Rut Bi Naomi

Ẹghe nin ukhunmhun rẹ ha fi bhi otọ Izrẹl, obhokhan Izrẹl ọkpa natiọle Naomi bi ọdọ ọle bi imikpea eva nesele da diọbhi otọ Moab. Akizẹbue, ọdọ Naomi da yu. Imikpea nesọle da re Rut bi Ọpa bhi amhẹn. Ibhokhan Moab ene ikhuo nan ha khin. Ọ ba bhi egbe a ghe, akizẹbue, imikpea nesi Naomi da yu.

Naomi ki họn ghe ukhunmhun nọn ha fi bhi otọ Izrẹl fo, ọle da fikie ha khian uwa. Rut bi Ọpa da rẹkhan ọlẹn. Ọkpakinọn, beji ele rẹ khian bhi uwedẹ, Naomi da taman ele yọle: ‘Ikhuo esili bha wo ha khin rẹji imọn nesẹmhẹn, sẹyẹ, imọn ne mhẹn bha khin rẹji mẹn. Mẹn ho nin ibha veva kie bọdọ. Bha ha khian Moab nin agbaẹbho nọnsẹbha.’ Ene ikhuo veva da yọle: ‘Mhan hoẹmhọn uwẹ! Mhan bha ho nin mhan zẹ uwẹ obọ.’ Sokpan, Naomi da ha taman ele nin ele ha khian uwa. Akizẹbue, Ọpa da kpanọ ha khian uwa, sokpan, Rut bha kpanọ. Naomi da ki taman Rut yọle: ‘Ọpa fikie bu ẹbho nesọle bi osẹ nesọle, rẹkhan ọlẹn, nin uwẹ ha khian uwa ọsi inẹn ẹn.’ Sokpan, Rut da yọle: ‘Mẹn i da zẹ uwẹ obọ. Ẹbho nesẹ dẹ ha yi ẹbho nesẹmhẹn, sẹyẹ, Osẹnobulua nọnsẹ dẹ ha yi Osẹnobulua nọnsẹmhẹn.’ Be uwẹ riale ọ dia Naomi yẹ bhi egbe bhi ẹghe nin Rut rẹ ta ọnan?

Ẹghe nan rẹ wo munhẹn ha hian bali bhi ugbo, ọle Rut bi Naomi rẹ sẹbhi otọ Izrẹl. Ẹdọkpa, Rut da dọ yaya ogo ọsi Boaz, nin ọmọn nọnsi Rehab. Ọle da họn ghe obhokhan Moab Rut khin, ghe ọle wo sun rẹkhan Naomi. Ọle da taman ene wẹnna nanlẹn ghe, nin ele fi emhin-ugbo eso kẹre nin Rut miẹn ha yaya.

Ọsemuan bhi ọne ukpẹdẹ nin, Naomi da nọọn Rut yọle: ‘Ugbo ọsi ọria nela uwẹ da wẹnna ẹlẹnan?’ Rut da wanniẹn ọlẹn yọle: ‘Ugbo ọsi okpea ọkpa natiọle Boaz.’ Naomi da taman ọlẹn yọle: ‘Ọkpa bhi ibhio ọdọ mẹn Boaz khin. Wo ha deba ene ikhuo ne bha sẹ wanre wẹnna bhi ugbo nọnsọle. Egbe dẹ fu uwẹ re bhi enin.’

Ugbo ọsi Boaz Rut da ha wẹnna re sẹbhi ẹghe nin ẹghe nan rẹ rọ emhin-ugbo rẹ fo. Boaz da daghe ọle ghe okhuo nọn manman wẹnna kaka Rut khin, sẹyẹ, okhuo esili nọn. Bhi ẹghe ẹdẹlẹ, ahamiẹn okpea yu, ghe ọle bha biẹ ọmokpea hiehie, obhio ọle ki re okhuo nin ọle yu fi ya bhi amhẹn. Bhiriọ, Boaz da re Rut bhi amhẹn. Ele da biẹ ọmokpea yẹ hẹ ọle Obẹd. Akizẹbue, Obẹd da dọ ha yi aba nọn nẹ ọsi Devid nin Ojie. Imọẹ Naomi da wo ha ghọnghọn. Ele da yọle: ‘Jehovah da ka re Rut nin uwẹ, nọn wo ha lu uwẹ nọnsẹn, bhi ejayenan nian, ọle re ọmọn-eyẹ nin uwe. Ogẹn hi ọsi Jehova.’