A Da Gbe Esọn Ọkpa A Ranmhude Emhin Ebe Nọnsọle

Ehab nin Ojie da na bhi windo nọn ribhi uwa nọnsọle bhi Jezriẹ ha ghe ugbo ọsi okpea ọkpa natiọle Nabọt. Ọne ugbo da wo ha ri Ehab bhi ẹlo, bhiriọ, ọle da ha guanọ nin ọle dẹ ọne ugbo bhi obọ Nabọt. Ọkpakinọn, Nabọt bha ka khiẹn ọlẹn nanlẹn. Ranmhude ọle ha khiẹn ọlẹn, ọle ki gbobọrauhi nọnsi Jehova nọn yọle ghe, nin ọria hẹi khiẹn otọ nin ọle le bhi uku. Ehab be ghe emhin nin Nabọt lu bii emhin nọn gbale? Eye. Ẹkẹ da wo manman ha khọ Ehab rẹ sẹbhọ ghe, ọle bha yẹ ha sibhi ugha nọnsọle re, sẹyẹ, ọle bha yẹ ha le ebale.

Okhuo Ehab nin ọria ebe natiọle Jezibẹl, da taman Ehab yọle: ‘Uwẹ hi ojie ọsi Izrẹl. Emhin nọn hi ki rẹ khin nọn ghọn ẹn, uwẹ dẹ sabọ ha mhọn ọlẹn. Mẹn dẹ re ọne ugbo kiẹn ọsẹ.’ Ọle da gbẹn ebe ji ewanlẹn ne ribhi ọne agbaẹbho rẹ taman ele ghe, nin ele yọle ghe Nabọt ghunmhun Osẹnobulua, sẹyẹ, nin ele re udo-udo gbe ọle a. Ene ewanlẹn da gene lu ebi Jezibẹl taman ele nin ele lu. Ele ki lu ọle fo, Jezibẹl da dọ taman Ehab yọle: ‘Nabọt yu. Uwẹ ki nyan ọne ugbo nian.’

Ọ i yi Nabọt ọkpa hi ọria nin Jezibẹl sẹ gbe a ọsi ọke. Ọle sẹ wo gbono ẹbho ne bunbun a ne hoẹmhọn Jehova. Ẹbọ ọle ga, sẹyẹ, ọle wo manman ha lu emhin ebe. Jehova wo daghe emhin rebhe nin Jezibẹl ha lu. Be Jehova ha khian ọlẹn yẹ?

Ẹghe nin Ehab ki rẹ yu, ọmọn nọnsọle natiọle Jehoram da kiẹn ojie. Jehova da je okpea ọkpa natiọle Jehu, nin ọle dọ gbe Jezibẹl bi ọrebhe bhi azagba-uwa nọnsọle a.

Jehu da hẹn awẹnẹwẹnẹ nọnsọle ha khian Jẹzriẹ, nin agbaẹbho nin Jezibẹl da nyẹnlẹn. Jehoram da yẹ hẹn awẹnẹwẹnẹ nọnsọle bu Jehu, yẹ nọọn ọlẹn yọle: ‘Ọfure riọ?’ Jehu da yọle: ‘Ọfure i da ha ribhọ beji a miẹn ghe inẹn ẹn nin Jezibẹl sẹyẹ wo lu emhin ebe.’ Jehoram da rẹ ha guanọ nin ọle nẹgbe. Ọkpakinọn, Jehu da re ufẹnmhẹn rẹ ha ọle, bhiriọ, ọle da yu.

Ọnan ki sunu fo, Jehu da diọbhi ẹgua ọsi Jezibẹl. Ẹghe nin Jezibẹl ki rẹ họn ghe Jehu vade, ọle da dọ hose, re eto nọnsọle ọi nọnsẹn, yẹ diakhẹ ọle bhi egbe-egbe windo bhi uwa igedege nọnsọle. Ẹghe nin Jehu ki rẹ sẹ enin, Jezibẹl da wo tuẹ ọle nai. Jehu da sotie eguọmhandia nesi Jezibẹl ne mundia sikẹ Jezibẹl, yẹ taman ele yọle: “Bha sua ọle fia!” Ele da sua Jezibẹl na windo. Ọle da de ọbhi otọ. Iriọ ọle rẹ yu.

Ọnan ki sunu fo, Jehu da gbono imikpea 70 ọsi Ehab a, yẹ re ọkpẹnlẹn ọbhi oga ọsi Bel. Ọnan bha be rẹkpa uwẹ rẹ lẹn ghe Jehova lẹn emhin rebhe ne sunu, sẹyẹ, bhi ẹghe nọn khẹke, ọle dẹ re oya nin ọrebhe ne lu emhin ebe?