn i mun ẹbho rẹ miẹn eriọbhe ọbhi egbe. Ọkpakinọn, emhin ki wo dikẹ ẹlẹnan nian. Ẹbho ne bunbun wo “fi bhi ẹlo, emhin esili iyẹ . . . yẹẹ ele.” (2 Tim. 3:1, 3) Arẹmiẹn ọ wo gene lẹkhẹ nan rẹ ha miẹn eriọbhe ọbhi egbe ẹghenin, ijiẹmhin esili Rebeka yẹ wo re ọbhi otọ nin mhan. Ọle yẹ wo re izebhudu man bhi uwedẹ ebhebhe.
Ẹghe nin ele rẹ sẹbhi uwa nọnsi Rebeka, ẹghenin Rebeka rẹ lẹn ebezẹle nin ene eriọbhe nan da na eje reele vae. Bẹtuẹ nin aba Rebeka bi ọmọn nọnsọle nin Leban da tie Ẹli-iza nin ọle dọ deba ele le ebale. Bhi ọsi ọhẹnhẹn, Ẹli-iza bha ka deba ele le ebale, ọle da ha guanọ nin ọle ka taman ele ebezẹle nin ọle da vae. Ọle da taman ele ebi Jehova rẹ rẹkpa ọle yẹ rẹ miẹn Rebeka. Bẹtuẹ bi Leban da gene daghe ọle ghe Jehova hi ọnọn rẹkpa ọle. Bhiriọ, ele da yọle: “Obọ Jehova ọnan na vae.”
Ẹghe nin Rebeka ki rẹ lẹn ghe iho nọnsi Osẹnobulua nọn nin ọle rẹ sibhi uwa nọnsọle re ha khian agbaẹbho ọbhebhe dọ bọ okpia nin ọle bha sẹ ka miẹn khẹ, be ọle ki lu yẹ?
Be bhọ Rebeka ha ki lu yẹ nian? Ebraham ka taman Ẹli-iza ghe, asabọmiẹn ọne okhuo i da ka rẹkhan ọlẹn vae bhi otọ Kenan. Ọnan rẹman ghe Rebeka dẹ sabọ zẹ si ọle dẹ yo la ọle i da yo. Ẹdẹ ki we, Ẹli-iza da nọọn ele yọle si ọle dẹ sabọ re Rebeka rẹkhan egbe nian. Azagba-uwa ọsi Rebeka da ki nọọn Rebeka si ọle dẹ rẹkhan Ẹli-iza. Ọle da wanniẹn ele yọle: “Mẹn muegbe nin mẹn rẹ ha khian.” Ọle da wo muegbe rẹ zẹ azagba-uwa nọnsọle obọ ha khian eje manman ree arẹmiẹn ghe, ọle bhọ i yẹ da sabọ miẹn ele ghee. Bezẹle nin ọle da re izebhudu nọn sẹ inian man? Asabọmiẹn ọle tobọle daghe ọle ghe, ọnan hi ebe Jehova guanọ nanlẹn.
Ele ki gbe uzana ne bunbun bhi uwedẹ, ele da sẹbhi agọ nin Ebraham ye bhi Kenan. Beji oẹnlẹn ha defia, Rebeka da daghe okpia ọkpa nọn fẹkẹ ha khian bhi ẹkẹ ugbo, ọle da yẹ wo ha ria eria nyan emhin eso kpataki. Ẹghe nin ọle ki rẹ lẹn ghe Aiziki ọne okpia nan khin, ọle da re ugbaneto nọnsọle rẹ gue uhọnmhọn nin ọle rẹ rẹman ghe ọle ka nin ọle rẹ bọ Aiziki bhi ọdọ. Ikpe 40 Aiziki ha ye bhi ọne ẹghe nan, sẹyẹ, ọle wo mhọn oyẹẹ bi ẹkẹ-ẹjẹjẹ. Ikpe ea ọ ki ye nian nin Sera nin inẹn ọlẹn yu. Ọrẹyiriọ, ọle da sẹyẹ wo ha viẹ ọle. Rebeka dẹ be sabọ ha yi okhuo nọn mhẹn rẹji Aiziki? Ọle dẹ be degbere nin Aiziki nọn ki da ha yi ebeanlẹn ọlẹn nian, beji Jehova rẹ mhanmhan ọlẹn? Baibo rẹman ghe ọle wo lu iriọ tee. Baibo tẹmhọn ebi ẹmhọn Rebeka dia Aiziki bhi egbe yẹ. Ọ da yọle: “Ọle da wo dọ hoẹmhọn ọlẹn. Aiziki da miẹn ikoudure bhi akhiẹ nin ọle ha ye ranmhude inẹn ọlẹn nọn yu.”
Tie ọne okha bhi Baibo:
Genesis 24:1-67; 25:20
Inọnta:
Uwedẹ nela Rebeka rẹ re izebhudu man?
Manman Guanọ Otọle
1. Be ọ dia Ẹli-iza bhi egbe yẹ ẹghe nin Ebraham rẹ ha mhọn imọn? Sokpan be rẹman ghe ọle bha ji ẹkẹ ha khọ ọle? (Gen. 15:2-4; 24:12; w97 1/1 30 ¶2)
2. Bezẹle nin Ebraham da ha guanọ nin Rebeka bu Aiziki re bhi Kenan, ọ i yi nin Aiziki rẹ bu Rebeka bhi agbaẹbho nọnsọle? (w97 1/1 30 ¶3)
3. Be ọne emhin nan ne nin Rebeka bi azagba-uwa nọnsọle mundia nan? (it “Rebeka” ¶4)
4. Gbotọle fanọn an ebi okhian nin Rebeka khian rẹ na bhi Heran rẹ sẹbhi Nẹgẹb nọn yi agbaẹbho ọsi Aiziki diayẹ. (wp16.3 15 ¶1) 1
www.LifeintheHolyLand.com
Ifoto 1: Ẹbho ne bunbun ka rẹ wo ha nyẹnlẹn bhi Nẹgẹb. Enan Ebraham da ha re ihuan nesọle ne bunbun kọn
Ria Eria Nyan Emhin Nin Uwẹ Luẹle
Be mhan ha sabọ miẹn luẹ bhi obọ Ebraham, Rebeka, bi Aiziki ahamiẹn mhan ho nin mhan zẹ ọria nin mhan ha bọ la re? (Gen. 24:2, 3; 27:46–28:1)
Rebeka wo ha wẹnna kaka, zẹ emhin bhi obọ, yẹ mun ekpẹn nin ẹbho. Uwedẹ nela ibhio mhan nin ikhuo ẹlẹnan ha rẹ sabọ re egbe khọkhọ ọle? 2
Ifoto 2
Be uwẹ ha rẹ re egbe khọkhọ Rebeka yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Rebeka le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Luẹ ebi Rebeka rẹ sẹyẹ ha re izebhudu man yẹ beji ọle bọ ọdọ fo, yẹ ha mhọn ọmọn.
Emhin nela ibhokhan ha sabọ miẹn luẹ bhi obọ Rebeka?
“Ikpẹ Esili Nesi Rebeka” (Usun Uhọnmhọn-ọta Ne Ribhi Itanẹt “Ifoto Nin Ibhokhan Rẹ Luẹ Emhin”)