Ọria Nọn Gbẹloghe Onighan Da Luẹ Ẹmhọanta

Obhokhan okhuo ọkpa nin ẹlinmhin-ebe ha noo da ha nyẹnlẹn bhi Filipai. Ọne ẹlinmhin-ebe da ha noo ọne obhokhan rẹ tare ebe ha sunu bhi ẹghe odalo. Bhiriọ, ene nyan ọlẹn da re ọle ha khuan igho. Ẹghe nin Pọl bi Sailas rẹ vae bhi Filipai, ọne obhokhan da wo gbe rẹkhan ele bhi ikpẹdẹ ne bunbun. Ọne ẹlinmhin-ebe nọn ri ọle bhi egbe da re ọle ha so yọle: “Eguọmhandia nesi Osẹnobulua Nọn Ke Okhun Nẹ ene ikpea nan khin.” Egbe ọne obhokhan ki lọ Pọl, ọle da taman ọne ẹlinmhin-ebe yọle: ‘Bhi elin nọnsi Jesu, mẹn taman uwẹ nin uwẹ si ọne obhokhan nan bhi egbe re!’ Ọne ẹlinmhin-ebe da gene si ọne ọmanmhẹn bhi egbe re.

Ene nyan ọne obhokhan ki kere ghe, ele i yẹ da sabọ ha re ọle khuan igho, ẹkẹ da wo manman ha khọ ele. Bhiriọ, ele da sua-sua Pọl bi Sailas ha khian eji ene gbẹloghe ye. Ele ki sẹbhi enin, ele da taman ene gbẹloghe yọle: ‘Ene ikpea nan wo ha gbobọrauhi, yẹ si ozughu re bhi ọne agbaẹbho nan!’ Ene gbẹloghe da yọle nan re asan gbe Pọl bi Sailas, yẹ mun ele ọbhi ighan. Bhiriọ, okpea nọn gbẹloghe onighan bhi enin, da mun ele ọbhi ighan nan manman gbega nẹ, ne ẹkẹ ọle wo so ebiuki a. Ọle da yẹ khan ele ọbhi aban.

Bhi ẹkẹ ọne ighan, Pọl bi Sailas da munhẹn ha so illo rẹ gẹn Jehova. Onighan nekẹle da ha kaehọ. Bhi ọsasọn ogiziẹn, osukpa, otọ da muvẹa, ọ da manman mun ọne ighan lueghe. Ranmhude ọnan, odẹ ne ribhi ọne ighan da tuje a, ighan nan rẹ gbanọ ene onighan rebhe da fanọn an, sẹyẹ, aban nan khan ele ọi da nyanọn kua. Ọnọn gbẹloghe ene onighan ki da jẹje runẹ vae bhi isi ọne ighan nan manman gbega nẹ. Ọle da kere ghe ene odẹ ne ribhọ tuje a. Ranmhude ọle riale ghe ene onighan rebhe nẹgbe, ọle da re agbada nin ọle rẹ gbe egbọle a.

Bhi ọne ẹghe nin tee, Pọl da sotie ọle yọle: ‘Hẹi kuan egbe ẹ! Mhan ribhi enan!’ Bhiriọ, ọne okpea nọn gbẹloghe onighan da jẹje diọbhi eji Pọl bi Sailas ye, yẹ diguẹ bhi odalo ele. Ọle da nọọn ele yọle: “Be imẹn ha lu, nin mẹn da sabọ miẹn umiẹnfan?” Ele da taman ọlẹn yọle: ‘Ọkhẹke nin uwẹ bi azagba-uwa nọnsẹ mhọn urẹọbhọ da Jesu.’ Pọl bi Sailas da ki man ọne okpea bi azagba-uwa nọnsọle ẹmhọn Jehova, bhiriọ, ele rebhe da mianmẹn.