A Da Je Pọl Ha Khian Rom

Jerusalẹm, ọle Pọl da kpẹn okhian nọnzi ea nin ọle yo nin ọle rẹ ha tẹmhọn Osẹnobulua. Bhi enin, a da mun ọlẹn ọbhi ighan. Bhi ọsasọn, Jesu da ne Pọl talọ bhi imianlo. Ọle da taman ọlẹn yọle: ‘Uwẹ dẹ diọbhi Rom dọ tẹmhọn Osẹnobulua.’ A da mun Pọl sibhi Jerusalẹm re ha khian Sizaria. Ikpe eva ọle gbe bhi ighan bhi enin. Ẹghe nan ki rẹ ha ho nan guẹzọ nọnsọle bhi isira Fẹstọs nin Gọvanọ, Pọl da yọle: ‘Mẹn ho nin Siza guẹzọ nọnsẹmhẹn bhi Rom.’ Fẹstọs ki da yọle: “Beji a miẹn uwẹ yọle ghe uwẹ guanọ nin Siza talọ bhi ọne ẹmhọn nan, uwẹ dẹ bu Siza.” A da mun Pọl ọbhi okọ nọn khian Rom. Luk bi Aristakọs nin ibhio ọle nin ele ko ga da rẹkhan ọlẹn.

Beji ele rẹ ribhi okpẹdẹ, efi ọsi ọhanabẹ da munhẹn ha fi. Ọne efi da fi na bhi ikpẹdẹ ne bunbun. Ọrebhe bhi ẹkẹ ọne okọ da ha riale ghe ele dẹ yumhin. Ọkpakinọn, Pọl da taman ele yọle: ‘Ikpea, ẹhi ọkpa taman mẹn bhi ebhohiẹ yọle: “Pọl, hẹi ji ofẹn mun uwẹ. Uwẹ dẹ sẹbhi Rom. Sẹyẹ, Osẹnobulua dẹ hinmhin ọrebhe ne ribhi ọne okọ.” Bhiriọ, bha hẹi ji ofẹn mun bha! Imhan i da yu.’

Ọne efi da fi na bhi ikpẹdẹ 14. Akizẹbue, ele da daghe agbaẹbho ọkpa nin amẹn nẹga; Mọta a tie ọne agbaẹbho. Ele ki so ukene ekẹn mun bhi ẹkẹ ọne ẹdẹ, ọne okọ da hian ze, bhiriọ, ọ da ha nyanọn kua. Ọkpakinọn, itue 276 ne ha ribhi ẹkẹ ọne okọ da miuhọnmhọn. Eso da gua ha khian eji otọ ye, enekẹle da muno eran ne nyanọn kua bhi ọne okọ mhọn rẹ gua ha khian eji otọ nọn ka ye. Ẹbho ne nyẹnlẹn bhi Mọta da wo gbẹloghe ele. Ele da fi eranlẹn nin ele ha gha.

Uki ea ki gbera, eyokhọnlẹn ọsi Rom da mun Pọl ọbhi okọ ọbhebhe ha khian Rom. Ọle ki sẹbhi enin, Kristiẹn ne ribhi enin da bu ọle re. Pọl ki daghe ele, ọle da khuẹnmhẹn Jehova, sẹyẹ, ahu da do ọle bhọ. Arẹmiẹn onighan Pọl ha khin, a da sẹyẹ re otọ nanlẹn rẹ debhi uwa a; ọgbanegbe ọkpa da ha gbega ọle. Ikpe eva ọle gbe bhi enin. Ẹbho da dọ ha tuẹ ọle bhi enin. Ọle da ha tẹmhọn Agbejele man ene ẹbho, yẹ man ele ẹmhọn Jesu. Pọl da yẹ gbẹn ilẹta ji ene agbotu ne ribhi Esia Minọ bi Judia. Jehova wo gene noo Pọl rẹ wewe ọne ọta nọn mhẹn na bhi agbaẹbho ne bunbun.