Ọle Da Hẹnmhọn Nin Osẹnobulua Arẹmiẹn Ọ Bha Lẹkhẹ

EBRAHAM da fẹkẹ ha khian eji Jehova yọle nin ọle ha khian. Ọle wo muegbe nin ọle rẹ ha khian. Arẹmiẹn ọle sẹ ka khian okhian ne manman ree bhi iẹnlẹn nọnsọle khẹ, ọne okhian nan nọn bha manman ree, ọle kaka nẹ.

Jehova da taman Ebraham yọle: “Huẹan, re Aiziki nin ọmọn nọnsi uwẹ, ukpọmọn ọkpa sẹsẹ nọnsẹ, nin uwẹ yẹ manman hoẹmhọn ọlẹn, bha ha kpanọ ha khian otọ ọsi Moraya. Uwẹ ha re ọle zọese bọsi izọese nan tuẹ a ji mẹn bhi okhun oke nin mẹn ha rẹman uwẹ.” Ọle da wo ha ria ẹmhọn ọne emhin nan nin Jehova yọle nin ọle lu. Jehova lẹnmhin ghe Ebraham manman hoẹmhọn Aiziki. Bhiriọ, bezẹle nin Ọle da yọle nin ọle re ọne ọmọn rẹ zọese? Be Ebraham ha rẹ sabọ ha mhọn ọne urẹọbhọ yẹ nọn ha re izebhudu nanlẹn rẹ lu ebi Jehova yọle nin ọle lu?

Baibo da tie Ebraham “aba ọsi ẹbho . . . ne mhọn urẹọbhọ.” (Rom 4:11) Ọkuẹsẹ ọne ẹghe nan, Ebraham bhọ ki ka mhọn urẹọbhọ nọn ziẹnlẹn fo. Sẹyẹ, Jehova wo rẹkpa ọle rẹ ha ziẹn ọlẹn. Bhi ọsi ijiẹmhin, ikpe ne bunbun ne gbera ọkuẹsẹ ọne ẹghe nan, Osẹnobulua da taman Ebraham ghe ọle dẹ dunmhun agbaẹbho ọsi Sodọm bi Gomora a. Ọnan da rẹso Ebraham sẹbhọ ghe, ọle da nọọn Jehova si ọle dẹ fuẹn ẹbho ne mhẹn bi ẹbho ne i mhẹn an kugbe. Jehova da fẹkẹ ji Ebraham lẹn ghe, ọle i da dunmhun ene agbaẹbho a sade ọle bhọ zẹwẹ miẹn ikpeta ẹbho ne mhẹn bhọ. (Gen. 18:​16-33) Ebraham bha yelea ebi ọle luẹ bhi ọne emhin nan nọn sunu, ghe: Osẹ nọn lu emhin nọn gbale nọn yẹ mhọn itohan ọle Jehova khin.

Obhi ẹghe khere beji ọnan sunu fo, Jehova da lu emhin ọhan-ilo nin Ebraham bi Sera. Arẹmiẹn ghe Sera bu ikpe 90, sẹyẹ, Ebraham bu ikpe 100, Osẹnobulua da rẹkpa ele rẹ sabọ biẹ ọmokpia nin ele ha tiọle Aiziki! Ebraham da dọ luẹ kere ghe emhin soso i ribhọ nin Jehova i da sabọ lu, ghe, Jehova dẹ sabọ re iẹnlẹn nin emhin nọn hi ki rẹ khin nọn rẹ yu fo. (Rom 4:​18, 19) Sẹyẹ, Ebraham bha ye ọne emhin nan an nin ọle luẹle rẹji Jehova.

Bhi ejayenan nian, ikpe 25 gbera. Edandan i ribhọ ghe, Ebraham wo ha ria eria nyan ene emhin nan nin ọle luẹ rẹji Jehova beji ọle rẹ khian oke ọsi Moraya. Ọle ki da dọ ha mhọn ọne izebhudu ghe: Aharẹmiẹn Aiziki yumhin, Jehova dẹ sabọ re ọle kpanọ! (Hib. 11:19) Ọne ikhuaẹloghe nan nin Ebraham ha mhọn, da re ọne izebhudu nanlẹn rẹ wo ha khian eji ọle ha da lu ọne izọese.

Ebraham ki ha bu oke nin Jehova yọle nin ọle diọ i, ọle da taman eguọmhandia nesọle nin ele mundia khẹ ọle beji ọle bi Aiziki ha rẹ ko dọ lu ọne izọese. Ẹmhọn nin Ebraham tale rẹman ghe, ọle wo rẹọbhọ ghe, ọle bi Aiziki dẹ ko fikiere. Ọne ẹghe ki da sẹ nian nin Ebraham rẹ re Aiziki zọese beji ọ ki kẹ ele veva bhi ọne uke oke. Aiziki bha ha ne aba ọle nọn ki dọmanlẹn gbegbe beji ọle re emhin gbanọ ọle obọ bi oẹ, yẹ mun ọlẹn fiọbhi ukhuo izọese. Ebraham ki lu ọnan fo, ọle da muegbe nin ọle rẹ lu emhin nin aba nọn hi ki rẹ khin nọn mhọn oyẹẹ i da lu. Ọle da re ọgha okhun nin ọle rẹ gbe ọmọn nọnsọle a. Ọle ki da re obọ sotọ beji ọle họn ẹhi nọnsi Osẹnobulua sotie elin nọnsọle yẹ taman ọlẹn yọle: “Hẹi kuan ọne ọmọn nin.”

