Ene Ẹhi Da Wewe Ọle Ghe A Biẹ Jesu

Siza Augustus nọn gbẹloghe Rom da yọle ghe nin ibhokhan Ju rebhe ha khian agbaẹbho nọnsele dọ gbẹn elin ọbhi otọ. Bhiriọ, Josẹf bi Meri da ha khian Bẹtlẹhẹm, nin agbaẹbho nin azagba-uwa ọsi Josẹf na vae. Bhi ọne ẹghe nan, ọ da ha kẹ khere nin Meri rẹ biẹ.

Ele ki sẹbhi Bẹtlẹhẹm, eji a da bẹẹ elanmhẹn ọkpa ele miẹn dia i. Enin Meri ki da biẹ ọmọn nọnsọle natiọle Jesu. Ọle da re ukpọn gbanọ ọle, yẹ fẹkẹ mun ọlẹn ọbhi uke emhin nin elanmhẹn rẹ le ebale.

Bhi egbegbe Bẹtlẹhẹm, esun-ohuan eso da ha re ihuan nesele kọn bhi ole ọsasọn. Osukpa, ẹhi nọnsi Jehova da mundia bhi odalo ele, sẹyẹ, uyi nọnsi Jehova da ha bhala nẹga ele. Ofẹn da ha mun ene esun-ohuan. Ọkpakinọn, ọne ẹhi da taman ele yọle: ‘Bha hẹi ji ofẹn mun bha. Ọta nọn mhẹn mẹn dọ taman bha. A biẹ ọnọn da ha yi Mezaya bhi Bẹtlẹhẹm ẹlẹnan.’ Bhi ọne ẹghenin tee, ẹhi ne bunbun da wo zegbere bhi okhun ha yọle: ‘Uyi hi ọsi Osẹnobulua nọn ribhi okhun, ọfure hi ọsi eria ne ribhi ọne otọ nan.’ Ẹghenin, ene ẹhi da kpanọ. Be ene esun-ohuan ki lu yẹ?

Ene esun-ohuan da ha taman egbe ele yọle: ‘Bha ji mhan kpanọ ha khian Bẹtlẹhẹm.’ Ele da re ẹjẹje kpanọ ha khian. Ele ki sẹbhi enin, ele da miẹn Josẹf bi Meri bi ọne ọmobọ nin ele la biẹ, bhi eji a da bẹẹ elanmhẹn.

Ọ da wo manman han ọrebhe ilo ne họn ebi ọne ẹhi taman ene esun-ohuan. Meri da manman ria eria nyan ẹmhọn nin ọne ẹhi tale, ọle bha yelea ghẹdẹ. Ene esun-ohuan da fikie diọbhi eji ihuan nesele ye. Ele da ha khuẹnmhẹn Jehova bhi emhin rebhe nin ele họn bi emhin rebhe nin ele daghe.