Ele Da Gene Biẹ Ọmokpea

Ikpe ne bunbun sẹ wo gbera nian nin Ebraham bi Sera bọ egbe. Ele da ze uwa nọnsele obọ bhi Ọr nin egbe da fu ele re dọ ha nyẹnlẹn bhi ibọkpọ. Sokpan, Sera bha ha zaka-zunyọn, ranmhude ọle mun udu nyan Jehova.

Sera da wo ha guanọ ọmọn rẹ sẹbhọ ghe, ọle da taman Ebraham yọle: ‘Ahamiẹn Hega nin ọguọmhandia nọnsẹmhẹn biẹ nin uwẹ, ọne ọmọn ki diabe ọsẹmhẹn.’ Akizẹbue, Hega da biẹ ọmokpea. A da ha tie ọne ọmọn Ishmẹl.

Ikpe ne bunbun ki gbera, itue ea da rẹnẹ ji ele. Bhi ọne ẹghe nan, ikpe 99 Ebraham ha ye, Sera da ha ribhi ikpe 89. Ebraham da taman ene ẹbho ne rẹnẹ ji ele ghe nin ele dọ koahu a bhi otọ eran, yẹ deba ọle le ebale. Uwẹ be lẹn ọria nin ene ẹbho nan khin? Ẹhi ele khin! Ele da taman Ebraham yọle: ‘Bhi ọne ẹghe nan bhi ukpe nọn vade, uwẹ bi okhuo ẹ dẹ ha mhọn ọmokpea.’ Sera da ha kaehọ bhi ẹkẹ ọne ibọkpọ. Ọle da ha jiẹ yẹ taman egbe ọle yọle: ‘Imẹn dẹ yẹ sabọ biẹ, beji a ki miẹn mẹn dọmanlẹn?’

Bhi ukpe nọn rẹkhan ọlẹn, Sera da biẹ ọmokpea beji ẹhi nọnsi Jehova tale. Ebraham da hẹ ọne ọmọn Aizik. Ebi Aizik mundia nan hi “Ojiẹ.”

Ẹghe nin Aizik rẹ ribhi ikpe isẹn, Sera da daghe ọle ghe Ishmẹl zuọzuọ Aizik. Ọle da ha guanọ nin ọle gbega ọmọn nọnsọle. Bhiriọ, ọle da taman Ebraham nọn khu Hega bi Ishmẹl fia. Bhi ọsi ọhẹnhẹn, Ebraham bha rẹ ha guanọ nin ọle lu iriọ. Sokpan, Jehova da taman Ebraham yọle: ‘Ka Sera ehọ. Mẹn dẹ gbẹloghe Ishmẹl. Sokpan, rẹ na obọ Aizik, ọle mẹn ha rẹ mun ive nesẹmhẹn sẹ.’