A Da Tẹmhọn Osẹnobulua Sẹbhi Agbaẹbho Ne Bunbun

Ene etuegbe da lu rẹkhan ebi Jesu taman ele, nin ele wewe ọne ọta nọn mhẹn na bhi ijerebhe. Bhi ukpe 47 C.E., ene Kristiẹn ne ribhi Antiọk da je Pọl bi Banabas nin ele dọ tẹmhọn Osẹnobulua bhi ije kẹkẹ. Ele veva da wo re ọhubhudu tẹmhọn Osẹnobulua na bhi Esia Minọ rẹ dọ sẹbhi Dẹbi, Listra bi Aikoniọm.

Pọl bi Banabas da wo ha tẹmhọn Osẹnobulua man ọrebhe, ọ ha rẹ ha yi ene fele la ibhioguele, ibhokhan la ene wanre. Ẹbho da wo miẹn ẹmhọanta rẹji Kristi ọbhi egbe. Ẹghe nin Pọl bi Banabas rẹ tẹmhọn Osẹnobulua man Sajiọs Pọlọs nin gọvanọ ọsi Saiprọs, ọbo ọkpa da ha ho nin ọle de ele idobolo. Pọl da taman ọne ọbo yọle: ‘Jehova dẹ re oya nin uwẹ.’ Bhi ọne ẹghe nin tee, ẹlo da ru ọle bhi uhọnmhọn. Sajiọs Pọlọs nin gọvanọ ki daghe ọnan, ọle da kiẹn Kristiẹn.

Pọl bi Banabas da ha tẹmhọn Osẹnobulua bhi ijerebhe, rẹ na bhi uwa rẹ sẹbhi uwa, bhi ẹki, bhi uwedẹ, bi bhi sinagọg. Ẹghe nin ele rẹ re egbe daan okpea ọkpa nọn yi akhun bhi Listra, ene daghe ọne emhin ọhan-ilo da ha riale ghe osẹ ele khin, bhiriọ, ele da ha ho nin ele ha ga ele. Ọkpakinọn, Pọl bi Banabas bha re otọ nin ele. Ele da taman ele yọle: ‘Osẹnobulua ọkpa ọkhẹke nin bha ha ga! Eria ọkhọnkhan mhan khin.’ Ọnan ki sunu fo, ibhokhan Ju eso da vae dọ sua ene ẹbho ọbhọ rẹ ha ne Pọl suan. Ene ẹbho da re udo-udo gbe Pọl, sua ọle dagbare bhi ọne agbaẹbho, yẹ zẹ ọle obọ nin ọle yu. Ọkpakinọn, Pọl bha yu! Ẹjẹje, ene ibhio ọle da vae dọ rẹkpa ọle, yẹ mun ọlẹn fikie ọne agbaẹbho. Akizẹbue, Pọl da fikie diọbhi Antiọk.

Bhi ukpe 49 C.E., Pọl da gbo yo okhian ọbhebhe. Ene Kristiẹn ne ribhi Esia Minọ ọle dọ fẹ ghe. Ọle ki fẹ ele ghe fo, ọle da diọbhi Europe dọ ha tẹmhọn Osẹnobulua. Ọle da sẹbhi Atẹns, Ẹfẹsọs, Filipai, Tẹsẹlonaika, bi ije kẹkẹ ebhebhe. Sailas, Luk, bi usẹn okpea natiọle Timoti da deba Pọl bhi ọne okhian nan. Ele da wẹnna kugbe rẹ mun agbotu kẹkẹ gbọ, yẹ rẹkpa ene agbotu rẹ deziẹn. Ukpe ọkpa bi ukhiọnmhẹn Pọl gbe bhi Kọrint. Ọle da re ọne ẹghe nan rẹ ha ziẹn ene ibhio ọle udu. Ọle da ha tẹmhọn Osẹnobulua, man emhin, yẹ gbẹnẹn ilẹta ji agbotu ne bunbun. Ọle da yẹ ha do ibọkpọ khiẹn. Akizẹbue, ọle da fikie diọbhi Antiọk.

Bhi ukpe 52 C.E., Pọl da yo okhian nọnzi ea. Esia Minọ ọle da mun ọne okhian nan hẹn. Ọle da yo Filipai nọn manman ree, yẹ diọbhi Kọrint. Pọl da gbe ikpe ne bunbun bhi Ẹfẹsọs. Ọle da ha man emhin, re egbe daan ẹbho ne khọnmhọn, yẹ rẹkpa agbotu nọn ribhi enin. Ọle da yẹ wo ha re ọta ogbakha man ukpẹdẹ-ukpẹdẹ bhi udede họọ nọn ribhi isiku ọkpa. Ẹbho ne bunbun da ka ọle ehọ, yẹ fi uwedẹ nin ele rẹ ha nyẹnlẹn denọ. Bhi ọkike ọle, Pọl da fikie diọbhi Jerusalẹm beji ọle ki tẹmhọn Osẹnobulua na bhi agbaẹbho kẹkẹ fo.