4 EBRAHAM
Okpia Ọhẹnhẹn Nọn Khọn Okhọn Nọn Khiale
JEHOVA da ve ive kpataki nin Ebraham nin ọmọẹ ọle. Ọne ive nan dẹ rẹso iẹnlẹn ọsi ọrebhe ne nyẹnlẹn bhi ọne otọ nan. Jehova da taman ọlẹn yọle: “Imẹn dẹ re uwẹ kiẹn agbaẹbho nọn khua.” Sẹyẹ, Jehova da re otọ nọn mhọnse a man Ebraham, ọne otọ ọne agbaẹbho ha da ha nyẹnlẹn. (Gen. 12:2; 13:14, 15) Ọkpakinọn, Esu da ha guanọ nin ọle gbe Ebraham an beji a ha da miẹn ọle bha ha mhọn ọmọn. Esu lẹnmhin ghe ọne “ọmọn” nan ve ive ọle nọn ha gbe ọle khuelo, yẹ fuẹn ọne agbọn nan nọn i mhẹn an, ulin-uwa ọsi Ebraham ọle ha na vae.—Gen. 3:15.
Bhiriọ, Esu da wo ha ne Ebraham bi azagba-uwa nọnsọle daan. Ọkpa bhi eria bhi azagba-uwa ọsi Ebraham nọn manman loya bhi obọ Esu da ha yi Lọt. Ebraham da re isẹhoa nin Lọt rẹ ka ọle zẹ eji ọle ho nin ọle diọ i bhi ọne Otọ nan ve ive ọle. Lọt da zẹ eje mhẹn nẹ bhi ọne otọ. Eje ọle zẹle wo sikẹ agbaẹbho ọsi Sodọm. “Eluemhin-ebe ikpia ne ribhi Sodọm ha khin. Ele wo manman ha lu emhin ebe da Jehova.” (Gen. 13:8-13) Ẹkẹ da wo ha khọ ojie ọsi Sodọm bi ijie enẹn ebhebhe ne ha gbẹloghe bhi agbaẹbho ọsi Kenan, nin ele rẹ ha ha igho uhọnmhọn ji ojie ọsi Ilam. Bhriọ, ele da sọtẹ da ọle. Ranmhude ọnan, ojie ọsi Ilam bi ijie ea ebhebhe da na bhi eje reele vae dọ khọn ijie ọsi Kenan miotọ. Ele ki khọn ele fo, ele da fikie diọbhi otọ nọnsele, yẹ muno emhin bi ẹbho bhi otọ ọsi Kenan rẹkhan egbe. Lọt bi azagba-uwa nọnsọle deba bhi ene ẹbho nin ele muno.
Ebraham da sun ikpia nesọle ne bun sẹbhi itue 318 rẹ dọ ne ijie enẹn ne ziẹnlẹn khọnlẹn
Be Ebraham ha ki lu yẹ? Ebraham ha rẹ sabọ yọle ghe Lọt tobọle si ọkakale ji egbe ọle, ranmhude ọle tobọle zẹ nin ọle rẹ diọbhi enin. La, ọle ha rẹ sabọ ha kpokpo-egbe ghe, ahamiẹn ọle ho nin ọle dọ hinmhin Lọt, ọle dẹ mun okhọn bu ene ijie nin. Ọkpa bhi ene ijie bhọ gbẹloghe otọ ọsi Shaina. Ọsun-ohuan Ebraham khin, ọle bha manman guẹ ebi a rẹ khọn yẹ. Bhiriọ, be ele ha rẹ sabọ khọn ene ijie ne kugbe nan yẹ, ne manman mhọn ahu? Rẹ deba ọnan, agbaẹbho ọsi Shaina Ebraham na vae. Ahamiẹn Ebraham mun okhọn bu ojie ọsi Shaina, asabọmiẹn ghe ọle i yẹ da kie sabọ fikie ha khian uwa nọnsọle bhi Ọr. Ọkpakinọn, Ebraham bha zẹwẹ ha ria emhin nọn dia iriọ. Ọle lẹn ebi Jehova guanọ nin ọle lu.
Bhi ọne ẹghe nan, asabọmiẹn eria ne ribhi uwa ọsi Ebraham ki dẹ bun gbera itue 1,000. Ọle da si eguọmhandia nesọle nin ikpia koko, ne bun sẹbhi 318, ne guẹ ebi a rẹ khọnlẹn yẹ. Ele rebhe da mun egbe rẹ dọ khọnlẹn. Ele da kpanọ dọ ne ene ijie khọnlẹn. Ele da khu eghian ele kere bhi obọ ọsi nọt bhi agbaẹbho ọsi Dan. Ebraham da wa ikpia nesọle a diọbhi usun eva, bhiriọ ele da ki mun okhọnlẹn bu ele bhi ọsasọn. Arẹmiẹn eyokhọnlẹn ọsi Ebraham bha manman bun, ele da sabọ khọn eghian nọnsele rẹ sẹbhọ ghe eghian ele da munhẹn ha nẹ. Ene ijie enẹn bi eyokhọnlẹn nọnsele da nẹ diọbhi ẹkẹ obọ ọsi nọt, Ebraham da sẹyẹ khu rẹkhan ele. Ele ki ha sikẹ Damascọs, ọle da khọn ele miotọ sẹsẹsẹ, yẹ miẹn ele emhin rebhe nin ele ka ne bhi otọ Kenan. Lọt bi azagba-uwa nọnsọle da ki miuhọnmhọn!
