Pọl Bi Timoti

Usẹn okpea Timoti ha khin. Agbotu nọn ribhi Listra ọle da ha ga. Obhokhan Grik aba ọle ha khin, inẹn ọle da ha yi obhokhan Ju. Egbe obhokhan, ọle Yunis nin inẹn Timoti bi odede ọle nin Lọis rẹ munhẹn ha man ọlẹn ẹmhọn Jehova.

Ẹghe nin Pọl rẹ sẹbhi Listra bhi okhian nọnzi eva nin ọle yo, ọle da daghe ọle ghe, Timoti wo manman hoẹmhọn ibhio ọle bhi agbotu, sẹyẹ, ọle wo muegbe rẹ ha rẹkpa ele. Pọl da taman Timoti nin ọle dọ deba ọle bhi iwẹnna nin ọle ha lu. Beji ele rẹ ko ha wẹnna, Pọl da ha man Timoti emhin, rẹ sẹbhọ ghe Timoti da dọ guẹ ebi a rẹ tẹmhọn Osẹnobulua yẹ, bi ebi a rẹ man emhin yẹ.

Ẹlinmhin nọn khiale da wo ha dia Pọl bi Timoti bhi eji ọ hi ki rẹ khin nin ele diọ i. Bhi asọn ọkpa, okpea ọkpa da taman Pọl bhi imianlo ghe nin ọle vae bhi Masẹdonia dọ rẹkpa ele. Bhiriọ, Pọl, Timoti, Sailas, bi Luk da diọbhi enin dọ ha tẹmhọn Osẹnobulua. Sẹyẹ, ele da mun agbotu ne bunbun gbọ bhi enin.

Ẹbho ne bunbun da munhẹn ha ga Osẹnobulua bhi Tẹsẹlonaika, nọn ribhi agbaẹbho ọsi Masẹdonia. Ọkpakinọn, ibhokhan Ju eso da ha mhọn ikhu da Pọl bi ene rẹkhan ọlẹn. Ele da si usun ẹbho koko rẹ dọ mun Pọl bi ene ikpea ne rẹkhan ọlẹn bu ene gbẹloghe ọne agbaẹbho. Ele da ha so yọle: ‘Ighian ọsi ugbẹloghe ọsi Rom ene ikpea nan khin!’ Bhiriọ, iẹnlẹn ọsi Pọl bi ọsi Timoti da ha ribhi okhẹnan. Ranmhude ọnan, ele da nẹ diọbhi Bẹria bhi ọsasọn.

Ẹbho ne ribhi Bẹria wo muegbe rẹ kaehọ ọne ọta nọn mhẹn. Ibhokhan Grik bi ibhokhan Ju ne ribhi enin da munhẹn ha ga Jehova. Ọkpakinọn, ẹghe nin ibhokhan Ju eso ki rẹ na bhi Tẹsẹlonaika vae, yẹ dọ ha si ozughu, Pọl da sibhi enin re ha khian Atẹns. Timoti bi Sailas da sẹyẹ debhi Bẹria a. Ele da ha re izebhudu nin ene Kristiẹn ne ribhi enin. Akizẹbue, Pọl da je Timoti fikie diọbhi Tẹsẹlonaika, nin ọle dọ rẹkpa ene Kristiẹn rẹ sabọ ziẹngbe ekpokpo nan ha kpokpo ele. Pọl da yẹ je Timoti diọbhi agbotu ebhebhe, nin ọle dọ re izebhudu nin ele.

Pọl da taman Timoti yọle: ‘A dẹ kpokpo ẹbho ne ho nin ele ga Jehova.’ A wo gene kpokpo Timoti, yẹ mun ọlẹn khue ranmhude urẹọbhọ nọnsọle. Ọle da wo ha ghọnghọn, ranmhude, ọnan re isẹhoa nanlẹn rẹ re asun-rẹkhan nin ọle mhọn da Jehova man.

Pọl da taman ibhokhan Filipai yọle: ‘Imẹn dẹ je Timoti bu bha. Ọle dẹ man bha ebi ọ gene mundia nan, nan rẹ ha khian bhi uwedẹ ẹmhọanta. Sẹyẹ, ọle dẹ man bha ebi a rẹ tẹmhọn Osẹnobulua yẹ.’ Pọl lẹnmhin ghe ọle dẹ sabọ mun udu nyan Timoti. Ele wo ko lu iwẹnna oga kugbe bhi ẹkẹ ikpe ne bunbun, sẹyẹ, imọẹ ele ha khin.