Bhiriọ, Osẹnobulua da khuẹnmhẹn Ebraham bhi urẹọbhọ nin ọle rẹman bi uwedẹ nin ọle rẹ hẹnmhọn nanlẹn. Ọle da gbo kie ve ọne ive nin ọle ka ve nin Ebraham, ghe, ọle dẹ nan erọnmhọn nanlẹn. Sẹyẹ, ọle dẹ re imọn nesọle bunbun, yẹ lu ọle beji “ẹbho rebhe ne ribhi ọne otọ agbọn nan rebhe” ha da manman miẹn erọnmhọn ranmhude emhin nin ọle lu.

Ọne ive nan nin Jehova ve nin Ebraham yẹ wo ha munsẹ ẹlẹnan. Ẹbho dẹ miẹn elele bhọ rẹ sẹbhi ighegheghe. Ọne okha ọsi Ebraham nan yẹ wo re emhin ọbhebhe man rẹji Jehova. Ọ rẹkpa mhan rẹ lẹn ebi Jehova tobọle ziẹngbe ọle, nin ọle rẹ miẹn eria ne mhẹn fan. Beji Ebraham rẹ muegbe rẹ re ọmọn nin ọle hoẹmhọnlẹn rẹ zọese, iriọ Jehova yẹ rẹ muegbe rẹ re Ukpọmọn ọkpa sẹsẹ nọnsọle rẹ zọese nin eria. (Jọni 3:16) Bhiriọ, ẹghe nọn hi ki rẹ khin nin mhan rẹ tie ebi Ebraham lu nin ọle rẹ muegbe rẹ re ukpọmọn ọkpa sẹsẹ nọnsọle rẹ zọese, ọ wo ye mhan re ebi Jehova hoẹmhọn mhan sẹ yẹ.

Bii Ebraham, urẹọbhọ nọnsẹmhan dẹ wo manman ha ziẹn ọbhọ sade mhan ria eria nyan ẹmhọn nesi Jehova bi emhin nin ọle lu bhi ẹghe nọn gbera. Beji urẹọbhọ nọnsẹmhan ha rẹ ha ziẹn ọbhọ, iriọ mhan ha yẹ rẹ manman ha mhọn izebhudu. Ọ bha khẹke nin mhan ha kpokpo egbe si Osẹnobulua dẹ yọle nin mhan lu emhin nin ọle yọle nin Ebraham lu. Rẹ na ẹghe ọsi Ebraham ha vade, ọria ọbhebhe i sẹ ribhọ nin Jehova taman nin ọle lu emhin nọn sẹriọ. Ọkpakinọn, ebi mhan lẹn hi: Emhin nọn hi ki rẹ khin nin Osẹnobulua yọle nin mhan lu, urẹọbhọ nin mhan mhọn da ọle dẹ re ọne izebhudu nin mhan rẹ lu ọle. Sẹyẹ, erọnmhọn nin mhan da miẹn bhọ sade mhan hẹnmhọn nin Osẹnobulua, dẹ kpọnọ gbera beji mhan mhọn bhi ọkhọle!

Tie ọne okha bhi Baibo:

• Genesis 22:​1-19

• Hibru 11:​11, 12, 17-19

Inọnta:

Uwedẹ nela Ebraham rẹ re izebhudu man bhi ọne ẹghe nan bhi iẹnlẹn nọnsọle?

Manman Guanọ Otọle

1. 1. Be rẹ mhan rẹọbhọ ghe Ebraham gene nyẹnlẹn? (g 5/12 18, ẹkpẹti; it “Ebraham” ¶22-23) 1

   Ewanniẹn nọnsẹ

   

Ria Eria Nyan Emhin Nin Uwẹ Luẹle

• Be ikhuaẹloghe nin Ebraham ha mhọn rẹ rẹkpa ọle yẹ rẹ ha mhọn izebhudu? Mhan da ha ria ẹmhọn ikhuaẹloghe nin mhan mhọn, be ọ ha rẹ re izebhudu nin mhan yẹ? 3

  Ewanniẹn nọnsẹ

  

• Ebraham da re izebhudu man bhi ẹghe nin ọle rẹ muegbe rẹ re ukpọmọn ọkpa nọnsọle zọese ji Osẹnobulua. Be mhan ha rẹ sabọ re egbe khọkhọ Ebraham yẹ sade . . .

  • isẹhoa zegbere nin mhan rẹ tẹmhọn Osẹnobulua? (Hib. 13:15)

    Ewanniẹn nọnsẹ

  • mhan mhanmhan ebi mhan ha rẹ noo emhin nin mhan mhọnlẹn yẹ? (Prov. 3:9)

    Ewanniẹn nọnsẹ

  • mhan họn ghe ibhio mhan nin mhan ko ga guanọ urẹkpa? (Fil. 4:18)

    Ewanniẹn nọnsẹ

• Uwedẹ ebhebhe nela uwẹ ha rẹ sabọ re egbe khọkhọ Ebraham bhi izebhudu nin ọle rẹman nan tẹmhọnlẹn bhi ọne uhọnmhọn-ọta nan?

  Ewanniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewanniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewanniẹn nọnsẹ

• Be mẹn ha nọọn Ebraham la Aiziki le, sade a riọ ele kpanọ bhi uu?

  Ewanniẹn nọnsẹ

Sẹyẹ Fẹ Ene Emhin Nan Ghe

Fẹ ebi a rẹ re ọne okha nan man yẹ.

Re Egbe Khọkhọ Ele Bhi Uwedẹ Nin Ele Rẹ Re Urẹọbhọ Man—Ebraham, Obọ 2 (11:10)

Be Ebraham rẹ dọ manman kiẹn ọmọẹ Jehova yẹ? Be uwẹ ha rẹ sabọ ha ziẹn ikolu nin uwẹ bi Jehova ko mhọnlẹn yẹ?

“Jehova Da Tie Ebraham ‘Ọmọẹ Mẹn’” (w16.02 8-12)