Itue Igbeva Ne Dọ Baba Otọ Kenan Fẹghe

Ibhokhan Izrẹl ki sibhi oke ọsi Sanai re, ele da khian na ẹgbo ọsi Paran dọ sẹbhi eje a tiọle Kedẹsh. Bhi enin, Jehova da taman Mozis yọle: ‘Ji ikpea 12, ọkpa bhi ulin-uwa kẹkẹ ọsi ibhokhan Izrẹl, nin ele dọ baba otọ Kenan fẹghe. Mẹn dẹ mun ọne otọ nan nin ibhokhan Izrẹl.’ Bhiriọ, Mozis da zẹ ikpea 12 yẹ taman ele yọle: ‘Bha ha khian Kenan, bha dọ fẹghe si ọne otọ be mhẹn nan rẹ ha mun ugbo. Ibha ha yẹ fẹghe si ene ẹbho be ziẹn la wẹghẹ. Sẹyẹ, bha fẹghe si ibọkpọ ele da nyẹnlẹn la agbaẹbho nọn tan ẹlo a nọn.’ Ene itue 12 nan je da kpanọ ha khian otọ Kenan. Joshua bi Kelẹb deba ene itue 12 nan.

Ikpẹdẹ 40 ki gbera, ene ẹbho nan je ne dọ baba otọ Kenan fẹghe da fikiere. Ele da munọ ikperan ifig, pomẹgranet, bi ikperan anyọn re. Ele da yọle: ‘Ọne otọ wo manman mhẹn, ọkpakinọn, ene ẹbho wo manman ziẹn, iriọ ogbe ọsi agbaẹbho nọnsele rẹ wo manman yoyo.’ Bhirio, Kelẹb da yọle: ‘Imhan dẹ sabọ khọn ele miotọ. Bha ji mhan dọ khọn ele nian!’ Uwẹ be lẹn ebezẹle nin Kelẹb da ta iriọ? Ranmhude ọle bi Joshua mun udu nyan Jehova. Ọkpakinọn ene itue igbe nekẹle da yọle: ‘Eye! Ene ẹbho wo manman kpọnọ bii eguanlan! Inian mhan diabe atikekun bhi eji ele ye.’

Egbe da lọ ibhokhan Izrẹl. Ele bhọ da munhẹn ha zaka-zuyọn, yẹ ha taman egbe ele yọle: ‘Bha ji mhan zẹ ọria nọn ha sun mhan fikie ha khian otọ Ijipt. Ranmhude mhan ha diọbhi ọne agbaẹbho nan, ele dẹ gbono mhan an.’ Sokpan, Joshua bi Kelẹb da taman ele yọle: ‘Bha hẹi sọtẹ da Jehova. Sẹyẹ, bha hẹi ji ofẹn mun bha, ranmhude Jehova dẹ gbega mhan.’ Sokpan ene ibhokhan Izrẹl bha kaehọ. Ele bhọ da ha guanọ nin ele gbe Joshua bi Kelẹb a!

Be Jehova ki lu yẹ? Ọle da taman Mozis yọle: ‘Arẹmiẹn mẹn lu emhin ne bunbun nin ibhokhan Izrẹl, ele bha yẹ ka mẹn ehọ. Ranmhude ọnan, ele dẹ ha ribhi ẹkẹ ọne ojẹgbo nan bhi ikpe 40, sẹyẹ, enan ele ha yuno ọi. Imọn nesi Joshua bi Kelẹb, ele ọkpa ha nyẹnlẹn bhi otọ nin mẹn ve nin ele.’