Ẹzra Da Man Ẹbho Uhi Nọnsi Osẹnobulua

Ọ ki sẹbhi ikpe 70 nian nin ene bunbun bhi ibhokhan Izrẹl kpanọ ha khian Jerusalẹm, sokpan eso da yẹ ha nyẹnlẹn bhi ije kẹkẹ nin ojie ọsi Pẹsia gbẹloghe. Ọkpa bhi ẹwẹ ele da ha yi Ẹzra nin ohẹn, nọn man ẹbho uhi nọnsi Jehova. Ẹzra da dọ lẹn kere ghe, ẹbho ne ribhi Jerusalẹm bha ha re obọ rẹkhan uhi nọnsi Osẹnobulua. Bhiriọ, ọle da ha guanọ nin ọle ha khian enin nin ọle dọ rẹkpa ele. Atazẹzis nin Ojie ọsi Pẹsia da taman ọlẹn yọle: ‘Osẹnobulua wo re ẹwanlẹn nin uwẹ beji uwẹ ha da sabọ ha man uhi nọnsọle. Ha khian, uwẹ ha yẹ re ọria nọn hi ki rẹ khin nọn ho nọn rẹkhan uwẹ rẹkhan egbe.’ Ẹzra da si ọrebhe koko ne muegbe rẹ fikie diọbhi Jerusalẹm. Ele da bhii Jehova nin ọle gbega ele bhi uwedẹ. Ele ki nan erọnmhọn fo, ele da nabhi uwedẹ.

Uki enẹn ki gbera, ele da sẹbhi Jerusalẹm. Ekhaẹmhọn ne ribhi enin da taman Ẹzra yọle: ‘Ibhokhan Izrẹl bha yẹ re obọ rẹkhan uhi nọnsi Jehova, sẹyẹ, ele dọ ha ne ikhuo ne i ga Jehova bhi amhẹn.’ Be Ẹzra ki lu yẹ? Bhi isira ene ẹbho, Ẹzra da de diguẹ yẹ nan erọnmhọn yọle: ‘Jehova, uwẹ sẹ wo manman lu emhin ne bunbun nin mhan, ọkpakinọn, mhan lu olukhọ da uwẹ.’ Ene ẹbho da fidenọ, ọrẹyiriọ, ele da sẹyẹ ha lu emhin ne bha gba. Ẹzra da ki zẹ ewanlẹn bi ebhuohiẹn nin ele fẹ otọ ene emhin ne bha gba nin ene ẹbho ha lu. Bhi uki ea ne rẹkhan ọlẹn, a da khu ọrebhe fia ne i ga Jehova.

Ikpe igbeva da gbera. Bhi ọne ẹghe nan, a da kie bọn ogbe ọsi Jerusalẹm. Bhiriọ, Ẹzra da tie ene ẹbho rebhe koko bhi ughe ọsi ọne agbaẹbho, nin ọle tie uhi nọnsi Osẹnobulua man ele. Ẹghe nin Ẹzra ki rẹ tuje ọne ebe uhi a, ene ẹbho da kpanọ mundia. Ọle da re ogẹn ji Jehova, ene ẹbho da yẹ deba ọle lu iriọ. Ẹzra da tie ọne ebe uhi, yẹ gbotọle fanọn an man ele. Ene ẹbho da wo gbehọkotọ nọnsẹn beji ọle ha tie ọle. Ele da miẹnkue ghe, ele gbobọrauhi nọnsi Jehova. Bhiriọ, ele da ha viẹ. Bhi ukpẹdẹ nọn rẹkhan ọlẹn, Ẹzra da kie manman tie ọne ebe uhi man ele. Ene ẹbho da lẹn kere ghe, ẹghe nin ele rẹ lu Iluemhin Ọsi Ibọkpọ sire. Ẹjẹje, ele da munhẹn ha muegbe ọne iluemhin ọbhi otọ.

Bhi ene ikpẹdẹ ihinlọn nin ele rẹ lu ọne iluemhin, ele da ha ghọnghọn yẹ gẹn Jehova bhi uwedẹ nin ọle rẹ re emhin nin ele kọle kiọnlẹn nin ele. A bha sẹ kie miẹn Iluemhin Ọsi Ibọkpọ nọn diabe ọnan rẹ na bhi ẹghe ọsi Joshua ha vade. Ele ki lu ọne iluemhin fo, ele rebhe da kugbe nan erọnmhọn. Ele da yọle: ‘Jehova, uwẹ hi ọnọn fan mhan fia bhi Ijipt, re ebale nin mhan le bhi ojẹgbo, yẹ mun ọne otọ nan nọn mhọn-ose a nin mhan. Ọkpakinọn, mhan da wo ha gbobọrauhi nesẹ ẹghe rebhe. Uwẹ da ha je akhasẹ nesẹ bu mhan, ọkpakinọn, mhan bha ka ele ehọ. Ọrẹyiriọ, uwẹ da re iziẹngbe rẹ ne mhan lu emhin. Uwẹ da wo mun ive nin uwẹ ve nin Ebraham sẹ. Bhi ejayenan nian, mhan ve ghe mhan ki dẹ ha hẹnmhọn nin uwẹ.’ Ele da gbẹn ive nin ele ve ọbhi otọ. Ene ekhaẹmhọn, ene ibhokhan Livai, bi ene ohẹn da re ukpoluka nọnsele rẹ re iyaman ọbhọ.