Emhin Nin Jesu Rẹman Jọni

Ẹghe nin Jọni nin odibo rẹ ha ribhi ighan bhi Patmọs, Jesu da re imianlo 16 kẹkẹ rẹji emhin ne ha sunu bhi ẹghe odalo man ọlẹn. Ene imianlo nin ọle miẹn da rẹman ebi a ha rẹ kpe elin nọnsi Jehova khia yẹ, ebi Agbejele nọnsọle ha rẹ vae yẹ, bi ebi a ha rẹ ha lu iho nọnsọle bhi ọne otọ nan yẹ beji a rẹ lu ọle bhi okhun.

Bhi ọkpa bhi ene imianlo, Jọni da daghe Jehova dotua bhi ojukhuo nọnsọle bhi okhun. Ewanlẹn ne bun sẹbhi itue 24 ne yọ ukpọn nọn fua, ne yẹ yọ ukparu ojie nan re igolu lu da nẹga ọle. Anyan da ha nyan bhi ọne ojukhuo, sẹyẹ, a da ha họn uromhin ọsi avan bhọ. Ene ewanlẹn 24 da debhẹre nin Jehova, yẹ ha ga ọle. Bhi imianlo ọbhebhe, Jọni da daghe usun ẹbho ne bunbun. Agbaẹbho kẹkẹ bhi ọne otọ agbọn nan rebhe ene ẹbho na vae, sẹyẹ, urolo kẹkẹ ele zẹ. Ele rebhe da wo ha ga Jehova. Jesu nọn yi ọne Ohuan, da wo ha gbẹloghe ele, yẹ dia ele diọbhi eji amẹn ọsi iẹnlẹn ye. Akizẹbue, bhi imianlo ọbhebhe, Jesu da munhẹn ha gbẹloghe bhi okhun bii Ojie, ene ewanlẹn 24 da yẹ deba ọle. Bhi imianlo nọn rẹkhan ọnan, Jọni da daghe ọle ghe Jesu ne ọne ẹnyẹn nọn khua, nọn yi Esu, bi ẹlinmhin-ebe nesọle khọnlẹn. Jesu da khu ele sibhi okhun re vae bhi ọne otọ nan.

Jọni da daghe ọne Ohuan bi ene itue 144,000 mundia bhi Oke Ọsi Zaiyọn. Ọle da yẹ daghe ẹhi ọkpa tin bhi okhun. Ọne ẹhi da ha taman ẹbho nin ele mun ofẹn Osẹnobulua, yẹ re uyi nanlẹn.

Bhi imianlo nọn rẹkhan ọnan, a da khọn okhọn ọsi Amagẹdọn. Bhi ọne okhọnlẹn, Jesu bi eyokhọnlẹn nesọle da fuẹn Esu bi ẹbho ne i mhẹn an. Bhi imianlo nọn kike nin Jọni miẹn, ọle da daghe ọle ghe, a wo ha lu emhin kugbe bhi otọ bi okhun. Esu bi ọrebhe ne ribhi ibo nọnsọle bha yẹ ha ribhọ. Ọrebhe bhi otọ bi okhun da wo ha lu emhin ne ti Jehova bhọ, yẹ ga ọle ọkpa.