Jesu Da Zẹ Sọl

Obhokhan Rom Sọl ha khin. Agbaẹbho ọsi Tasọs a da biẹ ọle. Ọkpa bhi ibhokhan Farisi ọle yẹ khin. Ọle wo manman lẹn uhi ọsi ibhokhan Ju, sẹyẹ, ọle bha hoẹmhọn Kristiẹn hiehie. Ọle ki diọbhi uwa ọsi ene Kristiẹn dọ si ele dagbare ha khian ighan, ọ ha rẹ ha yi okpea la okhuo. Ọle wo re obọ bhọ bhi ẹghe nin usun ẹbho rẹ re udo-udo gbe Stivin nin odibo a.

Ene Kristiẹn ne ribhi Jerusalẹm nin Sọl ha kpokpo bha sẹ ọle. Ọle da yẹ ha guanọ nin ọle diọbhi Damaskọs dọ kpokpo Kristiẹn ne ribhi enin. Bhiriọ, ọle da taman ojohẹn nọn re otọ nanlẹn rẹ ha khian enin. Beji Sọl sikẹ ọne agbaẹbho, ẹfua da wo re osukpa bha nyan ọlẹn, bhiriọ, ọle da de ọbhi otọ. Ọle da họn urulu nọn yọle: ‘Sọl, bezẹle nin uwẹ da ha kpokpo mẹn?’ Sọl da yọle: ‘Họla uwẹ khin?’ Ọne urulu da taman ọlẹn yọle: ‘Imẹn hi Jesu. Ha khian Damaskọs, bhi enin, a dẹ taman uwẹ ebi uwẹ ha lu yẹ.’ Osukpa, Sọl da ruẹlo. Obọ a ki re ọle le nabhi ọne agbaẹbho.

Kristiẹn ọkpa ribhi Damaskọs natiọle Ananayas. Jesu da taman ọlẹn bhi imianlo yọle: ‘Ha khian uwa ọsi Judas nọn ribhi uwedẹ natiọle Ukpọwala; dọ guanọ Sọl bhi enin.’ Ananayas da yọle: ‘Ebeanlẹn mẹn, mẹn wo lẹn emhin rebhe rẹji ọne okpea nin! Ọle muno edibo nesẹ ọbhi ighan!’ Ọkpakinọn, Jesu da taman ọlẹn yọle: ‘Ha bu ọle khian, ranmhude, imẹn zẹ ọle nọn ha wewe ọne ọta nọn mhẹn na bhi agbaẹbho ne bunbun.’

Bhiriọ, Ananayas da bu Sọl. Ọle da taman Sọl yọle: ‘Sọl nin obhio, Jesu je imẹn re nin mẹn dọ taan uwẹ ẹlo a.’ Osukpa, Sọl da kie ha daghe. Ọle da luẹ ẹmhọn Jesu yẹ kiẹn odibo nọnsọle. Sọl ki mianmẹn fo, ọle da deba ibhio ọle nin ele ko ga ha tẹmhọn Osẹnobulua bhi sinagọg. Ria ẹmhọn ebi ilo ha rẹ manman han ene ibhokhan Ju yẹ beji ele daghe ọle ghe Sọl tẹmhọn Jesu man ẹbho. Ele da yọle: ‘Ọnan i be yi ọne okpea nọn kpokpo edibo nesi Jesu?’

Rẹ na bhi ikpe ea, Sọl da ha tẹmhọn Osẹnobulua man ẹbho ne nyẹnlẹn bhi Damaskọs. Ibhokhan Ju wo he Sọl! Ele da ha mhanmhan ebi ele ha rẹ gbe ọle a yẹ. Ọkpakinọn, ene ibhio ọle ne ribhi enin da lẹn ebi ibhokhan Ju mhanmhan. Bhiriọ, ele da na bhi uhio nan hian bhi egbuwa re okhuale mun ọlẹn huẹnre, beji ọle ha da sabọ nẹgbe.

Ẹghe nin Sọl ki rẹ sẹbhi Jerusalẹm, ọle da ha dọnmhegbe nin ọle rẹ deba ene Kristiẹn ne ribhi enin ha lu emhin. Ọkpakinọn, ele da ha mun ofẹn ọlẹn. Sokpan, odibo ọkpa natiọle Banabas da re Sọl bu ene etuegbe yẹ ji ele lẹn ghe Sọl gene fidenọ. Sọl da wo re ọyaya deba agbotu nọn ribhi Jerusalẹm ha wewe ọne ọta nọn mhẹn. Akizẹbue, a da ha tiọle Pọl.