Ye Ebe Sunu Ji Amhẹn Lọt Re

Lọt da deba Ebraham nin obhio aba ọle ha nyẹnlẹn bhi Kenan. Akizẹbue, Ebraham bi Lọt da ha mhọn elanmhẹn ne bunbun, ranmhude ọnan, otọ bha yẹ gua ele. Bhiriọ, Ebraham da taman Lọt yọle: ‘Mhan i da yẹ ko sabọ ha nyẹnlẹn bhi ijian ọkpa. Huẹan, zẹ obọle nọn hi ki rẹ khin nọn yẹẹ uwẹ rẹ ha khian, bhiriọ, mẹn ki diọbhi obọ nọnkẹle.’ Ọnan wo rẹman ghe, Ebraham bha ha ria ẹmhọn ọsi egbe ọle ọkpa.

Lọt da daghe obọ ọsi ọne otọ nọn manman mhọn-ose, nọn sikẹ agbaẹbho ọsi Sodọm. Amẹn wo ribhi enin, iriọ ilunmhun wo yẹ rẹ vuọn ọlẹn. Bhiriọ, ọle da zẹ enin yẹ ne azagba-uwa nọnsọle diọbhọ.

Ẹbho ne ribhi Sodọm bi agbaẹbho nọn sikẹ ọle natiọle Gomora bha ha mhẹn hiehie, rẹ sẹbhọ ghe Jehova da zẹ nin ọle rẹ dunmhun ene agbaẹbho veva a. Sokpan, Osẹnobulua da ha guanọ nin ọle hinmhin Lọt bi azagba-uwa nọnsọle. Bhiriọ, ọle da je ẹhi eva bu ele rẹ taman ele yọle: ‘Bha jẹje sibhi ọne agbaẹbho nan re! Jehova dẹ dunmhun ọlẹn an.’

Lọt bha re ẹjẹje kpanọ, ọle da ha rọẹghẹ. Bhiriọ, ene ẹhi da re Lọt obọ, re okhuo ọle obọ, bi imikhuo eva nesọle obọ rẹ re ẹjẹje sibhi ọne agbaẹbho re. Ene ẹhi da yọle: ‘Bha runẹ nẹgbe nin ibha da miuhọnmhọn. Bha hẹi ghe ikeke! ibha ha ghe ikeke, bha ki yu!’

Ele ki sẹbhi agbaẹbho ọsi Zoa, Jehova da lu ọle nin eranlẹn bi sọfọ na okhun tuẹ agbaẹbho ọsi Sodọm bi Gomora a. Ene agbaẹbho veva da wo fuẹn an sẹsẹsẹ. Okhuo Lọt bha hẹnmhọn nin Jehova. Ọle da ghe ikeke, bhiriọ, ọle da kiẹn ukene umhẹn! Sokpan, Lọt bi imikhuo nesọle da miuhọnmhọn ranmhude ele hẹnmhọn nin Jehova. Ọ dẹ wo ba Lọt bhi egbe ghe, okhuo ọle bha hẹnmhọn nin Jehova, iriọ ọ ha yẹ rẹ ba imọn nesọle bhi egbe. Sokpan, ọ dẹ wo re ele ha ghọnghọn ghe ele hẹnmhọn nin Jehova.