Jehova Da Rẹkpa Ẹlaija

Jezibẹl ki họn ebe sunu ji ene akhasẹ ọsi Bel, ẹkẹ da wo manman ha khọ ọle. Bhiriọ, ọle da je uhọnmhunje bu Ẹlaija yọle: ‘Ewiẹ, a dẹ gbe uwẹ a beji a rẹ gbono ene akhasẹ ọsi Bel a.’ Ọnan da wo re ofẹn ha mun Ẹlaija. Bhiriọ, ọle da nẹgbe diọbhi ojẹgbo. Ọle ki da nan erọnmhọn ji Jehova yọle: ‘Ọnan i da yẹ fo mẹn, wo gbe mẹn a.’ Ranmhude egbe wo manman lọ Ẹlaija, ọle da wẹ fia bhi otọ eran.

Ẹhi ọkpa da dọ riọ ọle bhi owe, yẹ fẹkẹ taman ọlẹn yọle: ‘Kpanọ nin uwẹ le ebale.’ Ẹlaija da daghe ibrẹd nọn dia kholobo bhi okhun udo nọn to, bi ọgọ ọsi amẹn. Ọle da le ọne ibrẹd yẹ wọn ọne amẹn. Ọle ki lu iriọ fo, ọle da fikie dọ nowẹ. Ọne ẹhi da gbo kie riọ ọle bhi owe yẹ taman ọlẹn yọle: ‘Le ebale. Okhian nin uwẹ ha khian dẹ manman gbe uwẹ ahu.’ Bhiriọ, Ẹlaija da gbo kie le bhọ. Ọle ki le ọle fọ, ọle da diọbhi Oke Ọsi Horẹb. Ikpẹdẹ 40 bi asọn 40 ọ re Ẹlaija le rẹ sẹbhi enin. Ọle ki sẹbhi enin, ọle da dọ nowẹ bhi ẹkẹ uhio nọn ribhi ẹkẹ udo. Ọkpakinọn, Jehova da dọ nanlẹn talọ. Ọle da nọọn ọlẹn yọle: ‘Ẹlaija, be uwẹ lu bhi enan? Ẹlaija da wanniẹn ọlẹn yọle: ‘Ibhokhan Izrẹl bha mun ive nin ele ve nin uwẹ sẹ. Ele dunmhun ukhuo-izọese nọnsẹ a, yẹ gbono ene akhasẹ nesẹ a. Bhi ejayenan nian, ele guanọ nin ele gbe mẹn an.’

Jehova ki da taman ọlẹn yọle: ‘Dọ mundia bhi okhun oke.’ Ọhẹnhẹn, okpahoho da fi na ọne uhio udo. Ọnin ki sunu fo, otọ da muvea, sẹyẹ eranlẹn da rẹkhan ọlẹn. Bhi ọkike ọle, Ẹlaija da họn urulu nọn lọre, nọn fẹkẹ ha talọ. Ọle ki da re ukpọn nọnsọle rẹ gue ẹlo, yẹ dọ mundia bhi odalo ọne uhio udo. Jehova da nọọn ọlẹn ebezẹle nin ọle da nẹgbe. Ẹlaija da yọle: ‘Imẹn ọkpa sẹsẹ ki kẹre.’ Ọkpakinọn, Jehova da taman ọlẹn yọle: ‘Ọ i yi uwẹ ọkpa kẹre. Eria ne bun sẹbhi 7,000 ribhi Izrẹl ne sẹyẹ ga mẹn. Ha khian dọ re Ẹlaisha kiẹn akhasẹ bhi ihe nọnsẹ.’ Ẹjẹje, Ẹlaija da dọ lu ebi Jehova taman ọlẹn. Uwẹ riale ghe Jehova dẹ yẹ re inian rẹkpa uwẹ sade uwẹ lu ebi ọle yọle nin uwẹ lu? Ehe, ọle dẹ rẹkpa uwẹ. Mhan fẹghe ebe sunu bhi ẹghe nin amẹn bha rẹ rọlọ bhi otọ Izrẹl.