Ele Da Sọtẹ Da Jehova

Akizẹbue, ẹghe nin ibhokhan Izrẹl rẹ ha ribhi ẹkẹ ojẹgbo, Kora, Detan, Abairam, bi itue 250 ne deba ele da sọtẹ da Mozis. Ele da taman Mozis yọle: ‘Ọ sẹ uwẹ riọ! Bezẹle nan da miẹn ghe uwẹ hi ọnọn sun mhan, sẹyẹ, Erọn hi ojohẹn nọnsẹmhan? Jehova ne mhan rebhe dia, ọ i yi uwẹ bi Erọn ọkpa ọle ne dia.’ Ọnan bha ha ti Jehova bhọ. Ọle da ghe ọle bii isọtẹ rẹji ọle!

Mozis da taman Kora bi ene deba ọle yọle: ‘Bha vae bhi ibọkpọ ọsi oga ewiẹ. Bha ne emhin nan zẹ eran ọi mhọn rẹkhan egbe, bha ha yẹ ne emhin ne viohin ọbhọ. Jehova dẹ rẹman mhan ọne ọle zẹle.’

Ẹdẹ ki we, Kora bi ene ikpea 250 da bu Mozis bhi ọne ibọkpọ ọsi oga. Bhi enin, ele da ha tuẹ emhin nọn viohin an bọsi ghe ohẹn ele khin. Jehova da taman Mozis bi Erọn yọle: ‘Bha si egbe kie bhi eji Kora bi ikpea nesọle ye.’

Arẹmiẹn Kora bu Mozis bhi ọne ibọkpọ ọsi oga, Detan, Abairam, bi azagba-uwa nọnsele bha ka yo. Jehova da taman ibhokhan Izrẹl nin ele sibhi eji ibọkpọ ọsi Kora, Detan, bi Abairam ye re. Ẹjẹje, ibhokhan Izrẹl da sibhi eji ele ye re. Detan, Abairam, bi azagba-uwa nọnsele da mundia bhi odalo ibọkpọ nọnsele. Otọ da wo re osukpa wa a, yẹ gue ele! Bhi ọne ibọkpọ ọsi oga, eranlẹn da na okhun vae yẹ tuẹ Kora bi ene ikpea 250 nesọle a.

Jehova da ki taman Mozis yọle: ‘Miẹn ọdiọn ọsi ene ulin-uwa kẹkẹ ukpokpo nọnsele, uwẹ ha yẹ gbẹn elin nọnsele ọbhọ kẹkẹ. Sokpan, elin ọsi Erọn uwẹ ha gbẹn ọbhi ukpokpo ọsi ulin-uwa ọsi Livai. Ne ene ukpokpo ọbhi ẹkẹ ibọkpọ ọsi oga. Ukpokpo ọsi ọria nọn hi ki rẹ khin nin mẹn zẹle, ọle aroro ha da jẹre.’

Ẹdẹ ki we, Mozis da ne ene ukpokpo rebhe dagbare, yẹ re ọle man ene ọdiọn ulin-uwa rebhe. Aroro da jẹre bhi ukpokpo ọsi Erọn, ọ da yẹ mọn ikpẹ nọn bholo ọsi eran natiọle almond. Jehova da re ọnan rẹ rẹman ghe, Erọn hi ọnọn ọle zẹ nọn ha yi ojohẹn.