Jaki Ọsi Belam Da Ha Talọ

Khere kẹre nọn rẹ sẹbhi ikpe 40 nin ibhokhan Izrẹl ribhi ojẹgbo. Ele sẹ wo khọn agbaẹbho ne bunbun ne ziẹnlẹn miotọ. Ọ ki sẹ ẹghe nin ele ha rẹ nabhi otọ nan ve nin ele, ele da mun agọ bhi otọ ọsi Moab, nọn ribhi obọ ọsi ist bhi Ẹdẹ Jọdan. Ofẹn da ha mun Belak nin ojiẹ ọsi Moab ghe, ibhokhan Izrẹl dẹ gbe ọle miẹn ọle otọ nọnsọle. Ọle da tie okpea ọkpa natiọle Belam vae bhi Moab, yẹ taman ọlẹn nin ọle dọ nanlẹn fi ibhokhan Izrẹl unun.

Ọkpakinọn, Jehova da taman Belam yọle: ‘Hẹi fi ibhokhan Izrẹl unun.’ Bhiriọ, Belam da he ghe ọle i da yo. Belak nin ojie da kie tie ọle ugba-ọzeva, yẹ taman ọlẹn ghe, ọle dẹ re emhin nọn hi ki rẹ khin nin ọle guanọ nanlẹn. Ọrẹyiriọ, Belam bha yẹ ka. Osẹnobulua da ki taman ọlẹn yọle: ‘Uwẹ sabọ rẹ ha khian, Sokpan, emhin nin mẹn ha taman uwẹ ọkpa uwẹ ha ta.’

Belam da ki hẹn Jaki nọnsọle diọbhi obọ ọsi saot ọsi Moab. Ọle da ha guanọ nin ọle dọ fi ibhokhan Izrẹl unun, arẹmiẹn Jehova taman ọlẹn nin ọle hẹi lu iriọ. Ẹhi nọnsi Jehova da bu ọle re bhi uwedẹ igba ea. Belam bha sabọ daghe ọne ẹhi, sokpan, jaki nọnsọle da daghe ọle. Bhi ọsi ọhẹnhẹn, ọne jaki da sibhi odẹ re nabhi ẹwẹ. Bhi ọsi ugba-ọzeva, ọne jaki da ha re egbe khiakhi ogbe nan re udo lu, bhiriọ, ọne udo da khiakhi Belam oẹ. Bhi ọkike ọle, ọne jaki da nowẹ bhi adesẹ odẹ. Bhi enin igba ea nan, Belam da re ukpokpo ha gbe ọne jaki.

Ọnan ki sunu fo, Jehova da lu ọle nin ọne jaki talọ. Ọne jaki da nọọn Belam yọle: ‘Bezẹle nin uwẹ da ha gbe mẹn?’ Belam da yọle: ‘Uwẹ re mẹn diabe uhuki. Mẹn ha rẹ gbe uwẹ a sade mẹn mhọn agbada nọn.’ Ọne Jaki da yọle: ‘Ikpe ne bunbun ọ ki ye nian nin uwẹ mọn da hẹn mẹn, mẹn be sẹ ka re inian lu uwẹ emhin khẹ?’

Jehova da ki lu ọle nin Belam daghe ọne ẹhi. Ọne ẹhi da yọle: ‘Jehova taman uwẹ ghe nin uwẹ hẹi fi ibhokhan Izrẹl unun.’ Belam da yọle: ‘Mẹn lu emhin ebe. Mẹn dẹ fikie ha khian uwa.’ Ọne ẹhi da yọle: ‘Uwẹ sabọ rẹ ha khian Moab, sokpan, ebi Jehova taman uwẹ ọkpa uwẹ ha ta.’

Belam be luẹ emhin bhi ọne emhin nan nọn sunu ji ọle? Eye. Ọnan rẹ sunu fo, Belam da yẹ dọnmhegbe igba ea nin ọle rẹ fi ibhokhan Izrẹl unun. Ọkpakinọn, bhi ene igba ea, nin ọle rẹ fi ele unun, Jehova da lu ọle nin ọle nan erọnmhọn nin ele. Akizẹbue, ibhokhan Izrẹl da mun khọn bu ibhokhan Moab, ele da gbe Belam a. Sade Belam ka Jehova ehọ bhi ọsi ọhẹnhẹn nọn, ọle ha be rẹ yu?