A Da Re Ẹlinmhin Nọn Khiale Nin Kọniliọs

Okpea ọkpa natiọle Kọniliọs da ha nyẹnlẹn bhi Sizaria. Obhokhan Rom ọle khin, sẹyẹ, ọdiọn eyokhọnlẹn nan manman họn ẹmhọn ọlẹn ọle ha khin. Arẹmiẹn ọle i yi obhokhan Ju, ibhokhan Ju wo ha mun ekpẹn nanlẹn. Ọle wo ha rẹkpa ẹbho ne guanọ urẹkpa bi ene ibhioguele. Kọniliọs wo ha mhọn urẹọbhọ da Jehova, sẹyẹ, ẹghe rebhe ọle rẹ nan erọnmhọn. Ẹdọkpa, ẹhi da zegbere man Kọniliọs yẹ taman ọlẹn yọle: ‘Osẹnobulua họn erọnmhọn nọnsẹ. Bhi ejayenan nian, je ẹbho ha khian agbaẹbho ọsi Jọpa, nin ele dọ datie Pita ji uwẹ.’ Ẹjẹje, Kọniliọs da je ikpea ea ha khian Jọpa. Obọ ọsi saot Jọpa ye, sẹyẹ, rẹ na bhi Sizaria rẹ sẹbhi Jọpa ree sẹbhi imali 30.

Ọkuẹsẹ ene ikpea sẹbhi Jọpa, Osẹnobulua da re imianlo man Pita. Bhi ọne imianlo, Pita da daghe elanmhẹn kẹkẹ nin ibhokhan Ju i le, ọle da yẹ họn ukpuru nọn yọle ghe, nin ọle le ene elanmhẹn. Ọkpakinọn, Pita da he, ọle da yọle: ‘Mẹn bha sẹ ka le elanmhẹn nọn bha khia khẹ.’ Ọne ukpuru da ki taman ọlẹn yọle: ‘Hẹi yẹ yọle ghe ene elanmhẹn bha khia, ranmhude Osẹnobulua kpe ele khia.’ Ọne ukpuru da yẹ taman Pita yọle: ‘Ikpea ea ribhi ununro nọnsẹ. Bu ele, uwẹ ha yẹ rẹkhan ele.’ Bhiriọ, Pita da bu ene ikpea, yẹ nọọn ele ebe re ele vae. Ele da taman ọlẹn yọle: ‘Okpea ọkpa natiọle Kọniliọs, nọn yi ọdiọn eyokhọnlẹn ọsi ibhokhan Rom, ọle je mhan re. Ọle yọle nin uwẹ rẹkhan mhan ha khian uwa nọnsọle bhi Sizaria.’ Pita da taman ele nin ele gbe asọn ọkpa bhi isọle. Ele da gene lu iriọ. Ẹdẹ ki we, Pita da rẹkhan ele diọbhi Sizaria. Ọle da ne ibhio ọle eso nin ele ko ga rẹkhan egbe.

Pita ki sẹbhi uwa ọsi Kọniliọs, Kọniliọs da de diguẹ nanlẹn. Ọkpakinọn, Pita da taman ọlẹn yọle: ‘Kpanọ mundia!’ Okpea bii uwẹ mẹn khin. Osẹnobulua, ọle yọle nin mẹn vae bhi uwa nọnsẹ, arẹmiẹn ibhokhan Ju i nabhi uwa ọsi ọria nọn i yi obhokhan Ju. Ejayenan nian, huẹan, taman mẹn ebezẹle nin uwẹ da yọle nin mẹn vae bhi uwa nọnsẹ.’

Kọniliọs ki da taman Pita yọle: ‘Nẹnsẹdẹnẹn, beji mẹn ha nan erọnmhọn, ẹhi ọkpa da taman mẹn ghe, nin mẹn je nan datie uwẹ re. Huẹan, man mẹn ẹmhọn Jehova.’ Pita da yọle: ‘Mẹn ki wo gene dọ lẹn nian ghe, Osẹnobulua i zọn ọria. Ọria nọn hi ki rẹ khin nọn ho nọn ga ọle, ọle miẹn ọlẹn ọbhi egbe.’ Pita da man ele emhin kẹkẹ rẹji Jesu. Bhi ọne ẹghenin, Osẹnobulua da re ẹlinmhin nọn khiale nin kọniliọs bi ẹbho ne ha ribhi enin. Bhiriọ, ele rebhe da mianmẹn.