Ogbe Ọsi Jerusalẹm

Bhi ẹghe ọsi Ẹzra, obhokhan Izrẹl ọkpa da ha ribhọ natiọle Nẹhimaya. Ọguọmhandia ọsi Atazẹzis ọle khin, sẹyẹ, Shushan ọle da nyẹnlẹn bhi agbaẹbho ọsi Pẹsia. Obhio Nẹhimaya da na bhi Juda vae dọ taman Nẹhimaya yọle: ‘Ene ẹbho ne fikiere bhi Jerusalẹm i mhọn ugbega. A bha sẹ hẹnhẹn ogbe bi geti nin ibhokhan Babilọn dunmhun an.’ Ọnan bha re Nẹhimaya ha ghọnghọn. Ọle da ha guanọ nin ọle ha khian Jerusalẹm nin ọle dọ rẹkpa ele. Bhiriọ, ọle da nan erọnmhọn ji Jehova beji ọne ojie ha da re otọ nanlẹn rẹ yo.

Akizẹbue, ọnojie da daghe ọle ghe Nẹhimaya i zẹwẹ ghọnghọn. Ọle da taman ọlẹn yọle: ‘Mẹn bha sẹ ka re inian miẹn uwẹ khẹ. Be sunu?’ Nẹhimaya da yọle: ‘Be mẹn ha rẹ ha ghọnghọn yẹ beji a miẹn ghe a bha sẹ bọn Jerusalẹm nin agbaẹbho nọnsẹmhẹn nan dunmhun an?’ Ọnojie da ki nọọn ọlẹn yọle: ‘Be uwẹ guanọ nin mẹn lu nin uwẹ?’ Ẹjẹje, Nẹhimaya da nan erọnmhọn bhi ẹkẹ ọkhọle. Ọle ki lu iriọ fo, ọle da taman ọnojie yọle: ‘Huẹan, je mẹn ha khian Jerusalẹm nin mẹn kie dọ bọn ogbe nọn ribhọ.’ Atazẹzis nin Ojie da taman Nẹhimaya nin ọle ha khian, sẹyẹ, ọle bhọ da lu emhin kẹkẹ beji a da miẹn emhin soso bha de Nẹhimaya idobolo bhi uwedẹ. Ọle da re Nẹhimaya kiẹn gọvanọ ọsi Juda, sẹyẹ, ọle da ne eran nanlẹn nin ọle ha rẹ hẹnhẹn ene geti.

Ẹghe nin Nẹhimaya ki rẹ sẹbhi Jerusalẹm, ọle da fẹ ọne ogbe nẹga. Ọle da tie ene ohẹn bi ene gbẹloghe koko yẹ taman ele yọle: ‘Ọnan i mhẹn bhi ẹlo hiehie. Ọkhẹke nin mhan mun iwẹnna hẹn.’ Ene ẹbho da re obọ bhọ, bhiriọ, ele da munhẹn ha bọn ọne ogbe.

Ọkpakinọn, eghian ibhokhan Izrẹl da ha jẹ ele. Ele da ha yọle: ‘Elanmhẹn natiọle alabe bhọ dẹ sabọ dunmhun ọne ogbe nan sotọ.’ Ibhokhan Izrẹl bha re ehọ ọbhi ebi ele ta, ele da sẹyẹ ha bọn ọne ogbe. Ele da wo ha bọn ọlẹn khian okhun, sẹyẹ, ọ da wo manman ziẹn.

Eghian ibhokhan Izrẹl da wo ha noo uwedẹ kẹkẹ nin ele rẹ mun idobolo ọbhi ọne iwẹnna. Ele da yẹ ha guanọ nin ele mun okhọn bu ibhokhan Izrẹl bhi ẹghe nin ele bha re ẹlo ọi. Ẹghe nin ibhokhan Izrẹl ki rẹ họn ebi ele mhanmhan, ofẹn da ha mun ele. Ọkpakinọn, Nẹhimaya da taman ele yọle: ‘Bha hẹi ji ofẹn mun bha. Jehova ne mhan dia.’ Ọle da ne ikpea mundia ne ha gbega ene a wẹnna. Bhiriọ, eghian ele bha yẹ sabọ mun okhọn bu ele re.

Ọ ki ribhi ikpẹdẹ 52, ele da bọn ọne ogbe fo yẹ hẹnhẹn ọne geti. Nẹhimaya da mhanmhanlẹn nan rẹ ọle guẹ nin Jehova. Bhiriọ, ọle da tie ibhokhan Livai rebhe vae bhi Jerusalẹm. Ọle da gha ele ọbhi usun eva ne da ha so illo. Ele da hẹn stẹpu nọn sikẹ eji a tiọle Fountain Gate ha khian okhun ọne ogbe. Ele ki sẹbhi enin, obọ ọkpa da rẹkhan obera, obọ nọnkẹle da rẹkhan obọ-agobọ. Ele da re iriọ khian na okhun ọne ogbe nẹga ọne agbaẹbho. Ele da ha khue akala bi emhin illo kẹkẹ rẹ re ogẹn ji Jehova. Ẹzra da rẹkhan usun ọkpa, Nẹhimaya da rẹkhan usun nọnkẹle. Ele da dọ ke egbe re bhi uwa oga. Ene ikpea, ene ikhuo bi ene ibhokhan da zọese ji Jehova yẹ ha ghọnghọn, rẹ sẹbhọ ghe a da ha họn urulu nọnsele bhi eje reele.