Ọria Ọbhebhe Nọn Munhẹn Ha Sun Ibhokhan Izrẹl Bi Ikhuo Eva Ne Mhọn Izebhudu

Ikpe ne bunbun ki gbera nin Joshua rẹ ha sun ẹbho nesi Jehova, ọle da yu. Ikpe 110 ọle ha ye bhi ẹghe nin ọle rẹ yu. Ibhokhan Izrẹl wo ha ga Jehova bhi ẹghe nin ọle rẹ ha ribhi agbọn. Sokpan, Joshua ki yu fo, ele da munhẹn ha ga ẹbọ beji ibhokhan Kenan ha lu. Jehova da re otọ nin Jabin nin ojie ọsi Kenan rẹ ha re oya nin ibhokhan Izrẹl, ranmhude nin ele bha yẹ rẹ ha rẹkhan Jehova. Ibhokhan Izrẹl da ha bhii Jehova nọn rẹkpa ele. Bhiriọ, Jehova da re ọria ọgbọn nin ele nọn ha sun ele. Berak a tie ọne ọria. Ọle dẹ rẹkpa ene ẹbho rẹ fikie bu Jehova.

Dẹbora nin akhasẹ da yọle nan datie Berak re, ranmhude Jehova je ọle uhọnmhunje nin ọle taman Berak. Ọle da yọle: ‘Ne ikpea 10,000, uwẹ ha yẹ bu eyokhọnlẹn ọsi Jabin bhi egbegbe ẹdẹ ọsi Kishọn. Bhi enin, uwẹ dẹ khọn Sisera miotọ, nin ọdiọn eyokhọnlẹn ọsi Jabin.’ Berak da ki taman Dẹbora yọle: ‘Mẹn dẹ yo sade uwẹ rẹkhan mẹn.’ Dẹbora da yọle: ‘Mẹn dẹ rẹkhan uwẹ. Sokpan, lẹn sẹbhọ ghe, ọ i yi uwẹ ha gbe Sisera a. Jehova yọle ghe, okhuo ha gbe ọle a.’

Dẹbora da rẹkhan Berak bi eyokhọnlẹn nesọle ha khian uke oke ọsi Tebọ dọ muegbe ọne okhọnlẹn. Sisera ki wo họn ọnan, ọle da ne eyokhọnlẹn nesọle bi awẹnẹwẹnẹ nesọle ha khian iyala ọsi ọne oke. Dẹbora da taman Berak yọle: ‘Ẹlẹnan hi ọne ukpẹdẹ nin Jehova ha rẹkpa uwẹ rẹ khọn miotọ.’ Berak bi eyokhọnlẹn nesọle ne bun sẹbhi 10,000 da huẹnre bhi ọne oke, dọ khọn eyokhọnlẹn ọsi Sisera ne manman bun, ne yẹ wo manman mhọn ahu.

Jehova da lu ọle nin ẹdẹ ọsi Kishọn kpa kua. Bhiriọ, awẹnẹwẹnẹ nesi Sisera da ha sikhan bhi ẹkẹ ene ekhuọrọ. Ranmhude ọnan, Sisera da fi awẹnẹwẹnẹ nọnsọle ya, yẹ ha nẹ khian. Berak bi eyokhọnlẹn nesọle da khọn eyokhọnlẹn nesi Sisera miotọ, sokpan Sisera da nẹgbe! Ọle da dọ nẹhe bhi ibọkpọ ọsi okhuo ọkpa natiọle Jeẹl. Ọne okhuo da mun miliki nanlẹn wọn, yẹ re ukpọn nan rẹ hin egbe rẹ hin ọlẹn. Ranmhude egbe wo manman lọ Sisera, ọle da wẹ fia. Bhiriọ, Jeẹl da do khian bu ọle, yẹ khan ise nan rẹ khan ibọkpọ ọle bhi uhọnmhọn. Bhiriọ, ọle da yu.

Berak ki guanọ Sisera sẹbhi enin, Jeẹl da dagbare bhi ibọkpọ nọnsọle yẹ taman ọlẹn yọle: ‘Vae bhi ẹkẹ uwa, nin mẹn man uwẹ ọne okpea nin uwẹ guanọ.’ Berak ki nabhi ẹkẹ uwa, ọle da kere ghe Sisera yu bhi eji ọle da nowẹ. Berak bi Dẹbora da ki ha so illo rẹ gẹn Jehova, nin ọle rẹ rẹkpa ibhokhan Izrẹl rẹ khọn ighian ele miotọ. Bhi ẹkẹ ikpe 40 ne rẹkhan ọlẹn, egbe da wo fu ibhokhan Izrẹl re.