Jesu Da Re Egbe Daan Ọria Bhi Ẹdẹ Sabati

Ẹkẹ Jesu da wo ha khọ ibhokhan Farisi, sẹyẹ, ele da ha guanọ isẹhoa nin ele rẹ mun ọlẹn khue. Ele da taman ọlẹn ghe, ọ bha khẹke nin ọle ha hinmhin ẹbho bhi ukpẹdẹ Sabati. Bhi ẹdẹ Sabati ọkpa, Jesu da miẹn okpea ọkpa nọn ruẹlo, nọn bhii emhin khian bhi ughe. Jesu da taman edibo nesọle yọle: ‘Bha gbẹlokotọ bhi ebi Osẹnobulua ha rẹ re ahu nọnsọle hinmhin ọne okpea nan yẹ.’ Jesu da tuẹsẹn ọbhi otọ, re ọle fu ekẹn, yẹ re ọle gbo ọne okpea ẹlo. Ọle da taman ọne okpea yọle: ‘Ha khian Siloam, dọ kpe ẹlo a bhi eji amẹn da nẹ koko bhi enin.’ Ọne okpea da gene lu iriọ. Ọle ki lu iriọ fo, ọle da munhẹn ha daghe.

Ọnan da wo han ẹbho ilo. Ele da ha yọle: ‘Ọnan be yi ọne okpea nọn dotua bhi ijan ọkpa ha bhii ẹbho emhin? La ọria nọn khọ ọle be nọn?’ Ọne okpea da yọle: ‘Imẹn hi ọne ọmọn nan biẹ ọle ọruẹlo!’ Ele ki da nọọn ọlẹn yọle: ‘Be ki tan uwẹ ẹlo a?’ Ọle da taman ele ebe sunu. Bhiriọ, ele da re ọle bu ibhokhan Farisi.

Ọne okpea da taman ibhokhan Farisi yọle: ‘Jesu da tuẹsẹn ọbhi otọ, re ọle fu ekẹn, re ọle gbo mẹn ẹlo, yẹ taman mẹn nin mẹn dọ kpe ọle kua. Mẹn ki lu iriọ fo, mẹn da munhẹn ha daghe.’ Ibhokhan Farisi da yọle: ‘Ahamiẹn Jesu re egbe daan ọria bhi ẹdẹ Sabati, ọnin rẹman ghe ọ i yi obọ Osẹnobulua ọle da miẹn ahu nin ọle noo.’ Ọkpakinọn, eso da yọle: ‘Ahamiẹn ọ i yi obọ Osẹnobulua ọle da miẹn ahu nin ọle noo, ọle i rẹ sabọ ha re egbe daan ẹbho.’

Ene ibhokhan Farisi da tie ene biẹ ọne okpea, yẹ nọọn ele yọle: ‘Be ọmọn nọnsẹbha ki rẹ sabọ dọ ha daghe yẹ?’ Ofẹn da ha mun ene biẹ ọle ranmhude ene ibhokhan Farisi yọle ghe, ọria nọn hi ki rẹ khin nọn mhọn urẹọbhọ da Jesu, a dẹ khu ọle fia bhi Sinagọg. Bhiriọ, ele da yọle: ‘Mhan bha lẹn. Bha tobọbha nọọn ọlẹn.’ Ene ibhokhan Farisi da wo ha nọọn ọne okpea inọnta ne bunbun, rẹ sẹbhọ ghe ọle da yọle: ‘Emhin rebhe nin mẹn lẹn, ọle mẹn taman bha riọ. Bezẹle nin ewanniẹn nin mẹn re nin bha bha da khọn bha?’ Ọnan da wo manman re ohu re ene ibhokhan Farisi, bhiriọ, ele da sua ọle dagbare.

Jesu ki da bu ọne okpea yẹ nọọn ọlẹn yọle: ‘Uwẹ be mhọn urẹọbhọ da ọne Mezaya?’ Ọne okpea da yọle: ‘Mẹn dẹ mhọn urẹọbhọ da ọle sade mẹn lẹn ọlẹn.’ Jesu da taman ọlẹn yọle: ‘Imẹn hi ọne Mezaya.’ Ọ i be yi ifuẹkẹ Jesu re inian rẹman? Rẹ gbera ghe Jesu re egbe daan ọne okpea, ọle da yẹ rẹkpa ọne okpea rẹ ha mhọn urẹọbhọ da ọle.