Ẹlizabẹt Da Biẹ Ọmọn

Ikpe 400 ki gbera nan rẹ bọn ogbe ọsi Jerusalẹm fo, ohẹn ọkpa natiọle Zẹkaraya bi okhuo ọle nin Ẹlizabẹt da ha nyẹnlẹn bhi egbegbe ọne agbaẹbho. Ọ reele nin ele bọ egbe, ọkpakinọn, ele i mhọn ọmọn. Ẹdọkpa, beji Zẹkaraya ha tuẹ emhin nọn viohin an bhi uwa oga, ẹhi natiọle Gebriẹl da zegbere man ọlẹn. Ọnan da wo re ofẹn mun Zẹkaraya. Ọkpakinọn, ọne ẹhi da taman ọlẹn yọle: ‘Hẹi ji ofẹn mun uwẹ. Jehova je mẹn bu uwẹ nin mẹn dọ ta ọta nọn mhẹn man uwẹ. Okhuo uwẹ nin Ẹlizabẹt dẹ biẹ ọmokpea, sẹyẹ, uwẹ ki hẹ ọle Jọni. Jehova zẹ ọne ọmọn nin ọle dọ lu iwẹnna kpataki.’ Zẹkaraya da nọọn ọne ẹhi yọle: ‘Be ọnan ha rẹ sunu yẹ? Mẹn bi okhuo mẹn ki wo dọmanlẹn, sẹyẹ, mhan gbera ene ha sabọ biẹ ọmọn.’ Ọne ẹhi ki da taman ọlẹn yọle: ‘Osẹnobulua je mẹn re nin mẹn dọ ta ọne ọta nan mhan ẹn. Ọkpakinọn, ranmhude uwẹ bha rẹọbhi ebi mẹn taman uwẹ, uwẹ dẹ kiẹn odin rẹ sẹbhi ẹghe nan ha rẹ biẹ ọne ọmọn.’

Zẹkaraya da wo manman bue bhi eji ọle da ha tuẹ ọne emhin nọn viohin an. Ẹghe nin ọle ki re dagbare, ene ẹbho ne mundia ha khẹ ọle da ha guanọ nin ele lẹn ebe sunu. Ọkpakinọn, Zẹkaraya bha sabọ nin ele talọ. Obọ ọle ki ha noo rẹ nin ele talọ. Ene ẹbho ki da dọ lẹn ghe Osẹnobulua ne Zẹkaraya talọ.

Akizẹbue, Ẹlizabẹt da ha hanmhan, ọle da biẹ ọmokpea beji ọne ẹhi ka ta. imọẹ Ẹlizabẹt bi ibhio ọle da vae dọ tuẹ ọne ọmọn. Ele da wo deba ọle ha ghọnghọn. Ẹlizabẹt da yọle: ‘Jọni mẹn ho nin mẹn hẹ ọle le.’ Ele ki da yọle: ‘Ọria soso i ribhi azagba-uwa nọnsẹ natiọle Jọni. Hẹ ọle Zẹkaraya, nọn yi elin ọsi aba ọle.’ Ọkpakinọn, Zẹkaraya da gbẹn ọlẹn ọbhi emhin ghe: ‘Jọni a da hẹ ọle le.’ Bhi ọne ẹghe nin tee, Zẹkaraya da kie ha talọ! Ẹbho da ha tẹmhọn ọne emhin nan nọn sunu na bhi otọ Judia rebhe, ele da yẹ ha yọle: ‘Be ọne ọmọn nan ha kiẹn sade ọ wanre?’

Ẹlinmhin nọn khiale da ha noo Zẹkaraya. Ọle da munhẹn ha tẹmhọn ebe ha sunu bhi ẹghe odalo, ọle da yọle: ‘Ogẹn hi ọsi Jehova. Ọle da ve nin Ebraham ghe, ọle dẹ je Mezaya re nọn dọ hinmhin mhan. Jọni dẹ ha yi ọne akhasẹ nọn ha hẹnhẹn uwedẹ khẹ ọne Mezaya.’

Emhin kpataki da yẹ sunu ji Meri nin obhio Ẹlizabẹt. Bha ji mhan fẹghe ebe sunu ji Meri bhi uhọnmhọn-ọta nọn ki sẹ ọle egbe.