Jesu Da Riọ Lazarọs Kpanọ Bhi Uu

Jesu mhọn imọẹ ea ne manman sikẹ ọle. Bẹtani ele da nyẹnlẹn, sẹyẹ, ibhio ene imọẹ ọle nan ha khin. Elin ele hi, Lazarọs, Meri bi Mata. Ẹdọkpa, beji Jesu ribhi obọ nọnzi eva ọsi Ẹdẹ Jọdan, Meri bi Mata da je uhọnmhunje bu ọle. Ele da yọle: ‘Lazarọs manman ha khọnmhọn. Huẹan, jẹje vae!’ Ọkpakinọn, Jesu bha ha khian bhi ọne ẹghe nin. Ọle da yẹ gbe ikpẹdẹ eva bhi eji ọle ha ye, ọkuẹsẹ ọle taman edibo nesọle yọle: ‘Bha ji mhan ha khian Bẹtani. Lazarọs wẹ. Mẹn dẹ dọ riọ ọle bhi owe.’ Ene etuegbe da yọle: ‘Ahamiẹn Lazarọs wẹ, ọnin dẹ kẹ re egbe daan ọlẹn.’ Jesu da ki taman ele ebi ọle gene tẹmhọnlẹn. Ọle da yọle: ‘Lazarọs yu.’

Ikpẹdẹ enẹn ọ ki ha ye nan re Lazarọs tọ beji Jesu sẹbhi Bẹtani. Ọle da kere ghe ẹbho wo vae dọ re ikoudure nin Mata bi Meri. Mata ki họn ghe Jesu vae, ọle da re ẹjẹje bu ọle. Ọle da taman Jesu yọle: “Ebeanlẹn imẹn, sade uwẹ ribhi enan nọn, obhio mẹn i rẹ yu.” Jesu da ki taman ọlẹn yọle: ‘Obhio ẹ dẹ kie nyẹnlẹn.’ Ọle da nọọn Mata yọle: ‘Uwẹ be rẹọbhi ọnan?’ Mata da wanniẹn ọlẹn yọle: ‘Mẹn rẹọbhọ ghe obhio mẹn dẹ riọkpanọ bhi ẹghe ariọkpanọ.’ Jesu da ki taman ọlẹn yọle: “Imẹn hi ariọkpanọ, imẹn yẹ hi iẹnlẹn.”

Mata da kpanọ dọ taman Meri yọle: ‘Jesu vae.’ Meri ki họn ọnan, ọle da runẹ bu Jesu, sẹyẹ, ene usun ẹbho ne ribhi enin da rẹkhan ọlẹn. Ọle ki sẹbhi eji Jesu ye, ọle da diguẹ bhi odalo ọle, yẹ ha viẹ. Meri da yọle: ‘Ebeanlẹn mẹn, sade uwẹ ribhi enan nọn obhio mẹn i rẹ yu!’ Jesu ki daghe ọbalọ nin Meri ye, eviẹ da re ọle. Ene usun ẹbho ki daghe ebi Jesu rẹ ha viẹ yẹ, ele da yọle: ‘Ọle wo gene manman hoẹmhọn Lazarọs.’ Eso da ki ha riale: ‘Ahamiẹn ọle gene hoẹmhọn Lazarọs, bezẹle nin ọle bha da hinmhin ọlẹn?’ Be Jesu ha ki lu yẹ nian?

Jesu da diọbhi eji a da re Lazarọs tọ. Udede udo a rẹ gue ọne idin. Jesu da taman ẹbho ne ribhi enin nin ele wẹnẹ ọne udo kie. Bhiriọ, Mata da taman ọlẹn yọle: ‘Ikpẹdẹ enẹn ki nọn nian nan re ọle tọ! Ọ ki dẹ ha ya.’ Ọrẹyiriọ, ele da wẹnẹ ọne udo kie. Jesu da ki nan erọnmhọn yọle: ‘Aba, obulu nin uwẹ rẹ họn erọnmhọn nọnsẹmhẹn. Mẹn lẹnmhin ghe uwẹ ka wo họn erọnmhọn nọnsẹmhẹn khẹ, ọkpakinọn, beji ẹbho ne ribhi enan ha da lẹn ghe uwẹ hi ọnọn je mẹn re, ọle zẹle nin mẹn da nan ọne erọnmhọn nan dagbare.’ Jesu da reso yọle: “Lazarọs, dagbare!” Emhin ọhan-ilo da wo sunu. Lazarọs da dagbare bhi idin, ukpọn nan rẹ re ọle tọ da yẹ ha ri ọle bhi egbe. Jesu da ki taman ele yọle: “Bha fanọn ene ukpọn si ọle bhi egbe re, bha ha yẹ ji ọle da ha khian.”

Ẹbho ne bunbun ne daghe ebe sunu, da mhọn urẹọbhọ da Jesu. Ọkpakinọn, ẹbho eso da kpanọ dọ taman ibhokhan Farisi ebe sunu. Rẹ na bhi ọne ẹghe nin ha khian, ibhokhan Farisi da ha guanọ nin ele gbe Lazarọs bi Jesu a. Ọkpa bhi etuegbe nesi Jesu natiọle Judas Iskarọt da na ikeke bu ibhokhan Farisi, yẹ nọọn ele yọle: ‘Eka bha ha re nin mẹn sade mẹn rẹkpa bha rẹ mun Jesu?’ Ele da yọle ghe ele dẹ re isiliva 30 nanlẹn. Rẹ na bhi ọne ẹghe nin ha khian, Judas da ha guanọ isẹhoa nin ọle ha rẹ khiẹn Jesu nin ibhokhan Farisi.