Izebhudu bi urẹọbhọ nin Ebraham rẹman be ha ti Jehova bhọ? Mhan wo miẹn ewanniẹn rẹji ọne inọnta nan bhi ẹghe nin Ebraham rẹ ha gbera egbegbe agbaẹbho ọsi Selẹm. Mẹkizẹdẹk nọn yi ojie ọsi ọne agbaẹbho nin da yẹ ha yi ohẹn ọsi Jehova. Ọne ojie nan nọn yẹ yi ohẹn, da bu Ebraham re yẹ nan erọnmhọn nanlẹn. Ebraham da ne ọkpa bhi igbe bhi emhin ne mhẹn nin ọle muno bhi okhọn nin Mẹkizẹdẹk.
Edandan i ribhọ ghe, Jehova hi ọnọn rẹkpa ele rẹ sabọ khọn ọne okhọnlẹn nan, ranmhude okhọn nọnsọle nọn. Baibo bhọ da tẹmhọn, ebe nan gbẹn okhọn ọsi Jehova ọ i. (Num. 21:14) Asabọmiẹn okhọn nin Ebraham khọn bhọ hi okhọn ọhẹnhẹn nan gbẹn ọbhi ọne ebe. Ikpe ne bunbun ki gbera, imọn ọsi Ebraham da mun okhọn bu ibhokhan Kenan ne nyẹnlẹn bhi ọne Otọ nan ve nin ibhokhan Izrẹl. Ẹghe-ẹghe Jehova wo rẹ ha rẹkpa ele, rẹ khọn ene ẹbho nan ne i mhẹn miotọ.
Ọkpakinọn, ẹghe nin ibhokhan Izrẹl ki rẹ fikekegbe Osẹnobulua, ọle bha yẹ ha gbega ele. Bhi ọkike ọle, ẹghe nin ele ki rẹ he Ọmọn nọnsọle nọn yi ọne Mezaya, Jehova da wo fikekegbe ele. Jehova bha yẹ ha nan erọnmhọn nin ele, ọle ki da ha nan erọnmhọn nin usun enanzẹle ne ribhi odotọ ugbẹloghe ọsi Kristi. Jesu da taman edibo nesọle nin ele hẹi deba okhọn nan khọn bhi ọne agbọn nan. (Mat. 26:52) Sokpan, ọle da taman ele nin ele ha khọn okhọn nan i daghe, ọnin hi, nin ele rẹ ha ne Esu dan, yẹ he iman-emhin ohoghe bi uwedẹ nọn i mhẹn nan rẹ nyẹnlẹn nin Esu man ẹbho le. Jesu da wo re ijiẹmhin esili ọbhi otọ rẹ rẹman ghe, ọkhẹke nin mhan ha mhọn izebhudu beji mhan ha da sabọ khọn ọne okhọnlẹn nan sotọ.
Tie ọne okha bhi Baibo:
Genesis 14:1-24
Inọnta:
Uwedẹ nela Ebraham rẹ re izebhudu man bhi ọne ẹghe nan bhi iẹnlẹn nọnsọle?
Manman Guanọ Otọle
1. Emhin nela a miẹn nọn rẹman ghe ẹmhọanta ọne okha nan gene khin? (w89 7/1 5 ¶4–6 ¶1)
2. Beji Baibo rẹ gbotọle fanọn an, ijela Sodọm bi Gomora ha sabọ ha ye? Be mhan miẹn nọn rẹ mhan ta iriọ? (it “Okpẹdẹ Ọsi Umhẹn” ¶6) 1
BestTravelPhotography/iStock via Getty Images Plus
Ifoto 1: Rẹ dọ sẹbhi ẹlẹnan, eran ne diabe eran udin bi ebi a kọle kẹkẹ wo ha lu nọnsẹn bhi adesẹ Saot bi Ist bhi egbegbe Okpẹdẹ Ọsi Umhẹn (Salt Sea). Enan ẹbho ne bunbun rẹọ i ghe Sodọm ha ye bhi ẹghe ẹdẹlẹ
3. Ojie bi ohẹn ọsi Selẹm Mẹkizẹdẹk ha khin. Ijela Selẹm ha ye? (it “Selẹm”)
4. Uwedẹ nela Mẹkizẹdẹk rẹ diabe Jesu? (it “Ojohẹn” ¶27-28) 2
Ifoto 2
Ria Eria Nyan Emhin Nin Uwẹ Luẹle
Ebraham da ji Lọt da zẹ eje mhẹn nẹ bhi ọne otọ. Be mhan ha rẹ sabọ re egbe khọkhọ Ebraham yẹ bhi uwedẹ nin mhan rẹ ne ẹbho bhi azagba-uwa nọnsẹmhan, ibhio mhan nin mhan ko ga bi ẹbho ebhebhe lu emhin? 3
Ifoto 3
Be mhan miẹn luẹ bhi uwedẹ nin Ebraham rẹ muegbe rẹ dọ hinmhin Lọt?
Uwedẹ ọbhebhe nela uwẹ ha rẹ sabọ re egbe khọkhọ Ebraham bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Ebraham bi Lọt le sade a riọ ele kpanọ bhi uu?
Sẹyẹ Fẹ Ene Emhin Nan Ghe
Zilo nyan ebi Ebraham rẹ sabọ dọ re ọkhọle rebhe mun udu nyan Jehova yẹ.
Re Egbe Khọkhọ Ele Bhi Uwedẹ Nin Ele Rẹ Re Urẹọbhọ Man—Ebraham, Obọ 1 (10:43)
Be Ebraham rẹ re izebhudu man yẹ ọkuẹsẹ ọle bhọ sibhi Ọr re?